ताळमेळानंतर महिन्यात राज्यात वाढले साडेवीस हजार मृत्यू https://ift.tt/3h8TvbC

म. टा. प्रतिनिधी, राज्यातील करोनामृत्यूंच्या सरकारी आकडेवारीत तफावत असल्याचे वृत्त 'महाराष्ट्र टाइम्स'ने प्रसिद्ध केल्यानंतर राज्याच्या आरोग्य विभागाने गेल्या महिन्याभरात तब्बल वीस हजार मृत्यूंची नोंद केली आहे. तांत्रिक कारणांचा आधार घेऊन मृत्युसंख्या कमी दाखविण्याचा सरकारी बाबूंचा खोटेपणा यामुळे आपोआप सिद्ध झाला आहे. 'महाराष्ट्र टाइम्स'ने १० जूनला याबाबत वृत्त प्रसिद्ध केले होते. गेल्या सप्टेंबरपासून जिल्हास्तरावर प्रसिद्ध होणाऱ्या आकडेवारीत आणि राज्य सरकारच्या अधिकृत आकडेवारीत साडेअकरा हजारांहून अधिक मृत्यूंची तफावत असल्याचे त्यात म्हटले होते. महाराष्ट्र मृत्यूंची आकडेवारी लपवत असल्याचा संशयही त्यात व्यक्त केला होता. मुख्यमंत्री उद्धव ठाकरे यांनी स्वतः जातीने लक्ष घालून या प्रकरणी संबंधितांची झाडाझडती घेऊन, योग्य पद्धतीने आकडे जाहीर करण्याचे आदेश दिले होते. नंतर आरोग्य विभागाने खुलासा करताना, मृत्यूच्या आकडेवारीचा ताळमेळ (रिकन्सिलेशन) दर पंधरा दिवसांनी घालण्यात येतो, असे म्हटले होते. शासकीय यंत्रणा दुसऱ्या लाटेचा सामना करण्यात व्यग्र असल्याने; तसेच तांत्रिक बाबींमुळे या नोंदी करण्याचे राहून गेल्याचेही म्हटले होते. मृत्यूंचा आकडा लपविण्याचा सरकारचा प्रयत्न नसल्याचेही स्पष्ट करण्यात आले होते. मे महिन्यापासून ताळमेळ घालून नव्या नोंदी करण्यास प्रारंभ केल्याचेही खुलाशात म्हटले होते. त्यानुसार एका महिन्यात तब्बल २० हजार ५३९ मृत्यूंच्या नोंदी अद्ययावत करण्यात आल्या आहेत. याच कालावधीमध्ये महाराष्ट्रात झालेल्या साडेआठ हजार मृत्यूंपेक्षा हे आकडे वेगळे आहेत. गेल्या पंचेचाळीस दिवसांचा आढावा घेतल्यास, ताळमेळ घालून करण्यात आलेल्या मृत्यूंच्या नोंदीचा आकडा २५ हजारांवर गेल्याचे सरकारी आकडेवारी सांगते. मृतांच्या आकडेवारीत कोणतीही लपवाछपवी होत नसल्याचे मुख्यमंत्री ठाकरे, आरोग्यमंत्री राजेश टोपे यांनी वारंवार जाहीर केले आहे; पण आरोग्य यंत्रणेच्या ताळमेळाची त्यांना माहिती नव्हती, हे या दरम्यान स्पष्ट झाले. एक महिन्याच्या आकडेवारीनंतर, आरोग्य विभागाचा पारदर्शकतेचा दावा किती फोल होता, हे यातून दिसते. राज्यात २८ मे ते १६ जूनपर्यंत दैनंदिन मृत्युसंख्या ६५२१ असल्याची नोंद करण्यात आली; तर ताळमेळ म्हणून १६,६४४ मृत्यू वाढविण्यात आले आहेत. राज्यात १० जूनला १५२२, ११ जूनला २२१३, १३ जूनला २२८८, १४ जूनला १३९२, तर १५ जूनला १०७० एवढ्या सर्वाधिक मृतांची संख्या 'रिकन्सिनलेशन'द्वारे वाढविण्यात आली. त्यानंतर सुमारे तीनशे ते चारशे मृतांची दररोज संख्या वाढविण्यात आल्याचे आतापर्यंत आरोग्य विभागाच्या अहवालात जाहीर करण्यात आले आहे. २७ जूनपर्यंत ८५२० दैनंदिन मृत्यू नोंदविले गेले आहेत. 'रिकन्सिलेशन'द्वारे २०,५३९ मृत्यू नोंदविल्याने मृत्युसंख्येत २९ हजार ६१ ने वाढ झाल्याचे स्पष्ट झाले आहे. दावा खोटा दर पंधरा दिवसांनी मृत्यू संख्येचा ताळमेळ घालत असल्याचा दावा किती खोटा होता हे ही सिद्ध झाले आहे. वाढलेल्या वीस हजार मृत्यूंची संख्या ही नक्की कधीपासूनची आहे, याचा खुलासा आता आरोग्य विभाग करणार का, असा प्रश्न आहे. खासगी रुग्णालयांनी माहिती अद्ययावत न केल्याचाही विभागाचा दावा आहे. आता ताळमेळ घातलेल्या मृत्यूंत खासगी आणि सरकारी रुग्णालयांतील आकडेवारी कधी जाहीर करणार हा प्रश्न आहे.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/3jmz267