म. टा. खास प्रतिनिधी : मुंबईत बसून अमेरिकेतील नागरिकांची फसवणूक करणाऱ्या बोगस कॉल सेंटरचा मालाडच्या बांगूरनगर पोलिसांनी पर्दाफाश केला. कामुकता वाढवणारी औषधे स्वस्तामध्ये देण्याचे आमिष दाखवून अमेरिकन नागरिकांकडून लाखो रुपये उकळण्यात आले. याप्रकरणी पोलिसांनी आठ जणांना अटक केली असून यांच्याकडे अमेरिकन नागरिकांचा डेटा आला कुठून याचा तपास पोलिस घेत आहेत. मुंबईत विशेष करून उत्तर मुंबईत बोगस कॉल सेंटरचा सुळसुळाट सुरु आहे. एप्रिल महिन्याच्या अखेरीस पोलिसांनी अंधेरी परिसरातून एकाच वेळी तीन बोगस कॉल सेंटर उजेडात आणली. त्यानंतर या परिसरात पोलिसांचे अविरत शोधमोहीम सुरूच आहे. मालाडच्या चिंचोली बंदर परिसरातील विजय इंडस्ट्रियल इस्टेटमध्ये अशाच प्रकारे एक कॉल सेंटर सुरू असल्याची माहिती पोलिसांना मिळाली. पोलिस उपायुक्त विशाल ठाकूर यांच्या मार्गदर्शनाखाली बांगूरनगर पोलिसांनी या ठिकाणी छापा टाकला. व्हीओआयपी कॉलच्या साह्याने कॉल सेंटरमधील कर्मचारी अमेरिकन तरुणांना संपर्क करीत असल्याचे दिसून आले. व्हीओआयपी कॉलमुळे ते नेमके कुठून बोलत आहेत, हे अमेरिकेतील नागरिकांना कळून येत नव्हते. वेगवेगळी औषधे तसेच इतर उत्पादने ऑनलाइन डिलिव्हरी करून त्यांच्याकडून पैसे ट्रान्सफर करून घेतले जात होते. पोलिसांनी या कॉल सेंटरचा मालक, व्यवस्थापक, कर्मचारी असा आठ जणांना अटक केली. कॉल सेंटरमधून पोलिसांनी कम्प्युटर्स, लॅपटॉप तसेच इतर साहित्य हस्तगत केले. कॉल सेंटरचा मालक डार्क वेबवर अमेरिकन नागरिकांचा डेटा, मोबाइल क्रमांक खरेदी करीत असल्याचा अंदाज आहे. अनेक दिवसांपासून हे कॉल सेंटर सुरू असल्याने की फसवणूक झालेल्या अमेरिकन नागरिकांची संख्या मोठी असल्याचेही पोलिसांनी म्हटले आहे.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/3bQc96z
No comments:
Post a Comment