मुंबई : नुकताच रिझर्व्ह बँकेचे पतधोरण जाहीर झाले. यात बँकेने व्याजदर स्थिर ठेवले असले तरी जीडीपीबाबत आश्वासक असल्याचे म्हटलं आहे. करोना संकट आणि देशात सुरु असलेली व्यापक लसीकरण मोहीम यातूनही अर्थव्यवस्थेची घोडदौड सुरु आहे. नव्या आठवड्यात बड्या कोर्पोरेट्सकडून जाहीर केले जाणार आहेत. त्याकडे गुंतवणूकदारांचे लक्ष असेल. नव्या आठवड्यात गुंतवणूकदार तिमाही निकालांवर लक्ष देतील. यात आयटी क्षेत्राच्या कामगिरीकडे नजरा असतील, असे मत जिओजित फायनान्शिअल सर्व्हिसेसचे मुख्य विश्लेषक विनोद नायर यांनी सांगितले. ते म्हणाले की याशिवाय बाजाराला सप्टेंबरमधील महागाईच्या आकडेवारीची प्रतीक्षा असेल. जागतिक पातळीवर अमेरिकेतील रोजगाराची आकडेवारी पुढील आठवड्यात जाहीर होणार आहे. त्याचेही पडसाद भारतीय बाजारावर उमटतील, असे त्यांनी सांगितले. निफ्टी ५० निर्देशांकाने मागील काही सत्रात चढ उतार अनुभवले. मात्र त्यातून उभारी घेण्यास निर्देशांक यशस्वी ठरला. निफ्टीला १७४५० च्या पातळीवर सपोर्ट असला तरी त्याचे सध्याचे मूल्यांकन वाजवीपेक्षा जास्त असल्याचे सॅमको या ब्रोकिंग संस्थेने आपल्या अहवालात म्हटलं आहे. तूर्त निफ्टीत मोठी घसरण दिसत नाही, असे या अहवालात म्हटलं आहे. देशात जवळपास करोना प्रतिबंधात्मक लसीकरण मोहीमेत ९३ कोटी डोस पूर्ण झाले आहेत. या व्यापक लसीकरण मोहिमेमुळे भारत करोनाची तिसरी लाट रोखण्यास यशस्वी होईल, असा विश्वास गुंतवणूकदारांच्या मनात निर्माण झाला आहे. त्यामुळे बाजारात खरेदीचा ओघ यापुढील सत्रात देखील कायम राहण्याची शक्यता आहे. पुढील आठवड्यात अर्थव्यवस्थेची कामगिरी दर्शवणारी महत्वाची आकडेवारी सरकारकडून जाहीर केली जाणार आहे. ज्यात ऑगस्टमधील औद्योगिक उत्पादन , सप्टेंबरमधील घाऊक आणि किरकोळ जाहीर होणार आहे. त्याचाही परिणाम बाजारावर दिसून येईल.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/2YBg0jQ
No comments:
Post a Comment