उस्मानाबाद : जिल्ह्यातील उमरगा शहरातील प्रसिद्ध शेंडगे हाँस्पिटल अँड रिसर्च सेंटर येथे २०२१ मध्ये झालेल्या कथित कोट्यवधी रुपयांच्या घोटाळयातील मुख्य आरोपी डॉ. आर. डी. शेंडगे हे गेल्या १४ महिन्यांपासून फरार आहेत. पोलिसांना शेंडगेंना अटक करण्यात अद्याप यश आलेलं नाही. पोलिसांना शेडगेंना अटक करण्यात यश कधी येणार अशा चर्चा उमरगा शहरात सुरु आहेत. पोलिसांकडून डॉ. शेंडगे यांना अटक होत नसल्यानं नागरिकांमध्ये रोष आहे. शेंडगे यांचा जामीन अर्ज सत्र न्यायालय आणि मुंबई हायकोर्टाच्या औरंगाबाद खंडपीठानं फेटाळून देखील पोलीस त्यांना अटक का करु शकले नाहीत, असा सवाल उपस्थित होत आहे.उमरगा शहरातील प्रसिद्ध शेंडगे हाँस्पिटल अँड रिसर्च सेंटर यांनी रुग्ण, महात्मा फुले जन आरोग्य विमा योजना,खाजगी विमा कंपनी यांची बोगस तपासणी अहवालाद्वारे फसवणूक केल्याचं आणि दोषी असल्याचं या प्रकरणी नियुक्त केलेल्या त्रिसदस्यीय चौकशी समितीला आढळले होते. चौकशी समितीच्या अहवालानुसार डॉ. अशोक बढे यांनी दिलेल्या फिर्यादीवरुन १२ ऑक्टोबर २०२१ रोजी उमरगा पोलीस स्टेशनला डॉ. आर. डी. शेंडगे, तत्कालीन प्रयोग शाळा तंत्रज्ञ तानाजी बनसोडे यांच्या विरुध्द भा.द.वि कलम ४२०,४६५,४६८,४७१,३४ अन्वये गुन्हा दाखल झाला होता. यातील दुसरा आरोपी प्रयोग शाळा तंत्रज्ञ तानाजी बनसोडे याला अटकेनंतर ५ महिन्यांनतर जामीन मिळाला आहे.तर, मुख्य आरोपी डॉ आर. डी शेंडगे अद्याप फरार आहे. शेंडगे यांचा अटकपूर्व जामीन अर्ज सत्र न्यायालयानं दोनवेळा आणि मुंबई उच्च न्यायालयाच्या औरंगाबाद खंडपीठानं फेटाळला आहे. या प्रकरणातील दुसरा आरोपी प्रयोगशाळा तंत्रज्ञ तानाजी बनसोडे याला आजारी नसताना ३ दिवस अॅडमिट दाखवले आणि खासगी विमा कंपनीकडुन ३२ हजार रुपये घेतल्याचा आरोप शेंडगे यांच्यावर आहे. तसेच तानाजी बनसोडे याला डॉ. शेंडगे ने ज्युनिअर कॉलेजचा कर्मचारी दाखवल्याचं समोर आलं आहे. हा प्रकार जेव्हा तानाजी बनसोडे याला समजला तेव्हा फसवणुकीची प्रथम तक्रार त्याने दिली.डॉ. शेंडगे यांच्याकडे नोकरी करत असल्यामुळे खोटे रिपोर्ट देण्यास भाग पडलो असल्याचे तक्रारी मध्ये बनसोडे यानं म्हटले होते.फसवणुकीची पध्दत रुग्णांचे शेंडगे यांच्या लॅबमध्ये रुग्णांचे रक्त नमुने पाठवले जायचे तेव्हा त्यावर विशिष्ट खूण केली जायची. चिट्टीवर वरच्या बाजुला रुग्णांचे नाव एक बाण, २ बाण,३ बाण वर असले की रिपोर्ट अहवाल वाढवून दयायचा. बाण खाली असेल तर कमी दयायचा तसेच प्लस चिन्ह असेल तर पाँझेटिव्ह मायनस चिन्ह असेल तर निगेटिव्ह दयायचा अशा पध्दतीने रक्त तपासणी रिपोर्ट बनवला जायचा. या आधारे बिल वाढवून महाराष्ट्र शासनाच्या महात्मा फुले जनआरोग्य योजने सह खासगी विमा कंपनीकडून बिल मिळवायचे. हा प्रकार २०१५ ते २०२१ या वर्षात मोठया प्रमाणात झाला असल्याचं बोललं जातंय. चौकशी केल्यास या घोटाळ्याची व्याप्ती कोट्यवधींच्या घरात असल्याचं बोललं जातंय. तानाजी बनसोडे यांचा आत्मदहनचा इशारा या प्रकरणातील आरोपी तानाजी बनसोडे यानं ३० नोव्हेंबर रोजी जिल्हाधिकारी उस्मानाबाद, पोलीस अधिक्षक उस्मानाबाद यांना निवेदन देत मुख्य आरोपी डॉ. आर.डी शेंडगे यांना अटक करण्याची मागणी केली होती. तसेच मुख्य आरोपी डॉ. शेंडगे हे उमरगा शहरात सतत येतात, राहतात, दैनंदिन कामे करतात, लातुर,पुणे येथे जातात, असा दावा बनसोडे यांनी केला आहे. शेंडगे शहरात आले तरी उमरगा पोलिंसांकडून अटक होत नसल्याचं तानाजी बनसोडेंनी म्हटलं आहे. मुख्य आरोपी डॉ. शेंडगे यांना अटक न केल्यास पुढील काही दिवसात जिल्हाधिकारी कार्यालयात आत्मदहन करण्याचा इशारा तानाजी बनसोडेंनी दिला आहे. पोलिसांची भूमिका काय? उस्मानाबादचे पोलीस अधीक्षक अतुल कुलकर्णी यांनी याविषयी बोलताना, मी जिल्ह्यात नवीन आहे, तसेच हे प्रकरण माझ्या कार्यकाळात घडलेले नाही. शिवाय पेंडिग केसेस फाईलमध्ये मला हे प्रकरण दिसले नाही. मी या प्रकरणाची चौकशी करतो आणि कळवतो, असं त्यांनी मटा ऑनलाइनच्या प्रतिनिधीशी बोलताना सांगितलं. उमरगा येथील पोलीस निरीक्षक मनोज कुमार राठोड यांनी चौकशी चालू आहे, चौकशीत निष्पन्न झाले तर डॉ. शेंडगे यांना अटक करु तसेच ते फरार असून त्यांचा शोध सुरु आहे, असं म्हटलं. उपलब्ध कागदपत्रांच्या आधारे तपास अहवाल देण्याची पोलिसांची तयारी आहे. डॉ. शेंडगे कुठं आहेत त्याबद्दल माहिती असल्यास आम्हाला सांगा आम्ही पकडू, अशी भूमिका मनोजकुमार राठोड यांनी मांडली. दरम्यान, सत्र न्यायालय आणि उच्च न्यायालयानं अटकपूर्व जामीन अर्ज फेटाळेलल्या मुख्य आरोपी डॉ शेंडगे यांना अटक झाल्यास आणि या प्रकरणाची सखोल चौकशी केल्यास नेमका किती मोठा घोटाळा झालाय, कोण कोण यात सहभागी होते हे निष्पन्न होईल, असं उमरगा शहरात बोललं जात आहे.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/sJwueXq
No comments:
Post a Comment