मुंबई : अवघ्या महाराष्ट्राचे आराध्यदैवत असलेल्या छत्रपती शिवाजी महाराजांच्या जयंती उत्सवानिमित्त शिवरायांच्या नावाचा जयघोष यंदा जगभर घुमणार आहे. भारतातील मुंबई, पुणे, नाशिक यासह जगभरातील १०० हून अधिक शहरांत फेब्रुवारी ते एप्रिल या तीन महिन्यांत ग्लोबल शिवजयंती मोठ्या उत्साहाने साजरी केली जाणार आहे. छत्रपती शिवाजी महाराज आंतरराष्ट्रीय परिवारातर्फे (एसएमएपी) या शिवजयंती उत्सवाचे आयोजन करण्यात आले आहे. ‘एसएमएपी’चा संस्थापक विजय पाटील हा शिवप्रेमी मराठी तरुण असून, तो अमेरिकेत उद्योजक म्हणून सध्या कार्यरत आहे.विजयच्या पुढाकाराने अमेरिकेमध्ये सुरू झालेल्या शिवजयंतीनंतर आता जगभरात शिवजयंतीचा उत्साह पाहायला मिळणार आहे. विजय अमेरिकेमध्ये स्वत:ची कंपनी चालवतो. छत्रपती शिवरायांनी गाजवलेला पराक्रम आपल्या मुलांना कळावा म्हणून २०१८मध्ये विजयने पहिल्यांदा अमेरिकेत घरीच शिवजयंती साजरी केली होती. त्यानंतर २०१९मध्ये त्याने लॉस एंजेलिसमध्ये थिएटर भाड्याने घेऊन, तेथील भारतीयांच्या ग्रुपला एकत्र करून छत्रपतींवर इंग्रजीत नाटक सादर केले. २०२०मध्ये त्याने स्थानिक मित्रमंडळी आणि शिवभक्तांच्या मदतीने लॉस एंजेलिससह एकूण पाच शहरांत शिवजयंती साजरी केली. २०२१मध्ये करोनाच्या काळात ऑनलाइन ग्लोबल शिवजयंती साजरी करण्यात आली. तेव्हा विविध देशांतील शिवभक्तांनी विजयशी संपर्क साधून ते ‘एसएमएपी’शी जोडले गेले. २०२२ मध्ये एकूण २२ शहरांत शिवजयंती साजरी करण्यात आली.२०२३मध्ये एसएमएपीच्या पाचव्या वाढदिवसानिमित्त शिवप्रेमींचा उत्साह शिगेला पोहोचला असून, १०० हून अधिक शहरांत शिवजयंतीचा उत्साह पाहायला मिळेल. प्रत्येक ठिकाणी स्थानिक भारतीयांच्या ग्रुपने यासाठी पुढाकार घेतला आहे. जागेचे बुकिंग करण्यापासून ढोल-ताशे, मिरवणुका, नाटकाची व्यवस्था करण्यापर्यंत सर्व काही त्या स्थानिक ग्रुपची करणार आहे. त्या-त्या ठिकाणी साजरा होणारा कार्यक्रम हा तेथील स्थानिक भाषेतच किंवा इंग्रजीत होईल. शिवजयंती उत्सवाच्या निमित्ताने देशातील सहा राष्ट्रपुरुषांचाही (नॅशनल हिरो) सन्मान आणि त्यांची ओळख करून देण्याचा प्रयत्न असतो. पृथ्वीराज चौहान, महाराणा प्रताप, राजा कृष्णदेवराय, छत्रपती शिवाजी महाराज, महाराजा रणजित सिंग, राणी लक्ष्मीबाई यांचा त्यात समावेश आहे.राजकीय सहभाग टाळूनचशिवजयंती उत्सव शिस्तीने साजरा व्हावा, यासाठी यामध्ये सहभागी होणाऱ्यांकरिता पाटील यांनी १७ नियम तयार केले आहेत. उत्सवात त्यांचे काटेकोरपणे पालन केले जाते. यातील एक महत्त्वाचा नियम म्हणजे कोणत्याही राजकीय पक्षांची संलग्नता यामध्ये घेतली जात नाही. काही ठिकाणी विजय स्वत: खर्चामध्ये वाटा उचलत असतो. परदेशातील ग्रुप्सना वीकेंडलाच भेटणे शक्य होत असल्याने त्यानुसार वेगवेगळ्या तारखांना फेब्रुवारी, मार्च महिन्यात शिवजयंती साजरी होईल.एप्रिलपर्यंत उत्साहलॉस एंजेलिस, अटलांटा, सॅन होजे, लंडन, शांघाय, हेलसिंकी, झुरिक, अबु धाबी, म्युनिक, सिडनी, शिकागो, ह्यूस्टन, मियामी, डल्लास, स्टॅमफोर्ड, डेन्वर, सॅन डिएगो या जगभरातील विविध शहरांमध्ये शिवरायांच्या नावाचा जयघोष होईल. तसेच भारतातील मुंबई, अहमदाबाद, सुरत, वापरी, बडोदा, राजकोट, पुणे, नाशिक, सुरत, डोंबिवली, नवी मुंबई, नवी दिल्ली, ठाणे, देवरुख, सोलापूर, कोल्हापूर, जळगाव, पन्हाळगड येथेही ग्लोबल शिवजयंतीचा उत्साह पाहायला मिळेल. ५ फेब्रुवारीला टोकियोतून याची सुरुवात झाली आहे. परदेशात काही ठिकाणी बर्फवृष्टी होत असल्याने तो कालावधी संपल्यानंतर, म्हणजे एप्रिल महिन्यातही काही शहरांमध्ये शिवजयंती होईल.शिवजयंती उत्सवात परदेशातील तरुण वर्ग मोठ्या संख्येने उत्साहाने सहभागी होत असल्याचे चित्र दिसून येते. महाराष्ट्राच्या मातीतील आदर्श राजे असणाऱ्या छत्रपती शिवरायांकडून हे तरुण प्रेरणा घेतात. या उत्सवातून आपल्या देशातील विविध प्रदेशांतून आलेल्या राष्ट्रपुरुषांना मानवंदना देण्याचा आमचा प्रयत्न आहे.-विजय पाटील, संस्थापक-अध्यक्ष, एसएमएपी
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/4wXNcO1
No comments:
Post a Comment