: टोकियो : अर्जेंटिनाची तलवारपटू मारिया बेलेन मॉरिस सोमवारी (26 जुलै) टोकियो ऑलिम्पिकच्या महिला गटातील पहिल्या फेरीतून बाहेर पडली. पराभव पत्करावा लागल्यानंतरही मारियाच्या वाट्याला हास्याचे क्षण आले. कारण मारियाने सामना गमावल्यानंतर तिचे प्रशिक्षक लुकास सॉसेडोने तिला प्रपोज करत लग्नाची मागणी घातली. 36 वर्षीय मारिया सामना संपल्यानंतर एका माध्यमसंस्थेशी सामन्याविषयी बोलत होती, तेव्हा तिचे प्रशिक्षक सॉसेडो तिथे आले आणि तिला प्रपोज केलं. द गार्डियनने दिलेल्या वृत्तानुसार प्रशिक्षक लुकास सॉसेडो हातात एक पेपर घेऊन उभा होता. यावर त्याने लिहिले होते की, 'तू माझ्याशी लग्न करशील का?' त्यानंतर मारियाने आनंदाने होकार देत आलिंगन दिलं. द गार्डियनने मॉरिसच्या हवाल्याने सांगितलं आहे की, मुलाखतदाराने मला पाठीमागे वळायला सांगितलं आणि तिथं लुकास हातात पत्र घेऊन उभा होता. मी सर्वकाही विसरले होते. आम्ही खूप आनंदी आहोत तसेच खूप चांगले साथीदारही आहोत. नक्कीच, आमच्यात भांडणे होतात, पण एकमेकांसोबत वेळ घालवायला आम्हाला आवडते. आम्ही एकमेकांवर खूप प्रेम करतो आणि आम्हाला आयुष्य एकमेकांसोबत घालवायचं आहे. मारियाला प्रपोज केल्यानंतर प्रशिक्षक लुकास म्हणाले की, 'मी तिच्यावर प्रेम करतो. जेव्हा ती सामना हरली, तेव्हा ती खूप दुःखी झाली होती. कदाचित या माझ्या प्रस्तावाने तिची मानसिकता बदलेल. जर ती जिंकली असती, तर मी या क्षणाची आणखी वाट पाहणार होतो.' मारिया आणि लुकास हे तलवारबाजीमुळे एकमेकांना भेटले. प्रशिक्षक होण्यापूर्वी लुकासने तलवारबाजीत अर्जेंटिनाचे प्रतिनिधीत्व केले होते. त्यांनी मारियाला तलवारबाजीचे धडे दिले. हळूहळू त्यांच्यात प्रेम फुलले आणि ते एकमेकांना डेट करू लागले. त्यामुळे ऑलिम्पिकमध्ये आज अशी एक भन्नाट गोष्ट पाहायला मिळाली. आज हा व्हिडीओ क्रीडा चाहत्यांना चांगलाच पसंतीस पडला आहे, त्यामुळे हा व्हिडीओ चांगलाच व्हायरल झाला आहे. चाहत्यांनी या व्हिडीओचा आनंद लुटल्याचे पाहायला मिळाले आहे.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/3zKCADV
No comments:
Post a Comment