नागपूर हादरलं! एका दिवसात तिघांची हत्या, नागरिकांमध्ये दहशतीचे वातावरण https://ift.tt/sZ8yUCK

नागपूर: उपराजधानीत खुनाची मालिका सुरूच असून पुन्हा तीन खुनांनी शहर हादरले. गेल्या २४ तासांत नंदनवन पोलीस ठाण्याच्या हद्दीत दोघांची तर कळमना पोलीस ठाण्याच्या हद्दीत एका युवकाची हत्या करण्यात आली. आठवडाभरात पाच हत्याकांड घडले असून, यात सात जणांचा जीव गेला. वाढत्या हत्याकांडांनी नागरिकांमध्ये दहशतीचे वातावरण आहे. पैशांच्या वादातून युवकाला संपविलेपैशांच्या वादातून विलास ऊर्फ मटर रामकृष्ण वानखेडे (रा. हिवरीनगर पॉवर हाऊसजवळ, नंदनवन) याने साथीदारांच्या मदतीने फरशीने वार करून नीरज शंकर भोयर (वय २८, रा. गरोबा मैदान) याचा खून केला. या घटनेत विशाल भगवानजी राऊत (वय २७, रा. क्वेटा कॉलनी) हा जखमी झाला. त्याच्यावर मेडिकल कॉलेज हॉस्पिटलमध्ये उपचार सुरू असून, विशालची प्रकृती चिंताजनक असल्याची माहिती आहे. नीरज हा खासगी काम करायचा. विलासने नीरजकडून पैसे उधार घेतले. तो नीरजला पैसे परत करीत नव्हता. यावरून दोघांमध्ये वाद सुरू झाला.विलासने साथीदारांच्या मदतीने नीरजची हत्या करण्याचा कट आखला. शुक्रवारी रात्री १० वाजताच्या सुमारास विलासने नीरजला देशपांडे लेआउट परिसरात बोलाविले. नीरज व विशाल तेथे आले. विलासने वाद घालून नीरजच्या डोक्यावर फरशीने वार केले. त्याच्या साथीदारांनी विशालला मारहाण केली. यात नीरजचा मृत्यू झाला तर विशाल जखमी झाला. या घटनेनंतर मारेकरी पसार झाले. पोलिसांनी खुनाचा गुन्हा दाखल करून मारेकऱ्यांचा शोध सुरू केला आहे. वाहतूकदाराने घेतला चालकाचा जीवकामावर सतत गैरहजर राहत असल्याने संतप्त वाहतूकदाराने चालकाचा जीव घेतला. ही घटना नंदनवन पोलिस ठाण्याच्या हद्दीतील जुना बगडगंज परिसरात घडली. सचिन यशवंत उइके (वय ३०, रा. कुंभारटोली, जुना बगडगंज) असे मृताचे नाव आहे. पोलिसांनी खुनाचा गुन्हा दाखल करून वाहतूकदार दर्शन रवींद्र भांडेकर (वय २३, रा. गरोबा मैदान) याला अटक केली. सचिन हा दर्शनकडे काम करायचा. तो सतत गैरहजर राहायचा. शुक्रवारीही सचिन कामावर गेला होता. दर्शन हा सचिनला बोलावयला त्याच्या घरी गेला. ‘मी दारू प्यायली आहे’, असे सचिन त्याला म्हणाला. यावरून दोघांमध्ये वाद झाला. दर्शन हा त्याला सोबत घेऊन घराबाहेर गेला व मारहाण केली. त्याच्या कमरेवर लाथ मारताच सचिन खाली पडला. त्याच्या डोक्याला गंभीर जखम झाली. सचिन बेशुद्ध झाला. दर्शनने सचिनच्या नातेवाइकांना बोलाविले. त्याला मेडिकल कॉलेज हॉस्पिटलमध्ये दाखल केले. शनिवारी सकाळी उपचारादरम्यान सचिनचा मृत्यू झाला. नंदनवन पोलिसांनी खुनाचा गुन्हा दाखल करून दर्शनला अटक केली. क्रिकेटच्या वादातून चाकूने केले वारनंदनवनमधील दोन हत्याकांड विस्मृतीत जात नाही तोच कळमना पोलिस ठाण्याच्या हद्दीतील भरतवाडा येथे चाकूने वार करून युवकाची हत्या करण्यात आली. अज्जू इब्राहिम शेख (वय २४) असे मृतकाचे तर करण वंजारे असे मारेकऱ्याचे नाव आहे. शनिवारी दुपारी ४.३० वाजताच्या सुमारास अज्जू व करण भरतवाडा परिसरात मित्रांसह क्रिकेट खेळत होते. खेळताना दोघांमध्ये वाद झाला. वाद विकोपाला गेला. संतप्त करणने चाकूने अज्जूच्या पोटावर वार केले. रक्ताच्या थारोळ्यात अज्जू खाली कोसळला. करण पसार झाला. घटनेची माहिती मिळताच पोलिसांचा ताफा तेथे पोहोचला. पोलिसांनी जखमी अज्जूला हॉस्पिटलमध्ये दाखल केले. डॉक्टरांनी तपासून अज्जूला मृत घोषित केले. याप्रकरणी कळमना पोलिसांनी खुनाचा गुन्हा दाखल करून तपास सुरू केला आहे.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/hvPIwLi