यवतमाळ:'काँग्रेसचे सरकार असताना दिल्लीतून एक रुपया निघाला असता, लाभार्थ्यांच्या हाती १५ पैसेच येत होते. भाजपच्या सत्ताकाळात गरिबांना त्यांचा पूर्ण पैसा मिळतो. आज एक कळ दाबली आणि २१ हजार कोटी रुपयांचा पीएम किसान सन्मान निधी देशभरातील कोट्यवधी शेतकऱ्यांच्या खात्यात थेट पोहोचला. ही मोदींची गॅरंटी आहे. त्यांचे सरकार असते, तर २१ हजार कोटींपैकी १८ हजार कोटी रुपये मध्येच लुटले गेले असते,' अशी टीका पंतप्रधान नरेंद्र मोदी यांनी बुधवारी केली.मुख्यमंत्री महिला सशक्तीकरण अभियानांतर्गत यवतमाळ-नागपूर मार्गावरील भारी येथे बुधवारी सायंकाळी महिला बचत गटाचा मेळावा आणि विविध विकासकामांचा लोकार्पण सोहळा झाला. या वेळी बोलत होते. या मेळाव्यात लाखावर महिला उपस्थित होत्या. व्यासपीठावर राज्यपाल रमेश बैस, मुख्यमंत्री एकनाथ शिंदे, उपमुख्यमंत्रीद्वय देवेंद्र फडणवीस, अजित पवार, ग्रामविकास मंत्री गिरीश महाजन, कृषीमंत्री धनंजय मुंडे, पालकमंत्री संजय राठोड, खासदार भावना गवळी, भाजपचे प्रदेशाध्यक्ष चंद्रशेखर बावनकुळे उपस्थित होते.नारीशक्तीला सशक्त करण्याचे हे अभियान अधिक गतिशील होणार आहे, असे सांगून पंतप्रधान मोदी म्हणाले, 'यूपीएचे सरकार असताना केंद्रात महाराष्ट्राचे कृषिमंत्री होते. तेव्हा विदर्भातील शेतकऱ्यांच्या नावावर पॅकेज जाहीर करण्यात आले. ते मध्येच लुटले गेले. शेतकऱ्यांना काहीही मिळाले नाही. आज शेतकऱ्यांना सिंचन सुविधा मिळू लागली आहे. अन्नधान्याची गोदामे तयार करण्याची जगातील सर्वांत मोठी योजना जाहीर केली आहे. यातून लहान शेतकऱ्यांना विशेष लाभ होईल. कोणालाही कमी किमतीत आपले उत्पादन विकावे लागणार नाही. देशाच्या विकासासाठी गावे सशक्त होणे आवश्यक आहेत. हे उद्देश साध्य करण्यासाठी मागील दहा वर्षांत गावातील प्रत्येक कुटुंबाच्या अडचणी सोडवून त्यांना आधार देत आहोत.'
दहा वर्षांपूर्वी पाण्यासाठी हाहाकार होता
पाण्याचा मुद्दा उपस्थित करून मोदी म्हणाले, 'पाण्याचे महत्त्व विदर्भापेक्षा आणखी कोण समजू शकणार आहे? दहा वर्षांपूर्वी पाण्याची भीषण परिस्थिती होती. हाहाकार उडत होता. गावातील शंभरपैकी १५ कुटुंबांना नळाचे पाणी मिळत होते. गरीब, आदिवासी आणि दलितांना हा लाभ मिळत नव्हता. ही परिस्थिती बदलण्यासाठी लाल किल्ल्यावरून 'हर घर जल'ची गॅरंटी दिली. आज शंभरात ७५ ग्रामीण कुटुंबांना नळाचे पाणी मिळत आहे. आमचे सरकार येण्यापूर्वी शंभर सिंचन प्रकल्प अडकवून ठेवण्यात आले होते. आम्ही ६० प्रकल्प पूर्ण केले, त्यातील २६ महाराष्ट्रातील आहेत. गोसेखुर्द प्रकल्पाचे बहुतांश काम पूर्ण झाले आहे.'यवतमाळला येण्याचे कारण
'दहा वर्षांपूर्वी यवतमाळला 'चाय पे चर्चा' करण्यासाठी आलो. जनतेने आम्हाला तीनशे पार पोहचविले. २०१९मध्ये यवतमाळला आलो आणि एनडीए साडेतीनशे पोहचले. आज २०२४च्या लोकसभा निवडणुकीपूर्वी विकासाच्या उत्सवात सहभागी होण्यासाठी आलो असताना देशात 'अब की बार ४०० पार'चा आवाज होत आहे. यवतमाळ, वाशीम, चंद्रपूरसह संपूर्ण विदर्भातून आशीर्वाद मिळत आहे,' असेही मोदी म्हणाले.२५ वर्षांची पायाभरणी
- गरिबांना पक्की घरे, महिलांना आर्थिक मदत आणि युवकांना त्यांचे भविष्य बनविण्यासाठी आवश्यक सोयी उपलब्ध होत आहेत.- १३ हजार कोटी रुपयांची पीएम विश्वकर्मा योजना सुरू केली.- प्रत्येक जमातीचा विकास केला. कोलाम, माडियासारख्या जमातींना सुखकर आयुष्य दिले. मोफत रेशन, आरोग्य यांसारख्या सुविधा पहिल्यांदा मिळाल्या.- ओबीसी कुटुंबांना पक्की घरे मिळवून देण्यासाठी विशेष योजना आणली. आजवर कोणीही विचारले नाही, त्यांची आम्ही पूजा केली.- देशातील गरीब, शेतकरी, युवा आणि नारीशक्ती सशक्त झाल्यास समाज आणि पुढे देश सशक्त होईल. हीच गोष्ट लक्षात घेऊन पावले उचलली जात आहेत.- दहा वर्षांत झालेली कामे ही येत्या २५ वर्षांची पायाभरणी आहे. या देशातील प्रत्येक कोपरा विकसित करण्याचा आमचा संकल्प आहे.from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/K4kzFMj
No comments:
Post a Comment