नवी दिल्ली: ‘गेल्या दशकभरात काहीही बदललेले नाही. उलट महिलांवरील गुन्ह्यांमध्ये दिल्लीत वाढच झाली आहे,’ अशी खंत यांनी शनिवारी व्यक्त केली. निर्भया घटनेला ११ वर्षे पूर्ण झाल्याच्या पार्श्वभूमीवर त्या बोलत होत्या. २३ वर्षीय फिजिओथेरपी प्रशिक्षणार्थी तरुणीवर १६ डिसेंबर २०१२ रोजी दक्षिण दिल्लीत एका बसमध्ये सहा जणांनी बलात्कार केला आणि तिला चालत्या बसमधून फेकून दिले होते. त्यानंतर २९ डिसेंबर रोजी सिंगापूरमधील माउंट एलिझाबेथ रुग्णालयात तिचे निधन झाले होते. या घटनेने देश हादरला होता. देशभरातील लोक संतापले होते. त्यानंतर देशात लैंगिक हिंसाचाराशी संबंधित अनेक नवीन कायदे करण्यात आले. या घटनेनंतर पीडितेचे नाव ‘निर्भया’ ठेवण्यात आले. या घटनेला ११ वर्षे पूर्ण झाल्याच्या पार्श्वभूमीवर मालीवाल यांनी सांगितले की, सन २०१२मध्ये निर्भयावर सामूहिक बलात्कार करण्यात आला होता. त्यानंतर त्या तरुणीचा अत्यंत वेदनादायी मृत्यू झाला होता. ही घटना घडल्यानंतर लोक रस्त्यावर उतरले होते. मात्र, त्या दुर्घटनेच्या अनेक वर्षांनंतरही आपण आजही त्याच जागी आहोत. महिलांवरील गुन्हे दिवसेंदिवस वाढत आहेत. असे गुन्हे केल्यास यंत्रणा आपल्याला सोडणार नाही, याची भीती गुन्हेगारांना वाटणार नाही, तोपर्यंत काहीही बदलणार नाही, असेही त्या म्हणाल्या.दिल्ली महिला आयोगाच्या अध्यक्षांनी अशाप्रकारच्या गुन्ह्यांसाठी ठोस आणि जलद शिक्षेची मागणी केली. यासाठी पोलिसांची आणि जलद न्यायालयांची संख्या वाढली पाहिजे. तसेच अशा संवेदनशील प्रकरणांना सरकारने गांभीर्याने घेतले पाहिजे, असेही त्यांनी स्पष्ट केले. दरवर्षी १६ डिसेंबरला नेते बदल घडवून आणण्याच्या मोठ्या मोठ्या बाता मारतात, पण हे सर्व व्यर्थ आहे, असे त्या म्हणाल्या. ‘निर्भयाच्या घटनेनंतर कठोर कायदा करण्यात आला. मात्र त्याने फारसा फरक पडला नाही. एखाद्या पोलीस कर्मचाऱ्याने बलात्कार पीडितेची तक्रार नोंदवली नाही, तर त्याच्याविरुद्धही एफआयआर नोंदवला जाऊ शकतो. दिल्ली महिला आयोगाच्या माध्यमातून महिलांवरील गुन्ह्यांची नोंद व्हावी, याची आम्ही नेहमीच खात्री देतो, असेही मालीवाल म्हणाल्या. दिल्लीतील महिलांवरील वाढत्या गुन्ह्यांबाबत नॅशनल क्राइम रेकॉर्ड ब्युरोच्या (एनसीआरबी) अहवालाबाबत मालीवाल म्हणाल्या की, एनसीआरबीच्या नवीन अहवालानुसार, २०२२मध्ये देशातील १९ महानगरांमध्ये महिलांविरुद्धच्या गुन्ह्यांची सर्वाधिक प्रकरणे दिल्लीत नोंदवली गेली. यावरून असे दिसून येते की, अत्याचार करणाऱ्यांच्या मनात शिक्षेची भीतीच राहिलेली नाही. राजकारणी अशा गुन्हेगारांसोबत फोटो काढताना दिसल्याच्या घटनाही घडल्या. देशातील महिला कुस्तीपटूंच्या लैंगिक छळाचे काय झाले? ब्रृजभूषण शरण सिंग त्यांच्यावर गंभीर आरोप असूनही मोकाट फिरत आहेत, असेही त्या म्हणाल्या.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/Q2FY7Xk
No comments:
Post a Comment