मुंबई : अखेरच्या षटकापर्यंत रंगलेल्या सामन्यात अखेर आरसीबीने राजस्थानवर चार विकेट्स राखून विजय मिळवला. जोस बटलरने यावेळी ४७ चेंडूंमध्ये सहा षटकारांच्या जोरावर ७० धावांची दमदार खेळी साकारली आणि त्यामुळेच राजस्थानला आरसीबीपुढे १७० धावांचे आव्हान ठेवता आले. या आव्हानाचा पाठलाग करताना आरसीबीची सुरुवात चांगली झाली होती. पण आरसीबीचे दोन्ही सलामीवीर बाद झाले आणि आरसीबीचा डाव गडगडायला सुरुवात झाली आणि त्यांची ५ बाद ८७ अशी अवस्था झाली होती. पण त्यानंतर दिनेश कार्तिक आणि शाहबाद अहमद यांनी आरसीबीच्या संघाला सावरले व विजयाच्या आशा पल्लवित केल्या. मोक्याच्या क्षणी शाहबाज बाद झाला, पण दिनेशने अखेरपर्यंत किल्ला लढवला आणि संघाला विजय मिळवून दिला. तत्पूर्वी, आरसीबीचा कर्णधार फॅफ ड्यु प्लेसिसने यावेळी नाणेफेक जिंकून प्रथम गोलंदाजी करण्याचा निर्णय घेतला. राजस्थानचा सलामीवीर यशस्वी जैस्वाल हा दुसऱ्याच षटकात बाद झाला आणि राजस्थानला पहिला धक्का बसला. जैस्वालला यावेळी ४ धावाच करता आल्या. यशस्वी बाद झाल्यावर देवदत्त पडीक्कल फलंदाजीला आला आणि त्याने दमदार फटकेबाजी केली. देवदत्त पडीक्कलने २९ चेंडूंत दोन चौकार आणि दोन षटकारांच्या जोरावर ३७ धावांची खेळी साकारली. पण हर्षल पटेलने त्याला बाद करत राजस्थानला दुसरा धक्का दिला. त्यानंतर संजू सॅमसन फलंदाजीला आला आणि राजस्थानचा कर्णधार आता कशी फलंदाजी करतो, याकडे सर्वांच्या नजरा लागल्या होत्या. पण संजूने यावेळी आपल्या चाहत्यांना निराश केले. सॅमसनच्या रुपात राजस्थानच्या संघाला मोठा धक्का बसला आहे. संजूला या सामन्यात आठ धावांवर समाधान मानावे लागले. त्यावेळी राजस्थानचा संघ मोठी धावसंख्या उभारू शकत नाही, असे वाटत होते. पण त्यावेळी जोसने खेळपट्टीवर उभं राहून एक बाजू लावून धरली होती. जोसने सुरुवातीला जास्त जोखीम उचलली नाही, पण एकदा स्थिरस्थावर झाल्यावर मात्र त्याने धडाकेबाज फटकेबाजी केली. अखेरच्या षटकांमध्ये बटलरने मोठे फटका लगावले आणि त्यामुळेच राजस्थानला आरसीबीपुढे १७० धावांचे सन्मानजनक लक्ष्य ठेवता आले.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/K4ph5ER
No comments:
Post a Comment