काळजी घ्या! मुंबईतील रुग्णसंख्या हळूहळू वाढू लागली https://ift.tt/3doxx3u

म. टा. विशेष प्रतिनिधी, मुंबईतील रुग्णसंख्येचे नियंत्रणात असलेले प्रमाण आता पुन्हा हळूहळू वाढू लागले आहे. मागील आठवड्यामध्ये रुग्णसंख्येमध्ये २,८००ची भर पडली आहे. अंधेरी, गोरेगाव, दहिसर, ग्रँटरोड आणि वांद्रे या ठिकाणी रुग्णदुपटीचा कालावधी सातशे दिवसांपेक्षा कमी नोंदवण्यात आला आहे. परळमध्ये रुग्णदुपटीचा कालावधी नऊशे दिवसांपेक्षा अधिक असला तरीही रुग्णसंख्येमध्ये वाढ होत असल्याचे आकडेवारीवरून दिसून येते. मुंबईमध्ये २० जून रोजी ६,८७,०८४ इतकी रुग्णसंख्या होती, तर २७ जून रोजी ६,८९,८९० रुग्णांची नोंद झाली होती. म्हणजेच सात दिवसांत रुग्णसंख्येमध्ये २,८०६ची भर पडली. अंधेरीमध्ये या कालावधीत ५७१, गोरेगाव येथे २७१, ग्रँटरोड येथे २६० आणि परळ येथे १०३ रुग्णसंख्येची वाढ आढळली. मुंबईमध्ये के पश्चिम प्रभागामध्ये ०.१५ टक्के इतका सर्वाधिक साप्ताहिक रुग्णवाढीचा दर नोंदवण्यात आला आहे. मुंबईचा रुग्णवाढीचा साप्ताहिक दर हा ०.०९ टक्के असून के पश्चिम वगळता इतर सर्व प्रभागांमध्ये हा दर ०.११ ते ०.१२ इतका नोंदवण्यात आला आहे. लक्षणे नसलेल्या रुग्णांची संख्या मुंबईत ३,७८० इतकी असून लक्षणे असलेली रुग्णसंख्या ३,९९८ आहे. अत्यवस्थ रुग्णांची संख्या ८०४ असून बरे होऊन घरी परतलेल्यांची संख्या ६,९४,०८२ आहे. आत्तापर्यंत मुंबईमध्ये ७६,५२,१२० मुंबईकरांनी विलगीकरणाची प्रक्रिया पूर्ण केली आहे. सध्या १,३७,२६१ व्यक्ती गृह विलगीकरणामध्ये, तर ८३८ जण संस्थात्मक विलगीकरणामध्ये वैद्यकीय उपचार घेत आहेत. संसर्गाची दिशा बदलती पालिकेने केलेल्या पहिल्या सिरो सर्वेक्षणामध्ये झोपडपट्ट्या तसेच चाळींमध्ये राहणाऱ्या लोकसंख्येमध्ये करोनाविरोधातील अँटीबॉडी अधिक विकसित झाल्याचे दिसून आले होते. संसर्गाच्या दुसऱ्या टप्प्यामध्ये संसर्गाचा जोर इमारती तसेच रहिवासी संकुलांमध्ये अधिक दिसत होता. संसर्गाचा फैलाव शहरातील वेगवेगळ्या आर्थिक व सामाजिक स्तर असलेल्या लोकसंख्येमध्ये कशाप्रकारे होतो याचा अभ्यास करणे गरजेचे आहे. त्यातील निष्कर्ष महत्त्वाचे ठरणार आहेत. मुंबईसारख्या शहरामध्ये लोकसंख्येच्या कोणत्या भागामध्ये प्रतिकारशक्ती विकसित होते, हे पाहिल्यानंतर संसर्गाच्या फैलावाची दिशाही लक्षात येऊ शकेल, असे वैद्यकीय तज्ज्ञ डॉ. माधव आशा संपत यांनी सांगितले. तिसरी लाट आली तर हा फैलाव ३० ते ३९ या वयोगटामध्येही अधिक असण्याची शक्यता त्यांनी व्यक्त केली.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/3w58Hfk