मुंबई : जागतिक बाजारात मागील महिनाभर कच्च्या तेलाचा भाव स्थिर आहे. त्यामुळे पेट्रोलियम कंपन्यांनी जवळपास महिनाभरापासून स्थिर ठेवलेल्या डिझेलच्या दरात आज कपात केली. आज देशभरात डिझेल १५ ते १७ पैशांनी स्वस्त झाले आहे. पेट्रोलच्या दरात मात्र कोणताही बदल झाला नाही. आज मुंबईत पेट्रोलचा भाव प्रती लीटर ८८.७३ रुपये कायम आहे. डिझेलचा भाव ७९.९४ रुपये झाला आहे. त्याआधी तो ८०.११ रुपयांवर स्थिर होता. दिल्लीत आजचा पेट्रोलचा भाव ८२.०८ रुपये आणि डिझेलचा भाव ७३.४० रुपये झाला आहे. चेन्नईत पेट्रोल ८५.०४ रुपये असून डिझेल ७८.७१ रुपये झाला आहे. तर कोलकात्यात पेट्रोल ८३.५७ रुपये आहे. डिझेल ७६.०९ रुपये प्रती लीटर झाला आहे. करोना व्हायरस रोखण्यासाठी देशात जवळपास अडीच महिने कठोर टाळेबंदी लागू करण्यात आली होती. याची मोठी किंमत अर्थव्यवस्थेला चुकवावी लागली आहे. एप्रिल ते जून या पहिल्या तिमाहीत अर्थव्यवस्थेची वाढ नव्हे तर अधोगती झाली आहे. पहिल्या तिमाहीत विकासदर (GDP) उणे २३.९ टक्के इतका प्रचंड खाली घसरला आहे. ४० वर्षांत पहिल्यांदाच जीडीपीमध्ये इतकी मोठी घसरण झाली आहे. जागतिक बाजारात कच्च्या तेलाच्या किमती स्थिर असून देखील मागील तीन आठवडे पेट्रोलियम कंपन्यांनी पेट्रोल दरवाढीचा सपाटा लावला होता. बुधवारी पेट्रोल आणि डिझेल दर स्थिर होते. डब्ल्यूटीआय कच्च्या तेलाचे दर मंगळवारी ०.३५ टक्क्यांच्या तेजीसह ४२.८ डॉलर प्रति बॅरलवर बंद झाले. यासाठीच्या कारकांमध्ये अमेरिकेतील वेगाने कमी होणारा कच्च्या तेलाचा साठा, अमेरिकेतील चांगली फॅक्टरी आकडेवारी यांचा समावेश आहे. कमकुवत अमेरिकी डॉलरने कच्च्या तेलाच्या किंमतींना आधार दिला. ऑगस्ट २०२० मध्ये अमेरिका आणि चीनच्या निर्मिती प्रक्रियेत सुधारणा झाल्याने मागणीच्या शक्यतांना आधार मिळाला. चीनच्या कॅक्सिन मॅन्युफॅक्चरिंग पर्चेसिंग मॅनेजर्स इंडेक्सने वाढत्या निर्यातीसह कारखान्यातील कामकाजात वृद्धीचे संकेत दिले. ओपेक आणि सहकाऱ्यांनी ऑगस्ट २०२० नंतर दैनंदिन उत्पादन कपात ९.७ दशलक्ष बॅरलवरून ७.७ दशलक्ष बॅरलवर करण्याचा निर्णय घेतला. मात्र जागतिक कच्च्या तेलाच्या बाजारात अनिश्चित मागणीमुळे तेलाचा नफा मर्यादित राहिला.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/2Z1h7Xu
No comments:
Post a Comment