म. टा. प्रतिनिधी, अंधेरी, विलेपार्ले, जोगेश्वरी परिसरातील मलनिस्सारण वाहिन्यांवरील मॅनहोलची झाकणे चोरीला जाण्याचे प्रकार वाढले आहेत. त्यासंदर्भात महापालिका प्रशासनाने स्थानिक पोलिस ठाण्यांमध्ये अज्ञात व्यक्तींविरोधात चोरीचा गुन्हा दाखल केला आहे. सुमारे २० ते २५ झाकणे चोरीला गेली असून त्यांची किंमत अंदाजे अडीच ते तीन लाख रुपये इतकी आहे. पश्चिम उपनगरात पालिकेच्या के/पूर्व विभागांतर्गत अंधेरी पूर्व, विलेपार्ले पूर्व व जोगेश्वरी पूर्व परिसरात मलनिस्सारण वाहिन्यांचे जाळे उभारण्‍यात आले आहे. स्वच्छता व नियमित तपासणी करण्यासाठी वाहिन्यांना ठराविक अंतरावर मॅनहोल आणि त्यावर झाकण बसवण्यात आली आहेत. प्रत्येक वाहिनी १५ ते २५ फूट खोल असल्‍यामुळे चांगली सुरक्षितता असावी यासाठी मॅनहोलची झाकणे ही लोखंडी आणि मजबूत स्वरूपाची असतात. एका झाकणाची किंमत अंदाजे बारा हजार रुपये इतकी आहे. झाकणे चोरीचे प्रकार वाढल्याने अखेरीस संबंधित परिसरातील सीसीटीव्ही फुटेज प्राप्त करून त्या आधारे अंधेरी एमआयडीसी व सहार पोलिस ठाण्यात गुन्हा दाखल केल्याची माहिती पालिकेच्या वतीने देण्यात आली. के/पूर्व विभागात वेगवेगळ्या परिसरात असलेल्या मलनिस्सारण वाहिन्यांवरील लोखंडी झाकणांना चोरट्यांनी लक्ष्‍य बनविले आहे. मागील काही दिवसांपासून अंधेरी, विलेपार्ले, जोगेश्वरी परिसरात मिळून सुमारे २० ते २५ झाकणे चोरीला गेली आहेत. विशेषतः अंधेरी एमआयडीसी परिसरात अधिक संख्येने झाकणे चोरीला गेली आहेत. या झाकणांची चोरी पहाटेच्या सुमारास करण्यात येत असल्याचे पालिकेच्या निदर्शनास आले आहे. मॅनहोल उघडे राहिल्‍यास एखादी व्यक्ती पडून अथवा धावत्या वाहनाचे चाक अडकून अपघात होण्‍याची शक्‍यता असते. त्यामुळे मॅनहोलवर झाकण नसल्याचे आढळताच नवीन झाकण लावण्याची कार्यवाही प्रशासनाकडून त्वरित करण्यात येते. मात्र, झाकणे वारंवार गायब होत असल्याने हा चोरीचा प्रकार असल्याचे लक्षात आले. संबंधित स्थानिक पोलिस ठाण्‍यांना वेळोवेळी पत्राद्वारेदेखील कळविण्‍यात आले आहे.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/3Ba98b5
No comments:
Post a Comment