जळगाव : तरुण हे देशाचे भविष्य आहे, असं म्हटलं जातं. जळगाव तालुक्यातील फुफनगरी या गावातील अभियंता तरुणी प्रियंका भास्कर सोनवणे हिने ते सिध्द करुन दाखविले आहे. शिक्षण घेत घेता, प्रियंका ही सरपंच म्हणून गेल्या दोन वर्षापासून गावचा कारभार सांभाळत असून जे एवढ्या वर्षात झालं नाही, ते सरपंच म्हणून प्रियंका हिने करुन दाखवलं आहे. विकास करुन गावाचा चेहरामोहराच तिने बदलला आहे. फुफनगरी येथे प्रियंका ही आई वडील, एक भाऊ या परिवारासह वास्तव्यास आहे. प्रियंकाची आई गावातील शाळेत अंगणवाडी सेविका आहे. प्रियंका हिने इलेक्ट्रॉनिक ॲड टेलीकम्युनिकेशन मध्ये पदवी संपादन केली आहे आहे. तिचे शिक्षण सुरु असून केंद्रीय लोकसेवा आयोगाचाही अभ्यास ती करत आहे. गावच्या विकासासाठी तरुणांनी पुढे आले पाहिजे, आपल्या ज्ञानाचा उपयोग गावच्या विकासासाठी केला पाहिजे, या उद्देशाने निवडणूक लढविण्याची इच्छा प्रियंका हिने घरी बोलून दाखविली. कुटुंबिय नव्हे तर गावकरी सुध्दा तिच्या पाठीशी उभे राहिले. २०२१ च्या ग्रामपंचायत निवडणुकीत प्रियंका ही सुध्दा मैदानात उतरली. ग्रामस्थांनी प्रियंका हिच्याबरोबरच त्यांच्या पॅनलवर विश्वास दाखविला. प्रियंका तर तरुण होती, पण तिच्या पॅनमधील पाच सदस्य सुध्दा तरुण आहेत. २०२१ कधी नव्हे अशा मताधिक्याने ग्रामपंचायत निवडणुकीत विजय मिळवित प्रियंका तसेच तिचे पॅनलमधील सदस्यांनी इतिहास रचला.रस्ते असे केले की मुलं चक्क स्केटींग खेळतात..सरपंचपदाची माळ प्रियंका हिच्या गळ्यावर पडल्यावर तिनं नियमित ग्रामसभा, बैठका घेतल्या. गावातील रस्ते, पाणी, विज तसेच शिक्षण व आरोग्य या सर्व समस्यांचे आव्हान प्रियंका हिच्यासमोर होते. प्रियंका हिने गावचा अभ्यास केला, ग्रामपंचायत सदस्य यांना विश्वासात घेत मंत्र्यांकडे तसेच संबंधित विभागाकडे पाठपुरावा केला. करोनामुळे कामे थांबली, त्यामुळे निधीही मिळाला नाही. मात्र, करोनानंतर ज्या मुलभूत सुविधा आहेत, त्यांना प्राधान्य दिले. रस्त्यांबरोबरच गावात कोट्यवधींची विकास कामे प्रियंका हिने ग्रामपंचायत सदस्यांना सोबत घेत करुन दाखविले अन् गावाचे रुपडे पालटले. रस्ते असे केली, या रस्त्यावर गावातील मुले चक्क स्केटींग करुन सराव करतात. ज्या मुलांना स्केटींगसाठी १० किलोमीटरवर जळगावला जावं लागत होते, ते गावातच गुळीगुळीत रस्ते झाल्याने त्यावर सराव करताहेत, मुलांचा याचा मोठा आनंद यांना सुध्दा आहे. गावातील दोन मुलांचा जिल्हास्तरीय स्पर्धेत क्रमांक सुध्दा आला आहे. गावातील शाळेतील विद्यार्थ्यांना पिण्याच्या पाण्याची तसेच गावातील आरोग्य केंद्राच्या अडचणी होत्या. त्याकडे प्रियंका हिने लक्ष दिले. डिजीटल शिक्षणासाठी गावातील शाळांमध्ये संगणक उपलब्ध करुन दिले, तर आरोग्यकेंद्राची रंगरंगोटी आणि इतर सुविधांसाठी पाठपुरावा केला. आता गावातील महिलांना प्रसूतीसाठी बाहेरगावी जाव लागत नाही, गावातच प्रसूती होते, असं प्रियंका सोनवणे सांगतात. गावाच्या विकासामुळे गावकऱ्यांकडून प्रियंकाचे तोंडभरुन कौतुकदोन वर्षात प्रियंकाने केलेल्या गावातील विकासकामांची भलीमोठी यादी आहे, मात्र यात गावच्या स्थापनेपासून जो रस्ता झाला नव्हता, ज्या रस्त्यांची अडचण होती, तो वडनगरी ते फुफनगरी रस्त्यांसाठी पूर्ण मेहनतीने प्रियंका हिने पाठपुरावा केला, तिच पाठपुराव्याला यश आले. प्रियंका हिची धडपड पाहून पालकमंत्री गुलाबराव पाटील यांनी या रस्त्यांसाठी निधी दिला अन् संबंधित विभागांना तशा सुचना व आदेश दिले. आज त्या रस्त्याचा प्रश्न मार्गी लागला असून या रस्त्यांचे काम सध्या युध्दपातळीवर सुरु आहे. प्रत्येकाच्या सुख:दुख: प्रियंका सहभागी होते, गावात भेटणाऱ्या प्रत्येकाला अडचणी समस्यांबद्दल विचारणा करते अन् लगेच ती मार्गी सुध्दा लावते. त्यामुळेच गावकऱ्यांमध्ये सरपंच प्रियंका हिच्या कामगिरीवर मोठे समाधान आणि आनंद आहे. गावात जी कामे गेल्या दोन वर्षात झाली, या कामांमुळे तसेच प्रत्येक समस्या अडचण वेळच्या वेळी मार्गी लागत आहे, ग्रामस्थ हे सरपंच प्रियंकाचे तोंडभरुन कौतुक करतात.आता गावात होतं मुलीच्या जन्माचं जल्लोषात स्वागत आपण एक मुलगी आहोत, म्हणून मुलगी नको, मुलगा हवा ही ग्रामस्थांची असलेली मानसिकता बदलण्यासाठी ही सरपंच म्हणून प्रियंकाने पुढाकार घेतला आहे. ज्या घरात मुलगी जन्माला आली, तिच्या माता पित्याचा घरी जावून प्रियंका सत्कार करते. आपल्या गावची मुलगीचं सरपंच आहे, त्यामुळे प्रियंकामुळे तिच्या गावकऱ्यांची मानसिकता बदलल्यास मदत झाली. याचा परिणाम म्हणजे आज फुफनगरी गावात गावात एखाद्या घरात मुलगी जन्माला आली तर तिचे जल्लोषात स्वागत केले जातेय हे विशेष आहे. आदर्श गाव म्हणून पुरस्कार पटकावाण्याचा मानस भारत हा कृषीप्रधान देश आहे, त्यामुळे शेतकरी मोठा झाला पाहिजे. यासाठी शासनाच्या शेतकऱ्यांसाठी असलेल्या सर्व योजनांची माहिती शेतकऱ्यांपर्यंत घरोघरी जावून मिळाली पाहिजे. शेतकऱ्याला प्रत्येक योजनेचा लाभ घेता आला पाहिजे आणि तो मिळाला पाहिजे, शेतकऱ्याला कुठलीही मदत असो, की लाभ यापासून तो वंचित राहू नये यासाठी आगामी काळात एक व्यवस्था अथवा यंत्रणा तयार व्हावी, यासाठी प्रियंका प्रयत्नशील आहे.तरुणांमुळे गावाच्या विकासाची दिशा ठरते, त्यामुळे गावात तरुणासाठी ग्रंथालय, जीम या गोष्टींसाठी आता सरपंच प्रियंका सोनवणे तिचा पाठपुरावा सुरु आहे. पुढील तीन वर्षाच्या काळात आणखी विकासकामे प्रियंकाला ग्रामपंचायत सदस्यांच्या सहकार्यातून करावयाची असून गावाला आदर्श गावाचा पुरस्कार मिळवून द्यायचा आहे, असे प्रियंका हिने बोलताना सांगितले. दुसरीकडे केंद्रीय लोकसेवा आयोगाच्या परिक्षेचाही प्रियंका अभ्यास करतेय. आज गावाचा कारभार सांभाळतेय, भविष्यात जिल्ह्याचा कारभार सांभाळण्याचे माझे स्वप्न असल्याचेही प्रियंका बोलताना सांगते.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/TedDmAg
No comments:
Post a Comment