अहमदाबाद : हार्दिक पंड्याच्या कमबॅकनंतरही मुंबई इंडियन्सला विजय काही मिळवता आला नाही. मुंबई इंडियन्सने दुसऱ्या सामन्यातही पराभाचेच पाढे वाचले. पण दुसरीकडे गुजरातने आपल्या घरच्या मैदानात मोठा विजय साकारला. गुजरातने साई सुदर्शनच्या अर्धशतकाच्या जोरावर १९६ धावांचा डोंगर उभारला. या आव्हानाचा पाठलाग करताना मुंबईच्या फलंदाजांनी हाराकिरी केली आणि त्यामुळेच त्यांना पराभवाचा सामना करावा लागला. गुजरातने ३६ धावांनी विजय साकारत आपल्या गुणांचे खाते उघडले आहे.गुजरातच्या १९७ धावांचा पाठलाग करताना मुंबईची सुरुवात चांगली झाली नाही. रोहित शर्मा ८ धावांवर बाद झाला. त्यानंतर काही वेळ तिलक वर्मा आणि सूर्यकुमार यादव यांची चांगली जोडी जमली होती. या दोघांनी तिसऱ्या विकेटसाठी चांगली भागीदारी रचली, पण तिलकने चुकीचा फटका मारत आपली विकेट गमावली आणि ही जोडी फुटली. त्यानंतर सूर्यावर सामन्याची जबाबदारी होती. हार्दिक पंड्या त्याच्या साथीला आला होता. पण सूर्या मोठा फटका मारताना बाद झाला आणि त्याने ४८ धावा केल्या. हार्दिक पंड्या यावेळी फटकेबाजी करायला जमली नाही आणि तो ११ धावांवर बाद झाला. त्यामुळे मुंबई इंडियन्सला दुसरा पराभवही पत्करावा लागला.हार्दिकने गुजरातला फलंदाजीचे आमंत्रण दिले आणि तिथेच मुंबई इंडियन्सने चूक केली. कारण खेळपट्टी फलंदाजीला पोषक होती आणि त्याचा फायदा गुजरातच्या संघाने चांगलाच उचलला. शुभमन गिल आणि साई सुदर्शन या दोघांनीही दमदार सुरुवात केली. पहिल्या पॉवर प्लेमध्ये त्यांनी मुंबईच्या गोलंदाजीवर जोरदार प्रहार केला आणि एकराच्या धावगतीने त्यांनी आपल्या धावा जमवल्या. मुंबईच्या संघाला यावेळी एकही विकेट काढता आली नाही. तिथेच गुजरातचे आपल्या मोठ्या धावसंख्येचा पाया रचलाा. पण पॉवर प्लेनंतर हार्दिक गोलंदाजीला आला आणि त्याने मुंबईला पहिली विकेट मिळवून दिली. हार्दिकने गिलला ३८ धावांवर बाद केले.हार्दिकने दोन विकेट्स मिळवल्या खऱ्या, पण साई सुदर्शनने दुसऱ्या बाजूने धडाकेबाज फलंदाजी करत अर्धशतक पूर्ण केले आणि संघाला दीडशे धावांचा पल्ला सहज गाठून दिला. साई सुदर्शनने यावेळी फक्त ४१ चेंडूंत ६३ धावांची खेळी साकारली, यामध्ये चार चौकार आणि दोन षटकारांचा समावेश होता. साई बाद झाल्यावर गुजरातला जास्त धावा करता आल्या नाहीत, पण त्यांनी १९६ धावांचा डोंगर उभारला. मुंबई इंडियन्सकडून यावेळी हार्दिक पंड्याने कमबॅक करत टॉस जिंकला आणि त्याने गुजरातला प्रथम फलंदाजीसाठी पाचारण केले. या गोष्टीचा मुंबईला मोठा फटका बसल्याचे पाहायला मिळाले.
from Marathi News: मराठी बातम्या, Latest Marathi Breaking News & Headlines, Election 2025 Live in Marathi | Maharashtra Times https://ift.tt/Z1RAdtk
No comments:
Post a Comment