म. टा. विशेष प्रतिनिधी, मुंबई : लाखो भाविकांना प्रतीक्षा असलेला गणेशोत्सव अवघ्या दीड महिन्यांवर येऊन ठेपला आहे. घरगुती तसेच सार्वजनिक मंडळे, मूर्तिकारांची लगबग सुरू झाली आहे. त्यापाठोपाठ मुंबई महापालिकाही उत्सवाच्या तयारीला लागली आहे. पालिकेने सातही परिमंडळांमध्ये निर्माल्य कलश, चौपाट्यांवरील सुविधांची तयारी सुरू केली आहे. यासाठी प्रशासनाने निविदा काढली आहे. यंदा पीओपीच्या गणेशमूर्तींना परवानगी असली तरी पर्यावरणपूरक गणेशोत्सवावर भर देण्याचे आवाहन केले आहे. श्री गणेशाचे आगमन व विसर्जन मिरवणुकांना अडथळा येऊ नये यासाठी खड्डेमुक्त रस्ते करण्यासाठी पालिकेने कंबर कसली आहे. यंदा १९ सप्टेंबर रोजी गणरायाचे आगमन होणार आहे. त्यामुळे मुंबईसह कोकणातील भाविकांकडून उत्सवाची जल्लोषात पूर्वतयारी होत आहे. गणेशाचे आगमन व विसर्जन तसेच उत्सवासाठी आवश्यक तयारी पालिकेनेही सुरू केली आहे. सार्वजनिक गणेशोत्सव मंडळांना दिल्या जाणाऱ्या परवानग्या, आवश्यकतेनुसार कृत्रिम तलाव, विसर्जनच्यावेळी चौपाट्यांवर निर्माल्य कलश, विसर्जनस्थळांवर प्रकाश व्यवस्थेकरिता विद्युत मनोरे, तसेच अति गर्दीच्या ठिकाणी आपत्कालीन परिस्थितीत विद्युत पुरवठा सुरळीत ठेवण्यासाठी पर्यायी वीज पुरवठ्याकरीता डिझेल जनित्र संचांची व्यवस्था आदी सोयीसुविधांसाठी पालिकने प्रशासकीय यंत्रणा कामाला लावली आहे.विसर्जनस्थळी जमा होणारे निर्माल्य तसेच, इतर साहित्याच्या विल्हेवाटीसाठी पालिका भाड्याने टेम्पो घेणार आहे. यासाठी निविदा काढल्या आहेत. गणेश चित्रशाळांमध्ये मूर्तिकारांचीही लगबग सुरू झाली आहे. यावर्षी प्लास्टर ऑफ पॅरिसच्या मूर्ती घडवण्याचा मार्ग मोकळा असला तरी अनेक मंडळांकडून उत्सव पर्यावरणपूरक करण्यासाठी कागदी किंवा शाडूच्या मूर्तीची ऑर्डर दिली जाते आहे. यंदा गेल्या वर्षीपेक्षा दुप्पट कृत्रिम तलाव निर्माण करण्याचा निर्णय पालिकेने घेतला आहे. त्यासाठी गेल्यावर्षी कोणत्या परिसरात किती कृत्रिम तलाव उभारण्यात आले होते याची माहिती संकलित केली जाते आहे. आवश्यकतेनुसार तलावांच्या संख्येत वाढ केली जाणार असल्याचे पालिकेने म्हटले आहे.खड्डे बुजविण्यावर भरगेल्या काही दिवसांपासून सुरू असलेल्या मुसळधार पावसामुळे रस्त्यांची चाळण झाली आहे. आणखी दोन आठवड्यांनंतर उपनगरातील सार्वजनिक मंडळांच्या गणेश मूर्ती मंडपांकडे जाण्यासाठी निघतील. तत्पूर्वी तसेच गणेश आगमन, विसर्जन मिरवणुका विनाअडथळा पार पाडण्यासाठी रस्ते खड्डेमुक्त असावेत यादृष्टीने पालिकेने जोरदार तयारी सुरू केली आहे. त्यासाठी पालिकेने विभागनिहाय खड्ड्यांची माहिती घेऊन खड्डे बुजविण्यावर भर दिला जाणार असल्याचे प्रशासकीय अधिकाऱ्यांनी म्हटले आहे.१ ऑगस्टपासून एक खिडकी योजनागणेशोत्सव मंडळांना मंडप परवानगीसाठी ‘एक खिडकी’ पद्धतीने ऑनलाइन अर्जाची सुविधा उपलब्ध करून देण्यात आली आहे. १ ऑगस्टपासून पालिकेच्या https://ift.tt/2MasPnA या संकेतस्थळावर ही सुविधा सुरू करण्यात येणार आहे. या सुविधेमुळे मंडळांना पोलिस, वाहतूक पोलिस व मुंबई अग्निशमन दल यांच्याकडे परवानगीसाठी वेगळे अर्ज करण्याची गरज नाही. १३ सप्टेंबरपर्यंत सायंकाळी ५ वाजेपर्यंत अर्ज सादर करता येणार आहेत. मंडप परवानगी नि:शुल्क देण्यात येणार आहे. मात्र एक हजार रुपये सुरक्षा अनामत रक्कम भरणे आवश्यक आहे. तसेच या वर्षीदेखील मंडळांना अर्जासोबत हमीपत्रही द्यावे लागणार आहे.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/gkUxV16
No comments:
Post a Comment