करोनामुळं कामाचा ताण?; वर्षभरात २३० पोलिसांचा मृत्यू https://ift.tt/3gWT1ai

म. टा. खास प्रतिनिधी, मुंबईः करोनाने हाहाकार उडविलेले २०२० हे वर्ष मुंबई पोलिसांसाठी सर्वात वाईट ठरले आहे. जानेवारी ते डिसेंबर या कालावधीत दलातील २३० जणांचा मृत्यू झाला आहे. गेल्या तीन वर्षांच्या तुलनेत ही सर्वाधिक संख्या असून यामध्ये करोनापेक्षा इतर आजाराने मृत्युमुखी पडलेल्या पोलिसांची संख्या अधिक आहे. करोनाच्या लढ्यात अहोरात्र लढणाऱ्या पोलिस दलास या विषाणूचा सर्वाधिक फटका बसला. असे असले तरी मुंबई पोलिस दलामध्ये २०२० या वर्षात एकूण किती अधिकारी आणि कर्मचारी यांचा कोणकोणत्या आजाराने मृत्यू झाला याबाबत आरटीआय कार्यकर्ते विहार दुर्वे यांनी माहितीच्या अधिकार अंतर्गत माहिती मिळवली आहे. २०१८, २०१९ आणि २०२० अशा तीन वर्षांची आकडेवारी पोलिसांची चिंता वाढवणारी आहे. या तीन वर्षांत सर्वाधिक २३० मृत्यू हे २०२० मध्ये झाले असून, यापैकी ९५ जण करोनाने, तर १३५ पोलिस इतर आजाराने मृत्युमुखी पडले आहेत. करोनाचा संसर्ग नसताना म्हणजे २०१८ मध्ये १२९ तर २०१९ मध्ये १४४ पोलिसांचे वेगवेगळ्या आजाराने निधन झाले आहे. २०२० मध्ये चार पोलिसांनी आत्महत्या करून स्वतःचे जीवन संपविले आहे. हृदविकार, मधुमेह आणि किडनी आजार अपुरे मनुष्यबळ आणि वाढणारी लोकसंख्या यामुळे मुंबई पोलिसांवर आधीच कामाचा ताण असताना करोना विषाणूने हा ताण आणखी वाढविला. पोलिस यंत्रणेवर येणारा ताणही मृत्यूस कारणीभूत असल्याचे आकडेवारीवरून दिसून येते. करोनाचे कारण सोडले तर सर्वाधिक पोलिसांचा मृत्यू हृदविकार, मधुमेह आणि किडनी आजाराने झाला आहे. अचानक छातीत दुखू लागणे, चक्कर येणे आणि उपचारासाठी दाखल करण्यापूर्वी मृत्यू होण्याचे प्रकारही पोलिसांच्या बाबतीत घडले आहेत. मनुष्यबळाची कमतरता कधीही न झोपणारे शहर म्हणून मुंबईची ओळख आहे. मुंबईची लोकसंख्या, लोकांची लाइफस्टाइल, गुन्हे यामुळे इतर शहरांच्या तुलनेत मुंबईत मनुष्यबळ अधिक लागते. पोलिस शिपाई ते सहायक पोलिस उपनिरीक्षक यासाठी मंजूर पदसंख्या ४० हजार ४७० इतकी आहे. मात्र, प्रत्यक्षात मुंबई पोलिस दलात ६,७३७ कमी म्हणजेच ३३,७३३ पोलिस कार्यरत आहेत. पोलिस उपनिरीक्षक ते पोलिस आयुक्त दर्जाच्या अधिकाऱ्यांची मंजूर पदे ५,५९० असून सध्या मुंबई पोलिस दलात ३,८८४ अधिकारी कार्यरत आहेत. १,७०६ अधिकाऱ्यांची मुंबई पोलिस दलात कमतरता आहे. फेब्रुवारी २०२१ पर्यंतच्या आकडेवारीनुसार ही माहिती आहे.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/2PNA5PY