म. टा. प्रतिनिधी, मुंबई : 'खारघर येथील महाराष्ट्र भूषण कार्यक्रमाच्या दुर्घटनेत अनेक निष्पाप लोकांना जीव गमवावा लागला असून, त्याची जबाबदारी पुरस्कार देणाऱ्या राज्य सरकारचीच आहे', असा आरोप राष्ट्रवादी काँग्रेसचे अध्यक्ष शरद पवार यांनी शुक्रवारी केला. 'उच्च न्यायालयाच्या न्यायमूर्तींकडे ही जबाबदारी सोपवून यातील सत्य देशासमोर आले पाहिजे, असा आग्रह आपण करायला हवा', असे शरद पवार यांनी स्पष्ट केले.राष्ट्रवादी काँग्रेसतर्फे मुंबई विभागीय कार्यकर्ता शिबीर घाटकोपरमध्ये आयोजित करण्यात आले होते. त्या शिबिराला मार्गदर्शन करताना शरद पवार यांनी राज्य व मोदी सरकारवरही टीका केली. 'केंद्र सरकारने जेव्हा मला पद्मविभूषण पुरस्कार दिला, तेव्हा माझ्या परिवाराचे व इतर सहकारी मोजून १० जण उपस्थित होते. त्याचे महत्त्वाचे कारण हा कार्यक्रम सरकारी होता. महाराष्ट्र भूषण हा कार्यक्रमही महाराष्ट्र सरकारने आयोजिलेला होता. त्याठिकाणी घडलेल्या दुर्घटनेत नेमका आकडा समोर येत नाही; मात्र लोक मृत्युमुखी तर पडलेच. सरकारने योग्य ती खबरदारी घेतली नाही', असेही पवार म्हणाले. 'या घटनेची चौकशीची मागणी झाल्यानंतर एक सदस्यीय समिती स्थापन करण्यात आली. यासाठी नेमणूक केलेला अधिकारी हा स्वच्छ, प्रामाणिक असला तरी तो सरकारी अधिकारी आहे. त्यामुळे सत्यस्थिती कधीही समोर येऊ शकणार नाही', असे मतही पवार यांनी मांडले.'विरोधकांवर केंद्र सरकार सत्तेचा गैरवापर करीत आहे. खोटे गुन्हे नोंदवून विरोधकांना नाउमेद करण्याचा जाणीवपूर्वक प्रयत्न होत आहे. यामुळे कोणावरही अन्याय झाला, तर त्याच्यामागे ताकदीने उभे राहिले पाहिजे. त्या प्रवृत्तीच्या विरोधात लढण्यासाठी कोणतीही किंमत द्यावी लागली, तरी चालेल', असे सांगत शरद पवार यांनी केंद्राच्या धोरणावर टीका केली. राष्ट्रवादीचे नेते अनिल देशमुख, नवाब मलिक, एकनाथ खडसे यांचे जावई आणि शिवसेनेचे खासदार संजय राऊत यांच्यावरील कारवाईचे उदाहरण देत शरद पवार यांनी खारघरच्या घटनेवर प्रथमच भाष्य केले. 'देशात सत्तेचा गैरवापर मोठ्या प्रमाणात सुरू आहे. दोन मुलांचे भांडण झाले, तरी एक जण दुसऱ्याला ईडी मागे लावेन, अशी धमकी देतो; इतकी ही व्यवस्था घराघरात पोहोचली आहे. अनिल देशमुख यांच्यावर खटला भरण्यात आला. त्यांच्यावर १०० कोटी रुपयांच्या भ्रष्टाचाराचा आरोप होता. आरोपपत्र दाखल झाल्यानंतर यात सव्वा कोटी रुपयांचा भ्रष्टाचार झाला असून, त्यांच्या शिक्षणव्यवस्थेला एक कोटी रुपयांची देणगी देण्यात आल्यामुळे खटला दाखल केल्याचे म्हटले आहे. आता भूमिका घेऊन जर कोणी पुढे येत असेल, तर त्यांच्यावर कारवाई केली जाते. नवाब मलिक यांचा खटला किती दिवस पुढे ढकलला जात आहे. राष्ट्रीय पक्षाचा प्रवक्ता आहे म्हणून त्यांना तुरुंगात टाकण्यात आले', असे पवार म्हणाले. 'सगळी उदाहरणे एकच सांगतात की, आम्ही सत्तेचा गैरवापर करणार. आमच्या विरोधातील मत मान्य नसेल, त्याच्यावर कारवाई करणार. हे राज्य आणि हा देश आम्ही म्हणणार तशाच पद्धतीने चालला पाहिजे, ही भूमिका घेऊन आज देशाचे राजकारण एका वेगळ्या दिशेला नेत आहेत', असे शरद पवार म्हणाले. या शिबिरात राष्ट्रवादीचे नेते प्रफुल पटेल, प्रदेशाध्यक्ष जयंत पाटील आदींची भाषणे झाली. 'राजकारणासाठीच बेफिकिरी''प्रचंड उन्हाळा, उष्माघाताची शक्यता असतानाही एवढा मोठा कार्यक्रम उघड्यावर घेतला जातो. याचा अर्थ त्यांना प्रचंड जनशक्ती जमवून आगामी काळात होणाऱ्या निवडणुकांसाठी राजकारणाला अनुकूल वातावरण तयार करायचे होते. त्यामुळेच बेफिकिरी दाखवली गेली. त्याची किंमत काही निष्पाप लोकांना चुकवावी लागली', असे शरद पवार म्हणाले.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/JhEdIvU
No comments:
Post a Comment