ओरिसातून छत्तीसगडमार्गे हत्ती थेट विदर्भात, मात्र गुजरातमध्ये स्थलांतरणाचा निर्णय; मुद्दा आता न्यायालयात पोहोचला! https://ift.tt/eM9cYE2

नागपूर : ओरिसातून छत्तीसगडमार्गे विदर्भातील गडचिरोलीत आलेल्या हत्तींच्या स्थलांतरणाला तेथील आदिवासियांनी विरोध केला आहे. हा मुद्दा आता मुंबई उच्च न्यायालयाच्या नागपूर खंडपीठापुढे आला आहे. वृत्तपत्रांमध्ये प्रकाशित झालेल्या बातम्यांची गंभीर दखल घेत न्यायालयाने याप्रकरणी स्वत:हून याचिका दाखल करवून घेतली आहे. 'महाराष्ट्र टाइम्स'ने याबाबत ३ सप्टेंबर रोजी वृत्त प्रकाशित केले होते, हे विशेष. गडचिरोली जिल्ह्यातील नागरिकांनी मोठ्या प्रमाणात विरोध केल्यानंतरही आलापल्ली लगत असलेल्या पातानील येथील हत्ती कॅम्पमधील तीन हत्ती मध्यरात्री जामनगरच्या दिशेने रवाना करण्यात आले आहेत. गेल्या वर्षभरापासून गडचिरोली जिल्ह्यातील कमलापूर आणि पातानील येथील हत्ती गुजरातच्या एका खाजगी प्राणी संग्रहालयामध्ये पाठवण्याचा निर्णय झाल्यापासून याबाबत नागरिकांमध्ये तीव्र संताप व्यक्त होत आहे. पर्यटकांसह नागरिकांनी मोठ्या प्रमाणात विरोधाची भूमिकाही घेतली होती, मात्र चार दिवसांपूर्वी याबाबत हालचाली सुरू झाल्या. आलापल्ली येथील वनविभागाला वरिष्ठ पातळीवरून एका पत्राद्वारे हत्ती हलवण्यासंदर्भात माहिती देण्यात आली होती. त्यानुसार १ सप्टेंबर रोजी मध्यरात्रीच्या आसपास खाजगी उद्योग समूहाद्वारे संचालित असलेल्या प्राणी संग्रहालयामध्ये हे हत्ती पाठवण्यात आले आहेत. जामनगर येथील राधाकृष्ण वेल्फेअर ट्रस्टच्या तीन विशेष वाहनांमधून या हत्तींना मध्यरात्री जामनगरच्या दिशेने पाठवण्यात आले. या संदर्भात समाज प्रसारमाध्यमांवर माहिती प्रसारित होताच नागरिकांमध्ये तीव्र संताप व्यक्त झाला. स्थानिक समाज माध्यमांमध्ये नागरिक याविरोधात आपली भूमिका व्यक्त करून सरकारवर रोष व्यक्त करत असल्याचं चित्र दिसून आले. वन विभागाला मिळालेल्या आदेशानुसार या भागातील एकूण आठ हत्ती जामनगरला पाठवायचे होते. त्यापैकी पातानील येथील तीन हत्ती मध्यरात्री पाठवण्यात आले असून उर्वरित कमलापूर येथील हत्तीसुद्धा पाठवण्यात येणार आहेत अशी चर्चा आता सुरू आहे, या आशयाची बातमी ‘मटा’ने ३ सप्टेंबर रोजी प्रकाशित केली. प्रसार माध्यमांनी हा मुद्दा उचलून धरल्याची बाब वरिष्ठ अधिवक्ता जुगलकिशोर गिल्डा यांनी न्यायमूर्तीद्वय सुनील शुक्रे आणि वाल्मिकी मेंजिस यांच्यासमक्ष मांडली. न्यायालयाने या प्रकाराची गंभीर दखल घेत राज्य व केंद्र सरकार, वन विभाग, राष्ट्रीय प्राणीसंग्रहालय तसेच अन्य विभागाला नोटीस बजावली. वन्यजीवांनाही जगण्याचा अधिकार आपल्याकडे मूलभूत हक्कांवरील चर्चा ह्या केवळ मनुष्यापुरत्या मर्यादित असतात. आपल्याला बुद्धिमत्ता असल्याने आपल्या समाजाने हे अधिकार तयार करवून घेतले आणि त्याचे उल्लंघन होऊ नये याची काळजी घेतली जाते. मात्र वन्यप्राणी मुके असल्याने आपण त्यांचा विचारही करत नाही. त्यांना जगण्याचा अधिकार आहे. हे हत्ती स्व:मर्जीने ओरिसातून स्थलांतरित होऊन विदर्भात आलेत. याचा अर्थ येथील हवामान त्यांना साजेसे आहे. त्यामुळे त्यांना विदर्भातून गुजरातमध्ये हलवणे अयोग्य आहे. स्थलांतरण करायचेच असल्यास त्यासाठी सर्वोच्च न्यायालयाने काही दिशानिर्देश दिलेत त्याचे पालन होणे आवश्यक आहे, अशी तोंडी चर्चा या प्रकरणाच्या सुनावणी दरम्यान आज झाली.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/AMK3178