म. टा. प्रतिनिधी, सध्या देशभरातील वीजउत्पादन कंपन्यांकडे ७२ लाख टन साठा आहे. हा कोळसा चार दिवस पुरेल इतका आहे. पण लिमिटेडकडे ४०० लाख टनांचा साठा शिल्लक आहे. तो लवकरच वीजउत्पादन कंपन्यांपर्यंत पोहोचवला जाईल, असे केंद्रीय कोळसा मंत्रालयाने म्हटले आहे. दरम्यान, राजधानी दिल्लीसह अनेक राज्यांनी कोळसाटंचाईची धास्ती घेतली असताना, कोळसा मंत्रालयाने असा दावा केल्याने उलट-सुलट चर्चांना उधाण आले आहे. देशभरात निर्माण झालेल्या कोळसाटंचाईवर मात करण्याच्या दिशेने पावले उचलली जात आहेत. प्रामुख्याने पावसाळा सरत आल्याने कोळसाउत्पादन वाढते आहे. दररोज तीन लाख टन अधिक कोळसा वीज कंपन्यांना पुरवला जाईल व ऊर्जा प्रकल्पांची मागणी पूर्ण केली जाईल, अशी ग्वाही कोळसा मंत्रालयाने जारी केलेल्या निवेदनात देण्यात आली आहे. यंदा देशभरात पाऊस दमदार असतानादेखील कोल इंडिया लिमिटेडने २२५ लाख टन कोळसा ऊर्जा कंपन्यांना पुरवला. मागील वर्षीपेक्षा त्यात २४ टक्के वाढ झाली आहे. या सर्व स्थितीत कोळसा अभावामुळे देश अंधारात जाईल ही भीती अनाठायी आहे, असेही मंत्रालयाने म्हटले आहे. देशभरातील कोळसा खाण क्षेत्रातील पावसाळा आता सरू लागला आहे. त्यामुळे उत्पादन सातत्याने वाढते आहे. त्यामुळे मागील दोन दिवसांत दररोज होणारे १४ लाख टनांचे उत्पादन आता १५ लाख टनांवर नेण्यात आले आहे. पुढील तीन दिवसांत ते १७ लाख टनांवर नेले जाईल, अशी हमीदेखील कोळसा मंत्रालयाने दिली आहे. राज्यातील १३ संच बंद चंद्रपूर : सण, उत्सव, ऑक्टोबर हिटच्या पार्श्वभूमीवर विजेची मागणी वाढली आहे. पण कोळसाटंचाईचे संकट गडद झाले असून वीज भारनियमन टाळण्यासाठी महावितरणचे शर्थीचे प्रयत्न सुरू आहेत. कोळशाअभावी राज्यातील वीजनिर्मिती केंद्रांतील १३ संच बंद पडले आहेत. त्यामुळे तब्बल तीन हजार ३३० मेगावॅट विजेचा पुरवठा ठप्प पडला आहे. विजेची ही तूट भरून काढण्यासाठी तातडीच्या वीजखरेदीसह जलविद्युत व अन्य स्त्रोतांकडून वीजपुरवठा उपलब्ध करण्याचे प्रयत्न सुरू आहेत. कमी वीजवापराचे आवाहन मुंबई : कोळसाटंचाईमुळे निर्माण झालेल्या स्थितीत वीजपुरवठा मर्यादित झाला असून, यामुळे वीज वाचवणे आवश्यक आहे. मागणी व उपलब्धता यांमध्ये समतोल राखण्यासाठी ग्राहकांनी सकाळी ६ ते १० व सायंकाळी ६ ते रात्री १० पर्यंत विजेचा वापर काटकसरीने करावा, असे आवाहन महावितरणने केले आहे. विजेची तूट भरून काढण्यासाठी महावितरणला सध्या नाईलाजास्तव महागड्या दराने वीजखरेदी करावी लागत आहे. सिसोदियांची केंद्रावर टीका नवी दिल्ली : 'कोळशाचा तुटवडा आहे, ही बाब स्वीकारण्यास केंद्र सरकार तयार नाही. तसेच प्रत्येक समस्येकडे डोळेझाक करण्याचे सरकारचे धोरण देशासाठी घातक ठरू शकते,' अशी टीका दिल्लीचे उपमुख्यमंत्री मनीष सिसोदिया यांनी रविवारी केली. 'कोळशाचा तुटवडा नसून, मुख्यमंत्री अरविंद केजरीवाल यांनी या विषयावर पंतप्रधान नरेंद्र मोदी यांना पत्र लिहू नये, असे केंद्रीय मंत्री आर. के. सिंह यांनी रविवारी सांगितले. केंद्रीय कॅबिनेट मंत्र्यांनी अशी बेजबाबदार भूमिका घेतली हे दुःखद आहे,' असेही सिसोदिया यांनी पत्रकार परिषदेत सांगितले. वीजवापरात ७.२ कोटी युनिटची घट नवी दिल्ली : विजेचा वापर शनिवारी सुमारे दोन टक्क्यांनी किंवा ७.२ कोटी युनिटने घटून ३८२.८ कोटी युनिटवर आला. शुक्रवारी हा वीजवापर ३९० कोटी युनिट इतका होता. यामुळे कोळशाच्या तुटवड्यादरम्यान देशभरातील वीजपुरवठ्यात सुधारणा झाली, असे वीज मंत्रालयाने जाहीर केलेल्या आकडेवारीतून स्पष्ट होत आहे.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/3ltzzDX
No comments:
Post a Comment