मुंबई : खाद्यपदार्थांची मेजवानी, सांगीतिक पर्वणी, कला व नृत्याविष्कारासह उपयुक्त कार्यशाळा, अनेक मास्टर शेफकडून पाककला कौशल्याचे मार्गदर्शन, विविध वस्तू व कलाकृतींचे महाप्रदर्शन, स्टार्ट अप आव्हाने, विविध खेळ, असा बहुरंगी-बहुढंगी असलेला आणि मुंबईतील गेट वे ऑफ इंडियापासून नवी मुंबईपर्यंत रंगणारा, तब्बल ५० कार्यक्रमांची रेलचेल असलेला नऊ दिवसांचा ‘मुंबई फेस्टिव्हल-२०२४’ आज, शनिवारपासून सुरू होत आहे.मुंबईचा सर्वांत मोठा महोत्सव अशी ओळख बनलेल्या ‘मुंबई फेस्टिव्हल’मध्ये मुंबईच्या सामाजिक व सांस्कृतिक विविधतेचे दर्शन घडत असते. यंदाही राज्य सरकारच्या पर्यटन विभागाने विविध घटकांच्या सहकार्याने २० ते २८ जानेवारी या कालावधीसाठी आयोजित केलेल्या या खास महोत्सवाचे उद्घाटन मुख्यमंत्री एकनाथ शिंदे, उपमुख्यमंत्री देवेंद्र फडणवीस व पर्यटनमंत्री गिरीश महाजन, मुख्य सचिव डॉ. नितीन करीर व मुंबई फेस्टिव्हल सल्लागार समितीचे अध्यक्ष आनंद महिंद्रा यांच्या प्रमुख उपस्थितीत क्रॉस मैदानात होणार आहे. सिनेमासृष्टीतील सारा अली खान, अनुपम खेर, सचिन खेडेकर, आदिनाथ कोठारे, अमेय वाघ, मिनी माथुर अशा अनेक सेलिब्रिटींची उपस्थिती ‘’ नावाने असलेल्या या उद्घाटन सोहळ्याचे खास आकर्षण असेल.‘मराठी बाणा’फेम अशोक हांडे यांच्यातर्फे महाराष्ट्राच्या संस्कृतीचे सादरीकरण, तबलावादक अनुराधा पाल व कथक नृत्यांगना अदिती भागवत यांचे सादरीकरण आणि ‘धारावी ड्रीम प्रोजेक्ट’च्या मुलांचे कलासादरीकरण हेही या सोहळ्याचे वैशिष्ट्य असेल. याशिवाय डॉ. तुषार गुहा यांचे लक्षणीय गाणे, श्रद्धा विद्यालयाचे लेझीम, अभिनेत्री शर्वरी जमेनीसचे कथक सादरीकरण आणि मुंबईच्या संस्कृतीची झलक दाखवणारे ‘नरेश कथक ट्रुप’चे ‘थीम साँग’ हेही सुरुवातीच्या सोहळ्याचा भाग असेल. ‘विझक्राफ्ट एंटरटेन्मेंट एजन्सी’ने उद्घाटन सोहळ्याचे नियोजन केले आहे. दक्षिण मुंबईतील गेट वे ऑफ इंडिया, क्रॉस मैदान, एमएमआरडीए मैदान, कांदिवली अशा विविध ठिकाणांसह नवी मुंबईतही रंगणाऱ्या या महोत्सवाचे ‘महाराष्ट्र टाइम्स’ हे ‘फेस्टिव्हल पार्टनर’ आहे.वैशिष्ट्यपूर्ण ‘महामुंबई एक्स्पो’या फेस्टिव्हलचा एक भाग असलेले वांद्रे-कुर्ला संकुलातील एमएमआरडीए मैदानातील ‘महामुंबई एक्स्पो’ सुद्धा अत्यंत वैशिष्ट्यपूर्ण असेल. त्यात ‘टेस्ट ऑफ मुंबई’मधील खाद्यपदार्थांची मेजवानी, विविध खेळ व साहसी कृत्यांचा आनंद देणारे ‘गेम झोन’, हस्तकलेच्या व दुर्मीळ कलाकृतींचे प्रदर्शन यासह दररोज संगीत, नृत्य व विनोदी कलांचे सादरीकरण, अनेक मास्टर शेफकडून पाककलेच्या कार्यशाळा, लहान मुलांसाठी खेळ आदीचा समावेश आहे.‘मुंबई शहराच्या विविधांगी संस्कृतीची अनुभूती देणाऱ्या या नऊ दिवसांच्या महोत्सवासाठी २५ कोटींचा खर्च करण्यात येणार आहे. अधिकाधिक नागरिकांनी या महोत्सवात सहभागी होण्याचा आनंद घ्यावा’, असे आवाहन पर्यटनमंत्री गिरीश महाजन यांनी केले. ‘मुंबईच्या विविधतेत एकता, या संस्कृतीचे दर्शन असलेल्या या महोत्सवाचा नागरिकांनी आपल्या कुटुंबीय व मित्र मैत्रिणींसह मनमुराद आनंद घ्यावा’, असे आवाहन पर्यटन सचिव जयश्री भोज यांनी केले.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/yl7jSfg
No comments:
Post a Comment