मुंबईकरांचा प्रवास सुकर होणार; मेट्रोची पहिल्या टप्प्यातील तपासणी पूर्ण https://ift.tt/REoSMnx

म. टा. प्रतिनिधी, मुंबई: आरे ते दहिसर पूर्व मेट्रो-७ मार्गिकेची मेट्रो रेल्वे सुरक्षा आयुक्तांनी (सीएमआरएस) शनिवारी आणि रविवारी पाहणी केली. स्थानके, रुळ यांच्या सुरक्षिततेची तपासणी सीएमआरएस पथकाकडून करण्यात आली. डी. एन. नगर ते दहिसर पूर्व मेट्रो-२ अ मार्गिकेची तपासणी बाकी असून या दुसऱ्या टप्प्यातील तपासणीसाठी हे पथक पुन्हा मुंबईत येणार आहे, अशी माहिती अधिकाऱ्यांनी दिली. मुंबई महानगर प्रदेश विकास प्राधिकरणामार्फत (एमएमआरडीए) उभारण्यात येत असलेल्या मेट्रो-२ अ आणि मेट्रो-७ मार्गिकेची पहिल्या टप्प्यातील मार्गाची कामे पूर्ण झाली आहेत. सध्या मार्गिकेची सीएमआरएस पथकाकडून अंतिम टप्प्यातील तपासणी सुरू आहे. सीएमआरएस प्रमाणपत्र मिळताच हा मार्ग सुरू करण्यातील सर्व अडथळे दूर होणार आहेत. या मेट्रो मार्गिकेचा पश्चिम उपनगरातील नागरिकांना मोठा फायदा होणार आहे. पश्चिम रेल्वे आणि पश्चिम द्रुतगती महामार्गावरील कोंडी कमी होण्यास मदत मिळणार आहे. मेट्रोमधून सायकल घेऊन जाणे शक्य व्हावे, यासाठी गाडीच्या डब्यात सायकल आणि व्हीलचेअर ठेवण्यासाठी स्वतंत्र जागा देण्यात आली आहे. त्यामुळे नागरिकांना घरापासून मेट्रो स्थानकापर्यंत आणि मेट्रोतून उतरल्यानंतर कार्यालयापर्यंत सायकलवरून जाणे शक्य होणार आहे. तसेच 'मल्टी मॉडेल इंटिग्रेशन'अंतर्गत मेट्रो स्थानकाच्या परिसरात सायकल स्टँड उभारण्याचा एमएमआरडीएचा प्रयत्न असल्याचे महानगर आयुक्त एस. व्ही. आर. श्रीनिवास यांनी सांगितले. मेट्रो स्थानके अधिक पर्यावरणपूरक बनविण्याच्या दृष्टीनेही एमएमआरडीएकडून प्रयत्न सुरू आहेत. मेट्रो स्थानकांच्या आणि आगारांच्या छतांवर सौरऊर्जा संच बसवून वीजनिर्मिती करण्याचे उद्दिष्ट एमएमआरडीएने ठेवले आहे. मेट्रो-७ मार्गिकेवरील स्थानकांवर आणि आगारावर उभारण्यात येणाऱ्या सौरऊर्जा संचाद्वारे तीन मेगावॉट म्हणजेच वर्षाला ४९ लाख युनिट विजेची निर्मिती होण्याची अपेक्षा व्यक्त करण्यात आली. या माध्यमातून मेट्रो संचालनाव्यतिरिक्त स्थानकांवरील अन्य सुविधांसाठी वापरल्या जाणाऱ्या विजेच्या वापरात ३५ टक्क्यांनी घट होणार आहे. यातून मेट्रो संचालनाच्या खर्चातही बचत होणार असल्याचे अधिकाऱ्यांनी सांगितले. अशा असणार सुविधा - मेट्रोतून सायकल घेऊन जाण्याची सुविधा - महिलांसाठी स्वतंत्र डबा. - गर्दीत प्रवासी स्थानकावर पडून दुर्घटना होऊ नयेत, यासाठी प्लॅटफॉर्म वॉल. तसेच प्लॅटफॉर्म स्क्रीन डोअर स्वयंचलित पद्धतीने उघडणार. - मेट्रो स्थानकावर तिकीट ऑफीस मशिनद्वारे रोखीने अथवा यूपीआयचा वापर करून तिकीट मिळणार. - उच्च दर्जाची सुरक्षा आणि स्वयंचलित प्रणालीचा वापर. तसेच प्रत्येक डब्यात सीसीटीव्हीद्वारे नजर.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/xqOPCep