म. टा. विशेष प्रतिनिधी, मुंबई स्वच्छ ठेवण्यासाठी राबणाऱ्या पालिकेच्या सफाई कर्मचाऱ्यांना लवकरच स्वतःच्या हक्काची १,३८६ घरे मिळणार आहेत. त्यासाठी पालिकेने 'आश्रय' योजनेतून ४१५ कोटी रुपयांची योजना आखली आहे. ही सर्व घरे पूर्व उपनगरांत बांधली जाणार आहेत. मुंबई पालिकेच्या घनकचरा व्यवस्थापन खात्यातील सफाई कामगार हे दोन पाळ्यांमध्ये सेवा बजावतात. त्यामुळे हे कामगार ज्या ठिकाणी काम करतात त्याच भागात घरे उपलब्ध होण्यासाठी पालिकेचे प्रयत्न सुरू आहेत. सद्यस्थितीत पालिका सफाई कामगारांच्या शहर आणि उपनगरांत मिळून ४६ वसाहती आहेत. त्यातील, २८,६१८ कामगारांपैकी ५,५९२ कामगारांना सेवा निवासस्थाने देण्यात आली आहेत. १९६२पासूनच्या या चाळ, इमारतींमध्ये घरांचे क्षेत्रफळ सुमारे १५० चौरस फूट आहे. ही जागा अपुरी ठरत असल्याने पालिकेने पुनर्विकास योजनेवर भर दिला आहे. पालिकेच्या योजनेनुसार १,२७० घरे ही प्रत्येकी ३०० चौरस फुटांची आणि ११६ घरे ही ६०० चौरस फुटांची असतील. त्यासाठी पालिकेकडून सुमारे ४१५ कोटी खर्च करण्यात येणार आहेत. पुनर्विकास योजना अंमलात आणताना पालिकेकडून या कामगारांना पर्यायी व्यवस्था दिली जाणार आहेत. त्यासाठी दोन पर्याय आहेत. या कामगारांना चेंबूर येथील व्हिडीओकॉन अतिथीगृहाचा पर्याय देण्यात आला आहे. हा पर्याय नको असलेल्या कामगारांना घराची व्यवस्था स्वत: करावी लागेल. पालिकेने सफाई कामगाराच्या घरांसाठी ' कक्ष' तयार केला आहे. सध्याच्या ४६ पैकी ३४ वसाहतींचा पुनर्विकास आश्रय योजनेतून केला जाणार आहे. त्यासाठी ३३ (२०)नुसार कलम चार चटई क्षेत्राचा वापर करुन ३०० चौरस फुटांची घरे बांधली जातील. पुनर्विकासाचे स्वरूप देवनार येथील ४०१८ चौरस मीटर भूखंडावर सध्या ११६ घरे आहेत. तिथे ३०० चौरस फुटांची ३७३ आणि ६०० चौ. फुटांची ५० घरे बांधली जातील. चेंबूर वामनवाडी येथे ३४ घरे असून तिथे ३०० चौरस फुटांची ५१६ घरे बांधण्यात येतील. या ५६६ घरांसाठी सुमारे १७२ कोटी रुपये खर्च येणार आहे. घाटकोपर चिरागनगरमध्ये ८० घरे असून तिथे ३०० चौ. फुटांची ९० घरे बांधण्यात बांधली जातील. कुर्ला लायन्स गार्डन येथे ३०० चौ. फुटांची १५८ तर ६०० चौ. फुटांची ३१ घरे बांधण्यात येतील. आम्रपाली इमारत येथे ४८ घरे असून पुनर्विकासात ३०० चौ. फुटांची १०५ घरे बांधण्यात येतील. मुलुंड गायकवाड नगर येथे ८४ घरांकडे ३०० चौ. फुटांची ४०१ तर ६०० चौ. फुटांची ६६ घरे बांधली जातील. यासाठी २४३ कोटी रुपये खर्च होणार आहे.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/3zNtCp2
No comments:
Post a Comment