म. टा. वृत्तसेवा, धावत्या पुष्पक एक्सप्रेसमध्ये सात ते आठ दरोडेखोरांनी प्रवाशांना लुटण्यासह एका २० वर्षीय तरुणीवर सामूहिक बलात्कार केल्याची धक्कादायक घटना शुक्रवारी रात्री आठ वाजण्याच्या सुमारास इगतपुरी ते कसारादरम्यान धावत्या एक्स्प्रेस घडली. यावेळी प्रवाशांनी धाडस दाखवत दोन आरोपींना पकडून कल्याण रेल्वे पोलिसांच्या ताब्यात दिले. पोलिसांनी आतापर्यंत ४ आरोपींना अटक केली असून, इतरांचा शोध सुरू आहे. या घटनेमुळे प्रवाशांमध्ये भीतीचे वातावरण आहे. कानपूरहून मुंबईच्या दिशेने येणारी पुष्पक एक्सप्रेस शुक्रवारी संध्याकाळी सहाच्या सुमारास इगतपुरी स्थानकातून मार्गस्थ होताच एक्स्प्रेसच्या मागच्या जनरल डब्यात शिरलेल्या ८ दरोडेखोरांनी हातातील पट्टे, फायटर, चाकू, गावठी कट्टा याने प्रवाशांना मारहाण करण्यास सुरुवात केली. प्रवाशांना धमकावत दरोडेखोरांनी सुमारे ९६ हजार रुपयांचे मोबाइल आणि पैसे हिसकावून घेतले. प्रतिकार करणाऱ्या प्रवाशांना त्यांनी बेदम मारहाण करण्यास सुरुवात केली. नशेत असलेल्या या आरोपींनी एका २० वर्षीय प्रवासी महिलेवर सामूहिक अत्याचार केला. यावेळी आरोपींना विरोध करणाऱ्या या महिलेच्या पतीला आणि एका सहप्रवाशाला दरोडेखोरांनी फायटरने मारहाण करत जखमी केले. २५ मिनिटांत प्रवाशांची लूटमार करून गाडी बोगद्याजवळ पोहोचताच ते चालत्या गाडीतून उतरून पळून गेले. तर एकजण बाथरूममध्ये गेल्याचा फायदा घेत प्रवाशांनी या आरोपीला बाथरूममध्येच कोंडून ठेवले. तर काही प्रवाशांनी रेल्वेच्या हेल्पलाइनवर मदत मागितली. सतर्क झालेल्या रेल्वे पोलिस आणि आरपीएफने कसारा रेल्वे स्थानकात गाडीतून उतरून पळून जाणाऱ्या एका आरोपीला अटक केली. तर गाडी कल्याण स्थानकात पोहोचताच प्रवाशांनी बाथरूममधील आरोपीला पकडून कल्याण रेल्वे पोलिसांच्या ताब्यात दिले. प्रकाश पारधी (वय २०) आणि अर्षद हुसेन शेख (१९) या दोघांनी दिलेल्या माहितीवरून रेल्वे पोलिसांनी अर्जुन ऊर्फ पवण्या परदेसी (२०), किशोर नंदू सोनवणे (२५) या आणखी दोन आरोपीना अटक केली. उर्वरित ४ आरोपीचा शोध घेण्यासाठी ४ पथके तैनात आहेत. हे सर्व दरोडेखोर नशेखोर असून, गुन्हा घडला त्यावेळी सगळेजण नशेत धुंद असल्याचे पोलिसांनी सांगितले. या आरोपींना कल्याण रेल्वे न्यायालयात हजर केले असता त्यांना १६ ऑक्टोबरपर्यंत पोलिस कोठडीत ठेवण्याचे आदेश दिल्याची माहिती लोहमार्ग पोलिस उपायुक्त मनोज पाटील यांनी दिली. दरोडेखोरांनी चाकू, फायटरचा धाक दाखवत मोबाइल आणि ब्लु टूथ मागितले. ते देण्यास नकार देताच त्यांनी आपल्याला मारून गाडीतून बाहेर फेकले. पण गाडी जवळपास थांबल्याने मी वाचलो आणि दुसऱ्या दरवाजाने धावत जाऊन पुन्हा गाडीत चढलो. त्यांनी पट्ट्याने माझ्या डोक्यावर मारहाण करत माझ्याकडील मोबाइल, पैसे काढून घेतले, असे अंकुशकुमार या प्रवाशाने सांगितल. तर माझ्याकडे असलेले पाच हजार काढून घेत मला मारहाण केली. त्यांच्याकडे हत्यारे असल्याने मी विरोध करू शकलो नाही, असे मुस्ताक अली यांनी सांगितले.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/2YxjYe1
No comments:
Post a Comment