चंद्रपूर जिल्ह्यात दारूबंदी नावालाच; छुपी विक्री सुरूच https://ift.tt/3dkS6Ny

पंकज मोहरीर,चंद्रपूर जिल्ह्यात लागू होऊन सहा वर्षे पूर्ण होत आहे. एक एप्रिल २०१५ पासून अंमलबजावणी सुरू झाल्यानंतर जिल्ह्यात ११५ कोटी ७२ लाख २७ हजार १२३ रुपयांहून जास्त दारूसाठा जप्त केला. तर कोट्यवधी रुपयांची दारू विकली गेली. जिल्ह्यात दारूबंदी नावालाच असल्याचे चित्र आहे. दारूबंदीच्या अंमलबजावणीपेक्षा बंदी उठविण्याबाबतच अधिक चर्चा होत आहे. दारूबंदीचा निर्णय घेण्यासाठी ५२५ ग्रामपंचायती, ग्रामसभा व जिल्हा परिषदेने प्रस्ताव पारित केले होते. त्यांच्या प्रस्तावांना कायदेशीर मान्यता व मूल्य आहे. या निर्णयाने जिल्ह्यातील मद्याच्या विक्रीवर, खरेदी, उत्पादन आणि सेवन यावर तत्काळ बंदी आली. त्यावर विचार होत तत्कालीन फडणवीस सरकारने चंद्रपूर जिल्ह्यात दारूबंदीचा निर्णय जाहीर केला. दारूबंदीची अंमलबजावणी सुरू झाली. चंद्रपूर जिल्ह्यात दारूबंदी झाल्यानंतर त्याचे सकारात्मक परिणाम झाल्याची माहिती समोर आली होती. कौटुंबिक हिंसाचाराच्या घटनेसह अपघातांच्या प्रकरणातही घट झाली. दारूबंदीची प्रभावी अंमलबजावणी करताना २०१८ मध्ये ऐन दिवाळीत जिल्ह्यात धक्कादायक घटना घडली होती. त्यात पोलिस उपनिरिक्षक छत्रपती चिडे यांना आपला जीव गमवावा लागला होता. राज्यात महाविकास आघाडीचे सरकार आल्यावर राज्याचे मदत व पुनर्वसन मंत्री व जिल्ह्याचे पालकमंत्री यांनी दारूबंदीवर प्रश्नचिन्ह उपस्थित केले. जिल्ह्यातील दारूबंदीचा सर्वकष विचारविनिमय व अभ्यास करून शासनास शिफारस करण्यासाठी गृहविभागाने उच्चस्तरीय समिती स्थापन केली. सेवानिवृत्त माजी प्रधान सचिव रमानाथ झा यांच्या अध्यक्षतेखाली गठीत करण्यात आलेल्या या समितीत १३ सदस्यांचा समावेश होता. या समितीने आपला अहवाल मार्चच्या दुसऱ्या आठवड्यात राज्य शासनाला सादर केला आहे. मात्र अद्याप तो मंत्रिमंडळासमोर आलेला नसून त्यात नेमके काय आहे हे गुलदस्त्यातच आहे. दरम्यान, चंद्रपूर जिल्ह्यातील दारूबंदी हटविण्याचा निर्णय घेण्याबाबतीत चर्चा सुरू असली, तरी सध्याची सरकारची स्थिती बघता राष्ट्रवादी काँग्रेसचे ज्येष्ठ नेते या विरोधात असल्याचे मानले जाते. त्यांना सामाजिक कार्यकर्त्यांचा विरोध पत्करायचा नाही. दारूबंदीची प्रभावी अंमलबजावणी करण्यासाठी कडक कायदे करण्यासाठी ते आग्रह धरू शकतात. बंदी हटविण्याची नेत्यांनाच घाई ! चंद्रपूर जिल्ह्यातील दारूबंदी सपशेल अपयशी असल्याचे भासवत जिल्ह्यातीलच काही नेत्यांनी यास विरोध दर्शविला आहे. या नेत्यांना दारूबंदी हटविण्याची घाई झाली आहे. दारूबंदीची अंमलबजावणीच योग्य पद्धतीने झाली नाही. दारूबंदीबाबत कुठलाही निर्णय घेण्यापूर्वी समस्येचे मूळ शोधावे, असे आवाहन ज्येष्ठ सामाजिक कार्यकर्ते डॉ. अभय बंग यांनी यांनी अलीकडेच केले आहे. पत्राद्वारे त्यांनी या मुद्याकडे राज्य सरकारचे लक्ष वेधले आहे. तर दारूबंदी व व्यसनमुक्ती या दोन्ही एकाच नाण्याच्या दोन बाजू आहे. दोन्ही आवश्यक असून त्यासाठी सरकार व समाजातून विचार व कृती करणे गरजेचे असल्याचे मत सामाजिक कार्यकर्त्या ॲड.पारोमिता गोस्वामी यांनी व्यक्त केले आहे. दारूबंदीची कारवाई (डिसेंबर २०२० पर्यंत) - ४३ हजार ९०३ गुन्हे दाखल - ४६ हजार ९३९ आरोपींना अटक - ११५ कोटी ७२ लाख २७ हजार १२३ रुपयांचा दारूसाठा जप्त

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/3dqhKAs