निवडणुकीत कमी मतं; पक्षातील नाराजीनंतर पदाधिकाऱ्यांचे निलंबन, मायावतींकडून आढावा, बसपात फेरबदल? https://ift.tt/LmhExau

नागपूर: लोकसभा निवडणुकीत आतापर्यंतची सर्वात सुमार कामगिरीमुळे बहुजन समाज पक्षात प्रभारी, झोनल समन्वयक ते जिल्हा, शहराध्यक्षांपर्यंत खांदेपालट होण्याची शक्यता आहे. बसपचा दारुण पराभव झाल्यानंतर मायावती ॲक्शन मोडवर आल्या आहेत. दोन दिवसांपूर्वी त्यांनी पक्षाच्या प्रमुख पदाधिकाऱ्यांना दिल्लीला बोलावले होते. लोकसभा निवडणुकीतील मतदानाची प्राथमिक माहिती घेतली. लवकरच लखनऊ येथे बैठक होणार असून यानंतर प्रभारी आणि समन्वयकांवर कारवाई होण्याची शक्यता पक्षातील सूत्रांनी व्यक्त केली. पक्षाला आतापर्यंतची सर्वात कमी मते मिळाल्याने स्थानिक पदाधिकारी आणि वरिष्ठांमध्ये प्रदेश प्रभारी, उमेदवार तसेच निवडणूक नियोजनावरून तीव्र नाराजी आहे. लोकसभा निवडणुकीनंतर विदर्भातील प्रभारींनी जितेंद्र घोडेस्वार आणि रूपेश बागेश्वर यांना निलंबित केले. त्याचे पडसाद उमटले होते. मायावती यांच्या दरबारात हा वाद गेला. रामजी गौतम यांना हटवण्यासाठी पदाधिकारी आणि कार्यकर्ते आक्रमक झाले आहेत. गौतम यांच्यावर आर्थिक व्यवहाराचे गंभीर आरोप करण्यात आले. त्यांना पायउतार करण्याच्या मागणीने जोर पकडला आहे. यासाठी स्थानिक पदाधिकाऱ्यांनी नारी रोडवरील पक्ष कार्यालयासमोर निदर्शने केली.देशभरात एकही जागा आली नाही. नागपूर, रामटेक, चंद्रपूर, भंडारा-गोंदिया यासारख्या मतदारसंघात पक्षाची गठ्ठा मते आहेत. मात्र, यावेळी अत्यल्प मते मिळाली. ४७ मधून १२ उमेदवारांनाच दहा हजारच्यावर मते घेता आली. सर्वाधिक २६ हजार ९८ मते रामटेकमध्ये संदीप मेश्राम यांनी घेतली. भंडारा-गोंदियात संजय कुंभलकर यांना २५ हजार ४६२ मते मिळाली. डॉ. मोहन राईकवार यांना वर्धा मतदारसंघात २० हजार ७९५ मते मिळाली. नागपूरचे योगेश लांजेवार यांना १९ हजार २४२ मते मिळाली. गडचिरोली-चिमूरमधून योगेश गोनाडे यांनी १९ हजार ५५ मते घेतली. यवतमाळ-वाशीममध्ये हरिभाऊ राठोड यांना १७ हजार ३९६ मते मिळाली. उर्वरित उमेदवारांना दहा हजारापेक्षा कमी मते मिळाली. नागपुरात उमेदवार जाहीर झाल्यापासून बसपात खदखद सुरू होती. येत्या विधानसभा व स्थानिक स्वराज्य संस्थांच्या निवडणुका लक्षात घेऊन पक्षाने सविस्तर माहिती घेऊन तातडीने फेरबदल करावी, अशी भूमिका पदाधिकाऱ्यांनी व्यक्त केली.

from Marathi News: मराठी बातम्या, Latest News in Marathi, Breaking Marathi News, Lok Sabha Election Result 2024 News in Marathi | Maharashtra Times https://ift.tt/TisZ5UK