: टोकियो : ऑलिम्पिकमध्ये सुवर्णपदक जिंकण्याचं प्रत्येक खेळाडूचं स्वप्न असतं. ते पूर्ण झाल्यानंतर त्याला देशात सन्मान तर मिळतोच, पण आजवर ज्या सोयी-सुविधा मिळाल्या नव्हत्या त्या देखील पायाशी लोटांगण घालतात, पण हे सगळ्याच खेळाडूंच्या बाबतीत होतं असं नाही. याचाच प्रत्यय देणारी एक घटना नुकतीच समोर आली आहे. टोकियो ऑलिम्पिकमध्ये सुवर्ण पदक जिंकल्यानंतरही एका खेळाडूला त्याची इच्छा पूर्ण करता येत नाहीय. सुवर्णपदक विजेत्या या खेळाडूला त्याच्या गर्लफ्रेंडसोबत लग्न करता येणार नाही. आणि याला कारण ठरला आहे त्याचा देश. इस्रायलच्या आर्टेम डॉल्गोप्याटने टोकियो ऑलिम्पिकमध्ये सुवर्णपदक जिंकून आपले स्वप्न पूर्ण केले, पण आपल्या गर्लफ्रेंडशी लग्न गाठ बांधण्याचे त्याचे स्वप्न पूर्ण होणार नाही. युक्रेनमध्ये जन्म झालेल्या या इस्रायली जिम्नॅस्टने जेव्हा इस्त्रायलसाठी दुसरे ऑलिम्पिक सुवर्णपदक जिंकले, तेव्हा त्याला राष्ट्रीय नायक ठरविण्यात आले, पण हा उत्सव जास्त वेळ टिकून राहिला नाही. जेव्हा आर्टेमच्या आईने सांगितले की, देशाच्या पुराणमतवादी कायद्यामुळे आर्टेमला ज्यू मानले जात नाही आणि त्याला त्याच्या गर्लफ्रेंडशीदेखील लग्न करण्याची परवानगी मिळणार नाही. इस्रायल सरकार त्यांच्या मुलाला हे लग्न करू देणार नाही. आर्टेमच्या आईने केलेल्या वक्तव्यानंतर नवा वाद सुरू झाला आहे. कारण इस्रायलच्या नियमांनुसार, ज्यांचे आजी-आजोबा ज्यू आहेत, त्यांनाच इस्रायलचे नागरिकत्व दिले जाते. इस्रायलमध्ये हा नियम आहे आर्टेमचे वडील ज्यू आहेत, पण आई नाही. ज्यूंच्या धार्मिक कायद्यांनुसार, 'हलाचा' अंतर्गत ज्याची आई ज्यू असेल, त्यालाच ज्यू मानले जाऊ शकते. या धार्मिक कायद्यामुळे, सोव्हिएत युनियनच्या देशांमधून परतलेल्या हजारो लोकांना भेदभावाचा सामना करावा लागत आहे. ते सगळे इस्त्रायलमध्ये राहतात, तेथील सैन्यात सेवा करतात, पण विवाह आणि अंत्यसंस्कारासारख्या ज्यू विधींमध्ये ते भाग घेऊ शकत नाहीत. आर्टेमच्या आईने सांगितले की, 'त्यांचा मुलगा आणि त्याची गर्लफ्रेंड गेल्या तीन वर्षांपासून एकत्र राहत आहेत, पण लग्न करू शकत नाहीत.' पण ऑलिम्पिक चॅम्पियनने मात्र वाद वाढवण्याचा प्रयत्न केला नाही. त्याने टोकियोमध्ये पत्रकारांना सांगितले की, 'या गोष्टी माझ्या हृदयात आहेत. याबाबत आता बोलणे योग्य नाही.' दरम्यान, आर्टेमने सुवर्णपदक जिंकल्यानंतर संगीतकार अनु मलिक हे चर्चेत आले होते. आर्टेम जिंकल्यानंतर इस्रायलचे राष्ट्रगीत 'हातिकवाह' वाजवण्यात आले. इस्रायलचे राष्ट्रगीत ऐकल्यानंतर भारतीयांना 1996मध्ये रिलीज झालेल्या 'दिलजले' या चित्रपटातील 'मेरा मुल्क मेरा देश' या गाण्याची आठवण झाली. या दोन्ही गाण्यांची चाल एकसारखीच आहे. त्यामुळे नेटकऱ्यांनी इस्रायलचे राष्ट्रगीत ऐकल्यानंतर सोशल मीडियात अनु मलिकला ट्रोल करण्यास सुरुवात केली होती.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/3jqUapY
No comments:
Post a Comment