दुबई: महेंद्र सिंह धोनीच्या नेतृत्वाखाली चेन्नई सुपर किंग्जने विक्रमी ९व्यांदा आयपीएलच्या अंतिम फेरीत प्रवेश केला. क्वॉलिफायल १ च्या लढतीत अंतिम षटकापर्यंत रंगलेल्या सामन्यात चेन्नईने दिल्ली कॅपिटल्सचा पराभव केला. कर्णधार महेंद्र सिंह धोनीने अखेरच्या २ षटकात ६ चेंडूत नाबाद १८ धावा करून संघाला विजय मिळून दिला. त्याआधी सलामीवीर ऋतुराज गायकवाड आणि रॉबिन उथप्पा यांनी संघाच्या विजयाचा पाया रचला. वाचा- फायनलमध्ये पोहोचण्यासाठी चेन्नईला विजयासाठी १७३ धावांचे आव्हान होते. चेन्नईची सुरूवात अतिशय खराब झाली. पहिल्या षटकातील चौथ्या चेंडूवर सलामीवीर फाफ डुप्लेसिसला नॉर्जेने बोल्ड केले. पण त्यानंतर आलेल्या रॉबिन उथप्पा आणि ऋतुराज गायकवाड यांनी दुसऱ्या विकेटसाठी ११० धावांची भागिदारी केली. उथप्पाने दिल्लीच्या गोलंदाजांची चांगली धुलाई केली. त्याने वेगाने अर्धशतक पूर्ण केले. चेन्नईने सामन्यावर पकड मिळवली असताना श्रेयस अय्यरने सीमारेषेवर उथप्पाचा शानदार कॅच घेतला. उथप्पाने ४४ चेंडूत ७ चौकार आणि २ षटकारांसह ६३ धावा केल्या. त्यानंतर शार्दूल ठाकूरला फलंदाजीला पाठवण्यात आले पण तो पहिल्या चेंडूवर बाद झाला. तर त्याच्या जागी आलेला रायडू धावाबाद झाला. एका पाठोपाठ ३ विकेट पडल्याने चेन्नईची अवस्था १ बाद ११२ वरून ४ बाद ११९ अशी झाली. १९व्या षटकात पहिल्या चेंडूवर आवेश खानने ऋतुराज गायकवाडला बाद केले. त्याने ५० चेंडूत ५ चौकार आणि २ षटकारांसह ७० धावा केल्या. अखेरच्या २ षटकात चेन्नईला विजयासाठी २४ धावांची गरज होती. १९व्या षटकातील पहिल्या चेंडूवर ऋतुराजला बाद केले. ऋतुराजच्या जागी जडेजाच्या जागी कर्णधार महेंद्र सिंह धोनी आला. त्याने पाचव्या चेंडूवर षटकार मारला आणि विजयाचे संकेत दिले. अखेरच्या ६ चेंडूत चेन्नईला १३ धावांची गरज होती. दिल्लीने टॉम करनला गोलंदाजी दिली. पहिल्या चेंडूवर त्याने मोईन खानला बाद केले. दुसऱ्या आणि तिसऱ्या चेंडूवर धोनीने चौकार मारून विजयाचे समीकरण ३ चेंडूत ५ असे केले. चौथा चेंडू टॉमने वाइड टाकला. त्यानंतरच्या चेंडूवर धोनीने चौकार मारून चेन्नईच्या विजयावर शिक्कामोर्तब केले. धोनीने ६ चेंडूत १ षटकार आणि ३ चौकारांसह नाबाद १८ धावा केल्या. वाचा- पहिल्या क्वॉलिफायरमध्ये महेंद्र सिंह धोनीने टॉस जिंकून दिल्ली प्रथम फलंदाजीचे आमंत्रण दिले. दिल्लीची सुरूवात पृथ्वी शॉ आणि शिखर धवन यांनी केली. पृथ्वी पहिल्या चेंडूपासून गोलंदाजांवर तुटुन पडला. दिल्लीने ३.१ षटकात ३६ धावा केल्या होत्या. चेन्नईचा वेगवान गोलंदाज जोश हेजलवूडने धवनला ७ धावांवर बाद केले. त्यानंतर आलेल्या श्रेयस अय्यरला देखील त्याने १ धावांवर माघारी पाठवले. त्यामुळे दिल्लीची अवस्था २ बाद ५० अशी झाली. चौथ्या स्थानावर अक्षर पटेलला फलंदाजीसाठी पाठवण्यात आले. पण त्याचा काही उपयोग झाला नाही. अक्षरला मोईन अलीने १० धावांवर बाद केले. दरम्यान पृथ्वीने २७ चेंडूत अर्धशतक केले. त्याने ३४ चेंडूत ३ षटकार आणि ७ चौकारांसह ६० धावा केल्या. जडेजाने त्याची विकेट घेतली. दिल्लीची ४ बाद ८० धावसंख्या असताना मैदानात कर्णधार ऋषभ पंत आणि हेटमायर होते. या दोघांनी पावच्या विकेटसाठी ८३ धावांची भागिदारी केली आणि संघाला मजबूत धावसंख्या उभी करुन दिली. हेटमायर ३७ वर बाद झाला. अखेरच्या षटकात शार्दूल ठाकूरने पहिल्या ३ चेंडूवर एकही धाव दिली नाही. अखेरच्या ३ चेंडूत दिल्लीला ८ धावा करता आल्या. पंतने शेवटच्या चेंडूवर अर्धशतक पूर्ण केले. चेन्नईकडून हेजलवुडने सर्वाधिक २ तर जडेजा, मोईन अली आणि ब्रावो यांनी प्रत्येकी एक विकेट घेतली.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/302whiz
No comments:
Post a Comment