म.टा. प्रतिनिधी, नागपूर/मुंबई सीबीआय तपासाचा अहवाल लीक झाल्याप्रकरणात केंद्रीय अन्वेषण विभागाच्या (सीबीआय) पथकाने माजी गृहमंत्री अनिल देशमुख यांच्या सिव्हिल लाइन्समधील निवासस्थानावर सोमवारी पुन्हा छापा टाकला. पथकाने तब्बल नऊ तास निवासस्थानाची झाडाझडती घेतली. सूत्रांनी दिलेल्या माहितीनुसार, १०० कोटी वसुली प्रकरणातील तपासाचा अहवाल सप्टेंबरमध्ये लीक झाला. देशमुख यांच्या वकिलाने सीबीआयचे उपनिरीक्षक अभिषेक तिवारी यांना महागडा आयफोन भेट दिला होता. त्याबदल्यात तिवारी यांनी सीबीआयचा अहवाल लीक केल्याची चर्चा होती. या अहवालात देशमुख यांना क्लीनचिट देण्यात आल्याचे नमूद होते. या अहवाल लीक प्रकरणाची गंभीर दखल घेत सीबीआयने वकील व उपनिरीक्षकाविरुद्ध गुन्हा दाखल केला. या प्रकरणाच्या तपासासाठी सोमवारी सकाळी ७ वाजताच्या सुमारास दिल्लीहून आलेल्या सहा जणांच्या पथकाने सर्च वॉरंटसह देशमुखांच्या निवासस्थानी छापा टाकला. यावेळी देशमुख यांच्या कुटुंबातील सदस्य घरी नव्हते. केवळ कर्मचारीच होते. सहा जणांचे पथक घराची झाडाझडती घेत असतानाच नागपुरातील सीबीआयच्या तीन सदस्यांचे पथकही तेथे धडकले. नऊ जणांच्या दोन पथकांनीही नऊ तासांपर्यंत संपूर्ण निवासस्थानाची झाडाझडती घेतली. दुपारी ४ वाजताच्या सुमारास सीबीआयचे पथक निवास्थानाहून बाहेर निघाले. यावेळी पत्रकारांनी पथकातील सदस्यांशी बोलण्याचा प्रयत्न केला. मात्र, काहीही सांगण्यास नकार देत पथक दोन वाहनांनी कार्यालयाकडे रवाना झाले. मुंबईचे माजी पोलिस आयुक्त परमबीरसिंग यांनी अनिल देशमुख यांनी १०० कोटी रुपयांची वसुली केल्याचे आरोप केल्यानंतर हे प्रकरण सीबीआयकडे गेले. सीबीआयने गुन्हा दाखल करून तपास सुरू केला. सीबीआय, प्राप्तिकर विभाग व सक्तवसुली संचालनालयाच्या पथकाने वेळोवेळी देशमुखांच्या निवास्थानी छापे टाकले. राष्ट्रवादीची निदर्शने सीबीआयने देशमुख यांच्याकडे छापा टाकल्याचे कळताच राष्ट्रवादी काँग्रेसचे पदाधिकारी व कार्यकर्ते सकाळी ११ वाजता जीपीओ चौकात जमले. सीबीआयच्या कारवाईचा विरोध करीत पदाधिकारी व कार्यकर्त्यांनी नारेबाजी केली. त्यामुळे तणाव निर्माण झाला. माहिती मिळताच सीताबर्डी पोलिस स्टेशनचे वरिष्ठ पोलिस निरीक्षक अतुल सबनीस यांच्यासह पोलिसांचा ताफा तेथे पोहोचला. पोलिसांनी शहराध्यक्ष दुनेश्वर पेठे, राष्ट्रवादी युवक काँग्रेसचे जिल्हाध्यक्ष शैलेंद्र तिवारी यांच्यासह १५ पदाधिकारी व कार्यकर्त्यांना ताब्यात घेतले.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/3AsnSSh
No comments:
Post a Comment