नाशिक: लाखो भाविकांच्या उपस्थितीत पाथर्डी गाव परिसरात झालेल्या पंडित मिश्रा यांच्या शिवमहापुराण कथा श्रवण कार्यक्रमात शहर पोलिसांनी तपासकार्याचा अनोखा अध्याय नोंदवला. गर्दीत हरवलेली बालके मदत केंद्रात येताच स्वत: तक्रार नोंदवून त्वरित सर्वतोपरी प्रयत्नाने बालकांच्या पाल्यांचा शोध घेत तपास पूर्ण करण्यात आला. त्यामुळे पाच दिवसांत हरवलेली सुमारे साठ बालके त्याच दिवशी पालकांच्या कुशीत विसावली.नाशिक शहर पोलिसांच्या परिमंडळ दोन हद्दीत पाथर्डी गाव परिसरात २१ ते २५ नोव्हेंबर या कालावधीत शिवमहापुराण कथेचा कार्यक्रम झाला. या कार्यक्रमात लाखो भाविकांच्या गर्दीत दिवसाला दहा-बारा मुले-मुली हरविल्याची नोंद मदत कक्षात आहे. पोलिसांनी तेथे ध्वनिक्षेपकावरून बालकांच्या खिशात नाव, पत्ता, मोबाइल क्रमांक ठेवण्याचेही आवाहन केले होते. मात्र, गर्दीत आई, आजी, मावशी यापैकी कोणाचा तरी हात सुटायचा आणि बालके पोलिसांच्या नजरेत पडायची. काहींनी सांगितलेल्या नावांवरून, काहींच्या पत्त्यांवरून, तर काहींना थेट शालेय माहितीवरून पालकांपर्यंत पोहोचविण्याचा प्रयत्न पोलिसांनी त्याच दिवशी केला. या सर्व घटनांवर उपायुक्त मोनिक राऊत, सहाय्यक आयुक्त शेखर देशमुख, वरिष्ठ निरीक्षक नितीन पगार यांची पथके लक्ष ठेवून होती. यापूर्वी अकोला जिल्ह्यातील शिवमहापुराण कथा कार्यक्रमाच्या बंदोबस्ताचा अनुभव तत्कालीन पोलीस अधीक्षक मोनिका राऊत यांच्याकडे होता. त्यातूनच बालके हरविण्याच्या प्रकाराबाबत पथके पहिल्या दिवसापासूनच सजग आणि तत्पर असल्याचे जाणवले. विशेष म्हणजे, कथेदरम्यान आणि नंतर एकही बालक त्या ठिकाणाहून बेपत्ता झाल्याची नोंद नाही. कारण पोलिसांपर्यंत पोहोचलेले सर्व जण त्यांच्या पालकांपर्यंत सुखरूप पोहोचविण्याचे कर्तव्य पथकांनी त्याच दिवशी पूर्ण केले.आईपासून एका चिमुकल्याची ताटातूट झाल्यावर त्याने पोलिस मदत केंद्र गाठले. अवघ्या चार-पाच वर्षांच्या मुलाला स्वत:च्या नावाव्यतिरिक्त इतर माहिती सांगणे अवघड जात होते. विशेष बाब म्हणजे, त्याला वडिलांचा मोबाइल क्रमांक माहिती होता. त्याने सांगितलेल्या क्रमांकावरून फोन करून पोलिसांनी मुलाची ओळख पटवली. त्याच्या वडिलांनी पोलिसांचे आभार मानत कथेचे स्थळ गाठून मुलाला ताब्यात घेतळले. तोपर्यंत मुलाची आईदेखील तिथे पोहोचली. पाच वर्षांचा बालक गर्दीत हरविल्याचे समजले. त्यालाही स्वत:बद्दल फार माहिती सांगणे अवघड होते. फक्त स्वत:च्या शाळेचे नाव मुलाने सांगितले. मुलगा सिन्नरच्या शाळेत शिकत असल्याने पोलिसांनी तेथे संपर्क साधला. शालेय प्रशासनाकडून मुलाच्या वडिलांचा क्रमांक मिळाला. त्यांना फोन केल्यावर मुलगा आजीसोबत कथा श्रवण करण्यास आल्याचे समजले. आजीशी संपर्क होत नसल्याने वडील नाशिकमध्ये पोहोचले. सुरूवातीला दीड-दोन लाख, शेवटच्या दिवशी तीन लाखांपेक्षा अधिक गर्दी होती. या गर्दीत बालके हरविल्यानंतर पोलिस कक्षात संपर्क साधला जायचा. मिळेल त्या माहितीवरून आम्ही तत्परतेने त्यांना पालकांच्या स्वाधीन केले. प्रत्येक दिवशी कथा संपण्यापूर्वीच बालके पालकांपर्यंत पोहोचली, असं पोलीस उपायुक्त मोनिका राऊत यांनी सांगितलं.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/KPWa6sd
No comments:
Post a Comment