करदात्यांना नववर्षाची भेट! आता १ जानेवारीपासून मालमत्ता आकारणी रिजस्टर ऑनलाइन होणार, जाणून घ्या प्रक्रिया https://ift.tt/YgympHc

पिंपरी : पिंपरी-चिंचवड महापालिकेच्या कर संकलन विभागाच्या माध्यमातून एक जानेवारीपासून मालमत्ता आकारणी रजिस्टर (असेसमेंट रजिस्टर) ऑनलाइन करण्यात येत आहे. तसेच या वर्षात होणाऱ्या सर्व नोंदी फक्त ऑनलाइन केल्या जाणार आहेत. त्याच प्रमाणे एक जानेवारीपासून मिळकत कर उतारादेखील ऑनलाइन काढण्याची सुविधा देण्यात आली आहे. या सुविधा म्हणजे करदात्यांना नववर्षाची भेट ठरणार आहे.पिंपरी-चिंचवड शहरामध्ये सध्या सहा लाख १५ हजार विविध मालमत्ता आहेत. या मालमत्ताधारकांना कर आकारणी व करसंकलन विभागामार्फत कराची आकारणी व वसुलीची कार्यवाही करण्यात येते. यासाठी १७ विभागीय करसंकलन कार्यालये कार्यरत आहेत. मालमत्ता धारकांना विविध शासकीय कामांसाठी मालमत्ता कर उतारा लागतो. हा उतारा काढण्यासाठी यापूर्वी नागरिकांना प्रत्यक्ष कर संकलन कार्यालयात जावे लागायचे. त्यानंतर मालमत्ता आकारणी पुस्तकात उतारे शोधावे लागत होते. त्यानंतर हा उतारा हस्तलिखित स्वरूपात दिला जात होता. यासाठी विलंब लागत होता. आज एक जानेवारीपासून सर्व प्रक्रिया ऑनलाइन करण्यात आली आहे. एक जानेवारीनंतर ज्यांची ऑनलाइन नोंदणी होणार आहेत, त्यांना तो उतारा तत्काळ मिळेल. यासाठी नाममात्र २० रुपये शुल्क भरावे लागणार आहे. ३१ डिसेंबर २०२३ पूर्वीच्या नोंदी नोंद वहीमध्ये नोंदविलेल्या असल्याने संबंधित मालमत्ताधारकांना मालमत्ता उतारा या टॅबवर क्लिक केले, की त्याचा तपशील संबंधित झोन कार्यालयाकडे वर्ग केला जाईल. त्यानंतर संबंधित गट लिपिक असेसमेंट रजिस्टरमधील त्या मालमत्तेच्या नोंदी कॉप्युटरमध्ये नोंदवतील. त्यानंतर संबंधित मालमत्ता धारकांना ई-मेल आणि मोबाइलवर लिंक पाठविण्यात येईल. या लिंकवर क्लिक केल्यावर दाखला मिळेल. अथवा महापालिकेच्या वेबसाइटवरही ऑनलाइन दाखला मिळेल. त्यामुळे एक जानेवारीपासून ऑफलाइन सुविधा बंद करण्यात येणार आहे.‘आम्ही वर्षभरात असेसमेंट रजिस्टर, मालमत्तेची मूळ फाइल अशा जुन्या सर्व अभिलेखांचे स्कॅनिंग आणि डिजिटायझेशन करणार आहोत. हे सर्व अभिलेख संबंधित मालमत्तेला जोडले जातील. त्यामुळे संबंधित मालमत्ताधारकाला त्याचे सर्व अभिलेख घरबसल्या एका क्लिकवर उपलब्ध होतील,’ असे महापालिका आयुक्त शेखर सिंह यांनी सांगितले. अशी असेल प्रक्रिया...महापालिकेच्या वेबसाइटवर जाऊन कर आकारणी व कर संकलन विभागाचा पर्याय निवडावा.यामध्ये मोबाइल क्रमांक किंवा मालमत्ता क्रमांक टाकल्यास त्यामध्ये वेगवेगळे पर्याय दिसतील.मालमत्ता कर उतारा हा पर्याय निवडावा. त्यानंतर फक्त क्लिक करा आणि मालमत्ता कर उतारा मिळवा.ही प्रक्रिया ओटीपी आधारित असल्याने नागरिकांना त्यांच्या मालमत्तेला आपला मोबाइल क्रमांक लिंक करावा लागेल.आतापर्यंत सुमारे साडेचार लाख मालमत्तांना मोबाइल नंबर लिंक केले आहेत. उर्वरित मालमत्ता धारकांनीही आपले मोबाइल नंबर आपल्या मालमत्तेला लिंक करण्याचे आवाहन पालिकेने केले आहे.कर संकलन विभाग आणि दुय्यम निबंधक कार्यालये यांच्या डेटाबेसचे इंटेग्रेशन करणार आहोत. त्यामुळे खरेदी खत, बक्षिसपत्र, इच्छापत्र याद्वारे मालमत्तांचे होणारे हस्तांतरण करण्यासाठी मालमत्ता धारकांना आता अर्ज करण्याची गरजही राहणार नाही. मालमत्तेच्या नावात तत्काळ बदल होणार आहे, असे महापालिका आयुक्त शेखर सिंह यांनी सांगितले. आयुक्त शेखर सिंह यांचा दृष्टिकोन आणि अतिरिक्त आयुक्त प्रदीप जांभळे पाटील यांच्या मार्गदर्शनाखाली कर संकलन विभाग हायटेक करण्याचे काम वेगाने चालू आहे. याचा लाभ मालमत्ताधारकांना व्हावा, त्यांची कामे सुलभ आणि जलद गतीने व्हावीत हे आमचे प्रमुख उद्दिष्ट आहे, असे कर संकलन विभाग सहायक आयुक्त निलेश देशमुख यांनी सांगितले

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/uQJD6es