अहमदाबाद: गुजरातमधील मोरबी शहरातील मच्छू नदीवरील जवळपास शतक जुना असलेला झुलता पूल रविवारी संध्याकाळी कोसळला. या अपघातात ६० लोकांचा मृत्यू झाला. हा पूल लाकडाचा आहे, म्हणून त्याला लकडा पूल असेही म्हणतात. पाच दिवसांपूर्वी हा पूल दुरुस्तीनंतर पुन्हा जनतेसाठी खुला करण्यात आला. त्यावर उभ्या असलेल्या लोकांचा भार सहन न झाल्याने हा पूल तुटल्याचे सांगण्यात येत आहे. हा पूल कसा हलला, कसा लटकला आणि नंतर नदीत कसा कोसळला हे घटनेच्या वेळी उपस्थित असलेल्या प्रत्यक्षदर्शींनी सांगितले. लोक आरडाओरडा करत जीव वाचवण्यासाठी नदीतून बाहेर येऊ लागले. अनेकांनी पुलाचा काही भाग पकडून जीव वाचवण्याचा प्रयत्न केला. (gujarat morbi bridge collapse see what eye witness tell all about the incident) प्रत्यक्षदर्शी अमित पटेल आणि सुक्रम यांनी सांगितले की, दिवाळीच्या सुट्ट्या आणि शनिवार व रविवार असल्याने अनेक लोक येथे आले होते. हे पर्यटकांचे एक आवडते ठिकाण आहे. पुलावर प्रचंड गर्दी असल्याने हा अपघात झाला असावा. जेव्हा हा पूल कोसळला तेव्हा लोक एकमेकांवर पडले. प्रत्येकाला फक्त आपला जीव वाचवायचा होता एका तरुणाने सांगितले की, तोही पुलाला भेट देण्यासाठी आला होता. तो पुलाच्या मधोमध जात होता. मात्र पुलावर चढण्यापूर्वीच हा अपघात झाला. तो पूल जोरात हलला आणि थेट नदीत पडल्याचे त्याने प्रत्यक्ष पाहिले. अनेक महिला व मुले नदीत बुडाली. नदीतील तुटलेला भाग पकडून अनेकजण बाहेर पडू लागले. या दरम्यान मी पाहिले की प्रत्येकाला आपला जीव वाचवायचा होता. अशा स्थितीत लोक एकमेकांना चिरडून वर चढू लागले. पुलावरील जाळीमुळे अनेक जण त्यात अडकल्याने त्यांचे प्राणही वाचले. 'पुलावर होती मोठी गर्दी' एका प्रत्यक्षदर्शीने सांगितले की, 'पुलावर मोठी गर्दी होती. जणू लोक एकमेकांवर चढत होते. सर्वजण मोबाइलमध्ये छायाचित्रे टिपण्याचा प्रयत्न करत होते, त्यामुळे पुलाच्या मध्यभागी जाण्याचा प्रयत्न करत होते. या धडपडीत अनेक लोक धक्काबुक्कीही करत होते. पुलाच्या मधोमध मोठी गर्दी झाल्याने पूल त्या ठिकाणाहून तुटला. काही तरुणांमुळे पूल कोसळला का? एका प्रत्यक्षदर्शीने दावा केला की, काही तरुण पुलावर पाय मारत होते. काही तरुणांनी स्विंग ब्रिज तोडण्याचा प्रयत्न केला. या घटनेचा एक व्हिडीओही व्हायरल होत आहे ज्यामध्ये काही तरुण जोरदारपणे पुलावर पाय आपटताना दिसत आहेत. पोलीस त्या तरुणांचाही शोध घेत असल्याचे बोलले जात आहे. महिला आणि मुलांची संख्या मोठी पुलाचा एक भाग नदीच्या काठावर तर दुसरा भाग नदीच्या मध्यभागी पडला. खोल नदीतून बाहेर पडण्याचा मार्ग न मिळाल्याने दुसऱ्या बाजूने पडलेल्या बहुतांश लोकांचा मृत्यू झाल्याचे प्रत्यक्षदर्शींनी सांगितले. पुरुष कसेबसे बाहेर पडले, पण अपघाताचा सर्वाधिक फटका महिला आणि लहान मुलांना बसला आहे, त्यामुळे मृतांमध्ये महिला आणि लहान मुले सर्वाधिक आहेत.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/e7J6Ah4
No comments:
Post a Comment