वृत्तसंस्था, चंडीगड : देशभरातील शेतकऱ्यांनी सहा मार्च रोजी आंदोलनासाठी दिल्लीत पोहोचावे; तसेच या आंदोलनाला पाठिंबा देण्यासाठी १० मार्चला चार तासांचे देशव्यापी ‘रेल रोको’ करावे, असे आवाहन शेतकरी नेते सरवनसिंग पंधेर आणि जगजितसिंग डल्लेवाल यांनी रविवारी केले. यामुळे किमान आधारभूत किंमतीची (एमएसपी) कायदेशीर हमी आणि कृषी कर्जमाफीसह अन्य मागण्यांसाठी सध्या सुरू असलेल्या शेतकऱ्यांच्या ‘’ आंदोलनाची व्याप्ती वाढण्याची शक्यता आहे.पंधेर आणि डल्लेवाल हे खनौरी येथे हरियाणाच्या सुरक्षा कर्मचाऱ्यांशी झालेल्या संघर्षात मृत्यू झालेल्या शेतकऱ्याच्या भटिंडा जिल्ह्यातील बल्लोह या मूळ गावात आले होते. या वेळी देशव्यापी आंदोलनाची हाक दिली. ‘दिल्ली चलो’ आंदोलन अधिक तीव्र केले जाईल. तसेच सरकारकडून मागण्या पूर्ण होईपर्यंत ते सुरूच राहील, असेही या दोन्ही नेत्यांनी स्पष्ट केले.‘पाठिंबा देत राहणार’पंजाब आणि हरियाणातील शेतकरी शंभू आणि खनौरी सीमेवर सुरू असलेल्या आंदोलनाला पाठिंबा देत राहतील; तर इतर राज्यांतील शेतकरी आणि शेतमजुरांनी सहा मार्च रोजी दिल्लीत पोहोचून या आंदोलनाच्या समर्थनार्थ राजधानीत आंदोलन करावे, असा निर्णय शेतकरी संघटनांनी घेतला आहे.‘ट्रॅक्टर ट्रॉलीतून दिल्लीला पोहोचू न शकणाऱ्या दूरच्या राज्यांतील शेतकऱ्यांनी रेल्वे किंवा वाहतुकीच्या अन्य मार्गांनी राजधानीत जावे. यातून ट्रॅक्टरशिवाय येणाऱ्या शेतकऱ्यांना सरकार प्रवेश देते का, हेदेखील स्पष्ट होईल. शंभू व खनौरी येथील आंदोलन पूर्वीसारखेच सुरू राहील व ते आणखी तीव्र केले जाईल. मागण्या मान्य होईपर्यंत आंदोलन सुरूच राहील,’ असे पंधेर म्हणाले. ‘पंजाबमधील सर्व पंचायतींनी शेतकऱ्यांच्या मागण्यांच्या समर्थनार्थ ठराव मंजूर करायला हवेत. तसेच प्रत्येक गावातून किमान एक ट्रॅक्टर आंदोलनासाठी सीमेवर पोहोचायला हवा,’ अशी अपेक्षाही त्यांनी व्यक्त केली.‘हक्कासाठी लढत राहू’‘सध्या सुरू असलेले आंदोलन हे केवळ पंजाब व हरियाणा ही दोन राज्ये आणि दोन संघटनांचेच असल्याचा केंद्र सरकारचा समज आहे. मात्र, देशभरातील २००हून अधिक संघटना या दोन प्रमुख संघटनांचा भाग आहेत, हे आम्ही सांगू इच्छितो,’ असे पंधेर म्हणाले; तसेच सरकारला शेतकऱ्यांच्या प्रश्नांचे निराकरण करण्यात स्वारस्य नसल्याचा आरोपही त्यांनी या वेळी केला. ‘शेतकरी व शेतमजूर सरकारच्या अजेंड्यावर नाहीत. निवडणुकीची आचारसंहिता लागू झाल्यावर आंदोलन संपुष्टात येईल, असा त्यांचा समज आहे. मात्र, आम्ही आमच्या हक्कासाठी लढत राहू,’ असा इशारा पंधेर यांनी दिला. भारताने जागतिक व्यापार संघटनेच्या (डब्ल्यूटीओ) करारातून बाहेर पडावे, या मागणीचा पुनरुच्चारही त्यांनी याप्रसंगी केला.देशव्यापी ‘रेल रोको’‘शेतकऱ्यांच्या मागण्या मान्य करण्यासाठी सरकारवर दबाव आणण्याकरिता ‘दिल्ली चलो’ आंदोलनाची व्याप्ती वाढवण्याचा निर्णय घेण्यात आला आहे. त्यासाठी देशभरातील शेतकरी आणि मजुरांना ‘रेल रोको’चे आवाहन करण्यात आले आहे. त्यानुसार १० मार्च रोजी दुपारी १२ ते ४ या वेळेत देशभर हे आंदोलन करण्यात येईल,’ अशी माहिती सरवनसिंग पंधेर यांनी दिली.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/CjVf9zr
No comments:
Post a Comment