म. टा. विशेष प्रतिनिधी, मुंबईः चार राज्यांच्या विधानसभा निवडणुकींत काँग्रेसचा धुव्वा उडाल्याने राज्यातील प्रमुख काँग्रेस नेत्यांमध्ये उद्विग्नतेची भावना आहे. काँग्रेसचे प्रमुख मंत्री व नेत्यांच्या शुक्रवारी झालेल्या बैठकीत पक्षाच्या भवितव्यावर बराच खल झाल्याचे समजते. पक्षाचे नेते यांच्या कार्यशैलीबाबत या बैठकीत नाराजी व्यक्त करण्यात आल्याचे समजते. राहुल गांधी काँग्रेस पक्षाचे अध्यक्ष नसले, तरी प्रत्यक्षात संपूर्ण पक्षाची निर्णय प्रक्रिया त्यांच्याच ताब्यात आहे. मात्र राहुल गांधी वर्ष-वर्षभर कोणालाही भेटत नाहीत. तसेच, पक्षातील कोणतेही निर्णय ते मोकळेपणाने घेऊही देत नाहीत. एकीकडे काँग्रेस पक्षाची वाताहत होत असताना यातून मार्ग काढण्यासाठी कोणत्या उपाययोजना करायच्या, लोकांमध्ये कशाप्रकारे जाऊन आपली भूमिका समजावायची, नव्या पिढीला पक्षाकडे आणण्यासाठी कोणते कार्यक्रम राबवायचे, भाजपच्या झंझावाताला रोखण्यासाठी नक्की काय करायचे, केंद्रीय यंत्रणांचा ससेमिरा एखाद्या नेत्याच्या मागे लागल्यास त्याच्यासाठी पक्षाने नक्की काय करायचे आदी अनेक प्रश्नांची उत्तरे देण्यास काँग्रेस पक्षात आता कोणीही उरलेले नाही, असे काँग्रेसमधील तीन प्रमुख नेत्यांचे म्हणणे आहे. 'सोनिया गांधी यांना दिल्लीला भेटायला गेले असता त्या भेटतात. सगळे प्रश्न ऐकूनही घेतात. मात्र, त्याही प्रश्नांमधून मार्ग काढण्याबाबत हतबल आहेत,' असे काँग्रेसमधील ज्येष्ठ नेत्याने 'महाराष्ट्र टाइम्स'शी बोलताना सांगितले. काँग्रेस पक्षाची देशभरात पडझड होत असताना ते लोण महाराष्ट्रात येण्यापूर्वीच काहीतरी गंभीर पावले उचलणे गरजेचे असल्याचे पक्षातील सर्व ज्येष्ठ नेत्यांचे मत आहे. या पक्षाची अशाप्रकारे वाताहत कोणी लावत असेल, तर ते थांबवणे तरी गरजेचे आहे किंवा अन्य काही पर्यायांचा तरी विचार करणे गरजेचे आहे, अशा भूमिकेपर्यंत आता काँग्रेस पक्षातील ज्येष्ठ नेते आले असल्याचे पक्षातील सगळ्या ज्येष्ठांच्या बोलण्यातून आता स्पष्टपणे जाणवू लागले आहे. महत्त्वपूर्ण निर्णयांसाठी लवकरच बैठक पक्षाच्या काही केंद्रीय नेत्यांना ही परिस्थिती सांगून गांधी कुटुंबीय याची गंभीर दखल घेतात किंवा कसे, हे त्यांच्यामार्फत पाहिले जाणार आहे. त्यानंतरच येत्या काही दिवसांमध्ये काही महत्त्वाचे निर्णय घेण्यासाठी एक बैठक बोलावली जाणार असल्याचेही समजते.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/Kdve9g1
No comments:
Post a Comment