मुंबई : मुंबई महापालिकेचा महत्त्वाकांक्षी प्रकल्प असलेल्या मार्गातील मरीन ड्राइव्ह ते वांद्रे-वरळी सी लिंक या मार्गिकेतील मरीन ड्राइव्ह दिशेने जाणारा पहिला टप्पा जानेवारी अखेरीस खुला केला जाणार आहे. सागरी किनारा मार्गातील अन्य टप्प्यांची कामे मार्गी लावता यावीत, यासाठी वाहनचालकांना सकाळी ८ वाजल्यापासून १२ तासांसाठी किनारा मार्ग खुला ठेवण्याचे नियोजन मुंबई महापालिकेने केले आहे. मुंबई महापालिका आयुक्त इक्बालसिंह चहल यांनीही या माहितीला दुजोरा दिला आहे.मुंबई सागरी किनारा मार्गात वांद्रे-वरळी सी लिंकजवळील पुलासाठी खांबाच्या आराखड्यात बदल, भूमिगत पार्किंगचे न्यायालयात गेलेले प्रकरण यासह अन्य तांत्रिक कारणांमुळे मरीन ड्राइव्ह ते वांद्रे-वरळी सी लिंक असा १०.५८ किमी लांबीचा हा मार्ग रखडला होता. या प्रकल्पातील वरळी ते मरीन ड्राइव्ह दिशेने जाणाऱ्या मार्गिका डिसेंबर २०२३पर्यंत पूर्ण करून वाहनचालकांच्या सेवेत येणार होत्या. या मार्गिका जानेवारी अखेरीस किंवा फेब्रुवारीत सेवेत येणार आहेत. मुंबई महापालिका आयुक्त चहल यांनी सागरी किनारा मार्गावर काम करणारे अधिकारी आणि कंपन्यांसोबत नुकतीच बैठक घेऊन प्रकल्प कामाचा आढावा घेतला. मरीन ड्राइव्ह ते प्रियदर्शनी पार्क पहिला टप्पा, प्रियदर्शनी पार्क ते लवग्रोव्ह नाला दुसरा टप्पा आणि लवग्रोव्ह नाला ते वरळी सी लिंक अशा तीन टप्प्यांत सागरी किनारा मार्गाचे काम होत आहे. पहिल्या दोन टप्प्यात मरीन ड्राइव्हच्या दिशेने जाणाऱ्या प्रत्येकी चार मार्गिका जानेवारी अखेरीस पूर्ण करून त्या खुल्या केल्या जाणार आहेत. तर, अन्य मार्गिकांचे काम सुरूच राहणार आहे.पहिल्या दोन टप्प्यांतील मरीन ड्राइव्हच्या दिशेने जाणाऱ्या मार्गिका सुरू केल्यानंतर अन्य मार्गिकांचे काम करताना येणाऱ्या समस्या पाहता या मार्गिका १२ तासांसाठीच खुल्या करण्याचे नियोजन मुंबई महापालिकेने केले आहे. या मार्गिका फक्त चार तासांसाठी खुल्या ठेवण्यावर बैठकीत चर्चाही झाली. जेणेकरून अन्य टप्प्यांतील वरळीच्या दिशेने जाणाऱ्या मार्गिकांचे काम वेगाने पूर्ण करता येईल. मात्र, वाहनचालकांसाठी चार तासांसाठीच मार्ग खुला ठेवणे सोयीचे ठरणार नाही. वाहनचालकांना त्याचा फारसा फायदाही होणार नसल्याचे आयुक्तांनी बैठकीत स्पष्ट केले. त्यानंतर १२ तासांसाठी मार्ग खुला ठेवण्यावर चर्चा झाली आणि त्यावर सहमती दर्शवल्याचे सूत्रांनी सांगितले. त्यानुसार सकाळी ८ ते रात्री ८ वाजेपर्यंत मरीन ड्राइव्ह दिशेने जाणाऱ्या चार मार्गिका वाहनचालकांसाठी खुल्या केल्या जाणार असल्याचे सांगण्यात आले.मरीन ड्राइव्ह दिशेने जाणारे मार्ग खुले झाल्यानंतर अन्य मार्गांच्या सुरू असलेल्या कामांचा वाहनचालकांना त्रास होऊ नये, तसेच अस्वच्छता आढळू नये, यासाठी मार्गाच्या दोन्ही बाजूला हिरवे पडदे लावून ते झाकण्याच्या सूचना आयुक्तांनी संबंधित अधिकाऱ्यांना केल्या आहेत. सागरी किनारा मार्गाचे काम त्वरीत पूर्ण करण्याचे आदेशही दिले आहेत. संपूर्ण प्रकल्पाचे काम मे किंवा जून २०२४पर्यंत पूर्ण करण्याचे उद्दिष्ट आहे.दोन प्रकल्पांची नववर्षांत भेटमुंबई : मुंबईकरांना अटल सेतू व सागरी किनारा मार्गाची नव्या वर्षात भेट मिळणार असल्याचे मुख्यमंत्री एकनाथ शिंदे यांनी रविवारी जाहीर केले. या दोन्ही प्रकल्पांना भेट दिल्यानंतर किनारा मार्गाचा पहिला टप्पा जानेवारी अखेरीस खुला होणार असल्याची घोषणा त्यांनी केली. मुख्यमंत्र्यांनी या बोगद्याची पाहणी करत त्यातून गिरगाव चौपाटीपर्यंत प्रवास केला.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/qTwHbaP
No comments:
Post a Comment