नगरसेवक बसणार कुठे?; प्रत्यक्ष बैठकीसाठी करोना नियमावली ठरली पालिकेसाठी डोकेदुखी https://ift.tt/3pPuZCF

- नोव्हेंबरपासून महापालिका सभागृहाच्या प्रत्यक्ष बैठका - सभागृहाबाहेर खुर्च्या टाकायच्या की पक्षनिहाय जागा? - पालिकेत प्रशासकीय पातळीवर विचार सुरू म. टा. विशेष प्रतिनिधी, मुंबई नोव्हेंबरपासून महापालिका सभागृहाच्या प्रत्यक्ष बैठका सुरू होणार आहेत. मुंबईत एकूण २३३ नगरसेवक असून करोना नियमावलीनुसार सुरक्षित अंतराचे पालन करणे बंधनकारक आहे. त्यामुळे सर्व २३३ नगरसेवक एकाचवेळी सभागृहात बसणे शक्य नाही. सभागृहात नेमके किती नगरसेवकांनी बसायचे, सभागृहाबाहेर खुर्च्या टाकून नगरसेवकांना बसण्याची व्यवस्था करता येईल का, तसेच प्रत्येक राजकीय पक्षाला सभागृहात किती जागा द्यायच्या, याबाबत पालिकेत प्रशासकीय पातळीवर विचार सुरू झाला आहे. करोनामुळे गेल्या दीड वर्षापासून पालिका सभागृहाची ऑनलाइन बैठक होते आहे. करोना नियंत्रणात असल्याने राज्य सरकारने प्रत्यक्ष बैठका घेण्यास परवानगी दिली आहे. त्यानुसार नोव्हेंबर महिन्यापासून पालिका सभागृहाच्या बैठका घेण्याचे नियोजन प्रशासकीय पातळीवर सुरू करण्यात आले आहे. मात्र या नियोजनात नगरसेवक संख्येचा तिढा निर्माण झाला आहे. मुंबई महापालिकेत निवडून आलेले २२७ आणि पाच नामनिर्देशित असे एकूण २३३ नगरसेवक आहेत. करोना नियमावलीनुसार सभागृहातील बैठकीतही सुरक्षित अंतराचे पालन करणे बंधनकारक आहे. पालिका सभागृहाची रचना आणि नगरसेवकांची आसनव्यवस्था पाहता आणखी जागा वाढवणे शक्य नाही. त्यामुळे एका बाकावर फार तर तीन नगरसेवकांना बसण्याची परवानगी दिल्यास अतिरिक्त दोन नगरसेवकांना कुठे बसवायचे असा प्रश्न निर्माण झाला आहे. अशा अतिरिक्त सुमारे ७५हून अधिक नवीन जागा तयार कराव्या लागणार आहेत. सभागृहात शिवसेनेचे ९७, भाजपचे ८२ आणि काँग्रेसचे २९ असे मोठ्या संख्येचे नगरसेवक आहेत. प्रथम येणाऱ्यास प्रथम प्राधान्य? महापौर किशोरी पेडणेकर यांनी आसनव्यवस्थेचा तिढा निर्माण झाला असल्याचे स्पष्ट करत या समस्येवर विविध पर्याय काढण्यात येत असल्याचे सांगितले. सभागृहात प्रथम येणाऱ्यास प्रथम प्राधान्य तसेच सभागृह क्षमतेपेक्षा अतिरिक्त ठरणाऱ्या नगरसेवकांना बाहेर खुर्च्या देऊन बसवता येईल का, याशिवाय प्रत्येक राजकीय पक्षाच्या मर्यादित नगरसेवकांना सभागृहात प्रवेश देता येईल का, याचा विचार सुरू आहे. गटनेत्यांच्या बैठकीत अंतिम निर्णय सभागृहाबाहेर असलेल्या नगरसेवकाला एखाद्या चर्चेत सहभागी व्हायचे असेल तर त्याचे नाव पुकारल्यानंतर सभागृहात भाषण करून पुन्हा बाहेर जाता येईल, असे विविध पर्याय काढले जात आहेत. याबाबत लवकरच गटनेत्यांची बैठक घेऊन अंतिम निर्णय घेण्यात येईल, अशी माहिती महापौरांनी दिली.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/3EmbEg5