म. टा. विशेष प्रतिनिधी, मुंबई शिवसेना आणि भाजपमधील संघर्ष दिवसेंदिवस वाढीस लागत असून, मुंबई पालिकेतही त्याचे पडसाद उमटत आहेत. स्थायी समिती अध्यक्ष यांचे एका कंत्राटदाराबरोबर फोनवरून झालेल्या कथित संभाषणाची क्लिप व्हायरल झाली. त्यावरून स्थायी समिती बैठकीत मुद्दा उपस्थित झाला आणि त्यानंतर सेना-भाजपमध्ये तुफान शाब्दिक चकमक उडाली. स्थायी समिती सभागृहांच्या दालनासमोर नगरसेवकांनी ठिय्या देऊन निषेध आंदोलन केले. तर, त्यास सेनेच्या सदस्यांनीही प्रत्युतर दिले. काही वेळ निर्माण झालेला हा तणाव कालांतराने निवळला, तरीही त्यातील धग कायम राहिली आहे. मुंबई पालिकेत शिवसेना-भाजपमधून विस्तव जात नसून, शुक्रवारच्या स्थायी समिती बैठकीतही त्याचा पुन्हा प्रत्यय आला. स्थायी समिती अध्यक्ष यशवंत जाधव यांनी ई वॉर्डातील कंत्राट मागे घेण्याबाबत कंत्राटदारास धमकावल्याच्या कथित संभाषणाची क्लिप व्हायरल झाली होती. यासंदर्भात, संबंधित कंत्राटदाराने पालिका, पोलिस आयुक्तांकडे तक्रारी दाखल केल्या आहेत. स्थायी समिती अध्यक्षांनी कंत्राटदारांना धमकाविणे शोभत नसल्याचा मुद्दा उचलत भाजप सदस्य आक्रमक झाले. शुक्रवारच्या स्थायी समितीत भाजपकडून त्यावर हरकतीचा मुद्दा उपस्थित केला जाणार होता. पण बैठकीत जाधव यांनी भाजपच्या मुद्द्याकडे दुर्लक्ष करत सभा संपल्याचे जाहीर केले. याच्या निषेधार्थ सभागृह नेते प्रभाकर शिंदे यांच्यासह इतर भाजप सदस्यांनी घोषणाबाजी करत स्थायी समिती अध्यक्ष जाधव यांचा निषेध केला. सभागृहातून बाहेर पडत संतापलेल्या भाजप नगरसेवकांनी अध्यक्षांच्या दालनासमोर ठिय्या आंदोलन सुरू करत जोरदार घोषणाबाजी केली. काही वेळाने शिवसेनेच्या नगरसेवकांनी भाजप नगरसेवकांसमोर येत जोरदार घोषणाबाजी केली. स्थायी समिती अध्यक्षांच्या दालनासमोर भाजप-शिवसेनेनेचे नगरसेवक समोरासमोर आले. जोरदार घोषणाबाजी, शाब्दिक चकमक झाल्याने वाद शिगेला पोहचला. अखेर स्थायी समिती अध्यक्ष तेथे आले आणि त्यांनी दरवाजा अडवून बसू नका, तर दालनात येऊन चर्चा करा, असे भाजपच्या नगरसेवकांना सांगितले. सभागृह नेत्या विशाखा राऊत यांनीही दालनात येऊन चर्चा करण्याबाबत विनंती केली. त्यानंतर भाजपच्या नगरसेवकांनी आंदोलन स्थगित केले. मात्र, पुढील स्थायी समितीच्या बैठकीत याबाबत हरकतीचा मुद्दा उपस्थित केला जाणार असल्याचे शिंदे यांनी सांगितले. त्यामुळे हा वाद चिघळण्याची शक्यता आहे. ' बंद करण्यासाठी...' ई-टेंडर बंद करण्यासाठी हा प्रयत्न सुरू असल्याची टीका शिंदे यांनी केली आहे. ई-टेंडर पारदर्शी पद्धत असल्याने ही पद्धत संपुष्टात आणण्यासाठी कंत्राटदाराला धमकावले जात आहे. यावेळी जाधव यांनी अरेरावीची भाषा वापरली असून त्याचा निषेधही शिंदे यांनी केला आहे.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/3lGcomB
No comments:
Post a Comment