म. टा. प्रतिनिधी, ठाणे : वेदान्त फॉक्सकॉन, टाटा एअरबस; तसेच अन्य प्रकल्पांच्या बाबतीत काय झाले? अडीच वर्षांपूर्वी ५०० एकरमध्ये फूड पार्क करण्याची घोषणा झाली होती. मात्र, पुढे काहीच झाले नाही. या प्रकल्पाबाबत उच्चाधिकार समिती का झाली नाही? मंत्रीमंडळ उपसमितीची बैठक कधी झाली? किती प्रकल्पाचे सामंजस्य करार झाले आहेत? याविषयी आता श्वेतपत्रिका काढली जाईल, अशा रोखठोक शब्दांत उद्योगमंत्री उदय सामंत यांनी शनिवारी ठाण्यात विरोधकांच्या आरोपांना प्रत्युत्तर दिले. काही दिवसांपूर्वी झालेल्या बैठकीमध्ये सरकारने १० प्रकल्पांना मान्यता दिली. कोट्यावधी रुपायांचे हे प्रकल्प आहेत. परंतु, आम्ही तीन महिन्यांत काहीच केले नाही, असे बोलले जात आहे. ते धांदात खोटे असल्याचेही सामंत म्हणाले. वेदान्त फॉक्सकॉननंतर टाटा एअरबसचा प्रकल्पही गुजरातला गेल्याने विरोधकांनी यावरून सरकारवर टीकेची झोड उठवली आहे. या संदर्भात उद्योगमंत्री उदय सामंत यांनी शनिवारी ठाण्यात माध्यमांशी संवाद साधला. महाराष्ट्राबाहेर जात असलेल्या प्रकल्पांबाबत श्वेतपत्रिका काढणार का, असा प्रश्न विचारण्यात आला. त्या वेळी त्यांनी नक्कीच श्वेतपत्रिका काढू, असे सांगितले. 'एअरबसच्या बाबतीत माझ्यासह कृषिमंत्र्यांच्या राजीनाम्याची मागणी केली जात आहे. हे मी राजकीय समजू शकतो. पण, एअरबस प्रकल्पाच्या बाबतीत एमआयडीसीबरोबर कधीच बैठक झाली नव्हती. 'मिहान'बरोबर चर्चा चालू होती आणि ही चर्चादेखील स्थानिक अधिकाऱ्यांनी केली होती. सरकारने केली नव्हती. एअरबसबाबत 'एमआयडीसी'ने पाठपुरावा केला होता. याविषयी उद्योग विभागाकडे काहीच लिखित नाही,' असा दावा सामंत यांनी या वेळी केला. ज्या ठिकाणी मिहान प्रकल्प होत आहे. त्या ठिकाणी पूर्वीपासूनच टाटांची एक कंपनी कार्यरत आहे. त्या कंपनीच्या अधिकाऱ्यांनी पुढाकार घेऊन एअरबससाठी लागणारी जागा मिहानमध्ये मिळेल का? अशी त्या वेळी चौकशी केली होती. एअरबसच्या बाबतीत त्या वेळी सरकारने किती पुढाकार घेतला? किती बैठका आणि कोणाबरोबर बैठका झाल्या. किती पत्रव्यवहार केला. तत्कालीन मुख्यमंत्री आणि उद्योगमंत्री यांनी कधी बैठक घेतली. याची कागदपत्रे राज्यातील जनतेला अपेक्षित होती. ती कागदपत्रे मिळू शकली नाहीत. सरकार गेल्यानंतर राग असू शकतो. मात्र, राग किती खोटे बोलून काढायचा यालादेखील काही बंधने आहेत. एअर बसप्रकल्पाविषयी कोठेही निर्णय झालेला नसल्याचे या वेळी सामंत यांनी सांगितले. एकनाथ शिंदे आणि देवेंद्र फडणवीस यांचे सरकार आल्यानंतर वेदान्त प्रकल्पासाठी एका महिन्यात सहा बैठका झाल्या. मात्र, अगोदरच्या सरकारच्या काळात वेदान्त बाबतीत हायपॉवर कमिटीची बैठक झाली नसल्याचा दावा सामंत यांनी केला आहे. प्रकल्प आणल्यानंतर हे प्रकल्प कार्यान्वित करण्यासाठी कॅबिनेट सब कमिटीची बैठक होणे आवश्यक आहे. दुर्दैवाने १४ महिन्यामध्ये ही बैठक झाली नाही. आम्ही कॅबिनेट सब कमिटीच्या बैठकीमध्ये १० प्रकल्पना मान्यता दिली. २५ हजार ३६८ कोटीचे हे प्रकल्प असून, या प्रकल्पातून रोजगार निर्मिती होईल असा विश्वासही यावेळी सामंत यांनी व्यक्त केला. सगळ्यांनी एकत्र येऊन काम करण्याची गरज आहे, असे आवाहन केले जात आहे. मात्र, एकत्र येऊन काम करत असताना मुख्यमंत्री एकनाथ शिंदे यांना कायम बदनाम करण्याचा कुटील डाव असेल, तर आम्ही विकासासाठी कधीच एकत्र येऊ, असे मला वाटत नाही, असेही त्यांनी स्पष्ट केले. स्वतःच्या जिवावर निवडून आलो! मी तीन पक्ष फिरलो असलो, तरी पहिल्या टर्मला मी माझ्या जिवावर निवडून आलो. दुसऱ्या, तिसऱ्या टर्मलादेखील भरघोस मतांनी विजयो झालो. कोणत्याही नेत्याला सोबत घेऊन निवडणूक लढलो नाही. राष्ट्रवादी काँग्रेसमधून शिवसेनेमध्ये आल्यानंतर मी एक राजकीय प्रथा बघितली. राष्ट्रवादी सोडल्यानंतर शरद पवार, अजित पवार, सुप्रिया सुळे यांनी कधी माझ्यावर विषारी टीका केली नाही. कधी गद्दार म्हटले नाही. कधीही उद्धव ठाकरे यांच्याकडून खोके घेऊन शिवसेनेमध्ये गेलो असे म्हटले नाही, असेही सामंत यांनी सांगितले.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/jiaGJEF
No comments:
Post a Comment