पुणे: प्रियकरानेच केला प्रेयसीचा खून https://ift.tt/3cJh4ag

म. टा. प्रतिनिधी, येरवडा लग्न करण्यास नकार दिल्याचा रागातून प्रियकराने प्रेयसीला फिरविण्यासाठी नेऊन तिच्या डोक्यात दगड घालून खून केल्याची धक्कादायक घटना उघडकीस आली आहे. खून केल्यानंतर प्रेयसीचा मृतदेह भाटघर धरणाच्या पाणलोटक्षेत्रात टाकून प्रियकर पळून गेला होता. चंदननगर पोलिसांनी अमरावती कारागृहातून आरोपीला ताब्यात घेऊन कसून चौकशी केली असता त्याने खुनाची कबुली दिली. मनीषा बापूराव गेडाम (वय ३०, रा. वडगाव शेरी, मूळ रा. अमरावती) असे खून झालेल्या तरुणीचे नाव आहे. या प्रकरणी सागर गुंडव (वय ३०, रा. चांदूर बाजार, अमरावती) असे अटक केलेल्या आरोपीचे नाव आहे. तरुणीचा भाऊ प्रतीक बापूराव गेडाम (वय २४) याने फिर्याद दिली आहे. महाविद्यालयात असताना आरोपी आणि तरुणीची ओळख झाली होती. त्यानंतर दोघांत प्रेमसंबंध निर्माण झाले. गेल्या दहा वर्षांपासून दोघांचे प्रेमसंबंध होते. काही वर्षे उलटल्यावर आरोपी वाईट स्वभावाचा असून, त्याला अनेक व्यसने असल्याचे समजल्याने मनीषाने लग्नास नकार दिला. यातून आरोपी तिला त्रास देऊ लागला. यामुळे तीन वर्षांपूर्वी मनीषा तिच्या हडपसरमधील बहिणीकडे राहण्यास आली. या दरम्यान तिला विमाननगरमध्ये नोकरी लागल्याने ती वडगाव शेरीत भाड्याने राहत होती. तरीही आरोपी तिच्याशी संपर्क साधण्याचा प्रयत्न करत होता. १३ मार्च २०२१ रोजी आरोपीने मनीषाला वडगाव शेरीत बोलावले. या वेळी तिच्यासोबत मैत्रिण होती. दोघे काही वेळ बोलल्यावर मनीषा त्याच्या दुचाकीवर बसून निघून गेली. मैत्रिणीने तिच्या आईला माहिती दिली. यानंतर चंदननगर पोलिस ठाण्यात अपहरणाची तक्रार देण्यात आली. अनेक दिवस प्रयत्न करूनही तरुणी पोलिसांना सापडत नव्हती. आरोपीचा शोध घेत असताना तो अमरावती कारागृहात शिक्षा भोगत असल्याचे समजले. पोलिसांनी ३० मार्च रोजी आरोपीला चौकशीसाठी अमरावती कारागृहातून ताब्यात घेतले. या वेळी त्याने मनीषाच्या डोक्यात दगड घालून खून केल्याचे सांगितले. कोर्टाने आरोपीला पाच एप्रिलपर्यंत पोलिस कोठडी सुनावली आहे. तरुणीचा शोध लागत नसल्याने चंदननगर पोलिसांनी तिच्या मित्राला अमरावती कारागृहात ताब्यात घेतले. चौकशीमध्ये त्याने प्रेयसीचा खून केल्याची कबुली दिली. पोलिसांनी भाटघर धरणाच्या परिसरात जाऊन तरुणीचा मृतदेह ताब्यात घेतला. खुनाचे कारण अद्याप स्पष्ट झालेले नाही. - पंकज देशमुख, पोलिस उपायुक्त, झोन चार

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/3wkRAHX