म. टा. विशेष प्रतिनिधी, मुंबई मॉडेल व अभिनेत्री साक्षी मलिकचा फोटो तिच्या संमतीविना 'व्ही' नावाच्या तेलुगू चित्रपटात वापरून आक्षेपार्ह पद्धतीने दाखवल्याबद्दल तिने निर्मात्यांकडून भरपाईची मागणी केली आहे. त्यामुळे तिच्या अपेक्षेप्रमाणे भरपाई देणार की नाही, याचे उत्तर १ एप्रिलपूर्वी लेखी स्वरूपात द्या, असा आदेश मुंबई उच्च न्यायालयाने व्यंकटेश्वर क्रिएशन्स प्रायव्हेट लिमिटेड या निर्मात्या कंपनीला दिला आहे. इन्स्टाग्रॅमवरील आपल्या फोटोचा परस्पर वापर करून देहविक्रयाच्या व्यवसायातील महिला म्हणून चित्रपटात आक्षेपार्ह पद्धतीने दाखवल्याचे लक्षात आल्यानंतर साक्षीने अॅड. सविना बेदी यांच्यामार्फत उच्च न्यायालयात दावा दाखल केला आहे. त्याची त्वरित दखल घेत न्या. गौतम पटेल यांनी 'अॅमेझॉन प्राइम' या ओटीटी प्लॅटफॉर्मला चित्रपटाचे प्रदर्शन थांबवण्याचे निर्देश पूर्वी दिले होते. न्यायालयाच्या निर्देशाप्रमाणे निर्मात्यांनी ते दृष्य वगळल्यानंतर न्यायालयाने चित्रपट प्रदर्शनाला परवानगी दिली. मात्र, 'माझ्या प्रतिमेच्या आक्षेपार्ह वापरामुळे माझी बदनामी झाली. शिवाय संबंधित कालावधीत मला कामे न मिळाल्याने माझे मोठे नुकसान झाले', असे म्हणणे साक्षीने स्वत:हून तसेच अॅड. अलंकार किर्पेकर यांच्यामार्फतही मांडल्यानंतर न्यायाधीशांनी भरपाईचा प्रश्न निर्मात्यांसमोर ठेवला. या पार्श्वभूमीवर नुकत्याच झालेल्या सुनावणीच्या वेळी भरपाईच्या रकमेविषयी परस्परसहमती होऊ शकली नसल्याची माहिती साक्षीच्या वकिलांनी न्यायालयाला दिली. तेव्हा 'दोन्ही पक्षकारांनी आपापल्या बाजूने जी रक्कम सुचवली आहे त्यात फारशी तफावत नाही. ती तफावत भरून निघाली तर पुढील कायदेशीर कार्यवाही टळून हे संपूर्ण प्रकरण निकाली निघू शकते. या प्रकरणात फोटोच्या वापराविषयीच्या स्वामित्व हक्काचा आणि बदनामीचा घटक आहे. त्याचबरोबर न्यायालयीन कार्यवाहीच्या खर्चाचाही मुद्दा आहे. त्यामुळे परस्परसहमती झाली नाही आणि पुढे खटला सुरू राहून सरतेशेवटी साक्षी जिंकली तर कायद्यातील तरतुदींप्रमाणे योग्य त्या भरपाईसाठी ती पात्र राहील. तिच्या खटल्यातील गुणवत्तेचा विचार करून न्यायालय योग्य तो निर्णय द्यावा लागेल', असे संकेत न्या. पटेल यांनी दिले. तसेच भरपाईच्या परस्परसहमतीच्या रकमेविषयी निर्मात्या कंपनीच्या वकिलांनी कंपनीचे म्हणणे लेखी स्वरूपात मांडावे, असे निर्देश देऊन न्यायमूर्तींनी पुढील सुनावणी १ एप्रिलला ठेवली.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/3dbr5fb
No comments:
Post a Comment