म. टा. खास प्रतिनिधी, मुंबई : शिवसेना कुणाची, यासाठी मुख्यमंत्री एकनाथ शिंदे आणि उद्धव ठाकरे यांच्यामध्ये न्यायालयात आणि निवडणूक आयोगात लढाई सुरू असतानाच मुंबईत साडेचार हजारांपेक्षा जास्त प्रतिज्ञापत्रांचा साठा जप्त करण्यात आला आहे. ही प्रतिज्ञापत्रे उद्धव ठाकरे यांच्या बाजूने दिलेल्या शिवसैनिकांची असून, ती बनावट असल्याचा आरोप करीत निर्मलनगर पोलिस ठाण्यात तक्रार करण्यात आली आहे. नोटरी करतेवेळी प्रतिज्ञापत्र करणाऱ्याने हजर राहणे आवश्यक असते. यातील अनेक जण या वेळी अनुपस्थित होते. मात्र, ही प्रतिज्ञापत्रे बोगस आहेत का हे पडताळणीनंतरच स्पष्ट होईल, असे पोलिसांनी म्हटले आहे. वांद्रे न्यायालयात एक व्यक्ती आपल्या वैयक्तिक कामासाठी गेली असता त्याला दोन तरुण दिसले. त्यांच्या हातामध्ये प्रतिज्ञापत्रांचा मोठा गठ्ठा होता. हे दोघे नोटरी करण्यासाठी ही प्रतिज्ञापत्रे घेऊन आले होते. दोघेही स्वतःच नोटरीचा लाल रंगाचा गोलाकार शिक्का आणि स्टॅम्प प्रतिज्ञापत्रावर मारत होते. हे सर्व पाहणाऱ्या व्यक्तीला संशय आल्याने त्याने याबाबतची माहिती पोलिसांना कळवली. निर्मलनगर पोलिसांचे पथक वांद्रे न्यायालय परिसरात पोहोचले आणि दोन तरुणांकडे असलेली जवळपास ४,६८२ प्रतिज्ञापत्रे हस्तगत केली. ही प्रतिज्ञापत्रे पाहिली असता शिवसेना पक्षप्रमुख उद्धव ठाकरे यांना पाठिंबा देणाऱ्या शिवसैनिकांची असल्याचे दिसून आले. या प्रतिज्ञापत्रांसोबत संबंधित व्यक्तीचे आधारकार्ड जोडण्यात आले आहे. ही प्रतिज्ञापत्रे बनावट असल्याचा आरोप करीत याबाबत कळविणाऱ्याने तक्रार दिली. त्याच्या तक्ररीवरून पोलिसांनी गुन्हा दाखल केला आहे. निवडणूक आयोग आणि सर्वोच्च न्यायालयात किती जण आपल्या पक्षात किंवा पक्षाच्या बाजूने आहेत हे दाखविण्यासाठी ठाकरे आणि शिंदे गटाकडून प्रतिज्ञापत्रे घेतली जात आहेत. त्याचाच हा भाग असल्याचे प्राथमिकदृष्ट्या दिसून येत आहे. ही प्रतिज्ञापत्रे बनावट आहेत की खरी हे तपासानंतरच समोर येईल. प्रतिज्ञापत्रासोबत जोडण्यात आलेल्या आधारकार्डाच्या माध्यमातून आम्ही संबंधित व्यक्तीपर्यंत पोहोचत असून, ते केवळ नोटरीदरम्यान अनुपस्थित राहिले की त्यांच्या सह्या, कागदपत्रे बनावट आहेत हे पडताळणीनंतर स्पष्ट होईल, असे पोलिसांनी म्हटले आहे. ज्यांच्या नावाची ही प्रतिज्ञापत्रे आहेत, त्यांना कदाचित कल्पनाही नसेल, अशीही शक्यता नाकारता येत नसल्याने या प्रकरणात तपास महत्त्वाचा असल्याचे एक अधिकारी म्हणाला.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/myukoIf
No comments:
Post a Comment