Bachchu Kadu Victory: मंत्रिपद मिळवताना नाकीनऊ पण जिल्हा बँक झटक्यात मिळवली https://ift.tt/5J29aKl

'मी मंत्री बनल्याशिवाय राहणार नाही, तो आमचा अधिकार' हे वाक्य आहे मुख्यमंत्री एकनाथ शिंदे यांच्या गटाचे समर्थक आमदार आणि प्रहारचे सर्वेसर्वा यांचं... पण शिंदेंसोबत एकनिष्ठ राहूनही सरकारमध्ये मंत्रीपद मिळणार नसल्याची खात्री पटली आणि बच्चू कडूंनी मंत्रीपदावरील दावा सोडला. मागच्याच आठवड्यात ते पुन्हा एकदा चर्चेत आले होते. ती चर्चा संपते ना संपते तोच या आठवड्यात ते पुन्हा एकदा चर्चेत आलेत ते काँग्रेस आमदार यशोमती ठाकूर यांना बहुचर्चित अमरावती जिल्हा सहकारी बँकेच्या निवडणुकीत ‘दे धक्का’ दिल्यामुळे. काँग्रेसची २५ वर्षांपासूनची सत्ता काबीज करण्यात बच्चू कडूंना कसं यश आलंय? या निवडणुकीत नेमकं काय घडलं? यावर यशोमती ठाकूर नेमक्या काय म्हणालेत आणि या यशामुळे बच्चू भाऊंनी जिल्ह्याच्या राजकारणात पुन्हा एकदा आपलं वर्चस्व कसं दाखवून दिलंय. उद्धव ठाकरेंसोबत असताना बच्चू कडूंना सहजरित्या मंत्रिपद मिळालं होतं, पण शिंदे-फडणवीसांसोबत जाऊन बच्चू कडूंनी शर्थीचे प्रयत्न करुनही पदरी निराशाच आली. अशातच अमरावती जिल्हा सहकारी बँकेचा निकाल बच्चू कडू यांना बळ देणारा ठरलाय... > अमरावती जिल्हा सहकारी बँकेच्या अध्यक्ष आणि उपाध्यक्षपदाची निवडणूक २४ जुलैला पार पडली. > अध्यक्षपदासाठी मैदानात उतरलेले माजी आमदार प्रा. वीरेंद्र जगताप यांना पराभवाचा सामना करावा लागला. > यामध्ये आमदार यशोमती ठाकूर यांना धक्का देत आमदार बच्चू कडू यांनी अध्यक्षपद पटकावले. > उपाध्यक्षपदावर अपक्ष अभिजित ढेपे यांची वर्णी लागली, त्यांनी ठाकूर गटाच्या हरिभाऊ मोहोड यांचा पराभव केला. > मतदानापर्यंत काँग्रेसला आपले सदस्य फुटणार, याची किंचितही कल्पना नव्हती, मात्र निकालानंतर सगळं स्पष्ट > बहुमत नसतानासुद्धा काँग्रेस समर्थीत पॅनलचे तीन सदस्य फोडण्यात बच्चू कडू यशस्वी ठरले. २५ वर्षांपासून जिल्हा बँकेवर काँग्रेसच्या नेत्यांचे एकछत्री वर्चस्व होते, मात्र ते मोडीत काढण्यात बच्चू भाऊ यशस्वी ठरले. काय म्हणाले बच्चू कडू? “या निवडणुकीत आम्ही सहा-सात जण अतिशय मजबूत होतो. त्यामुळेच हा विजय खेचून आणला आहे. शेतकऱ्यांबाबत असलेल्या चांगल्या भावना आणि पुण्य कर्म आमच्या कामी आले आहेत. या बँकेच्या माध्यमातून शेतकऱ्यांचं अर्थकारण कसं मजबूत होईल. त्यांच्या दारापर्यंत आम्हाला कसं जाता येईल, हा निश्चित प्रामाणिक प्रयत्न आम्ही करू.", अशी प्रतिक्रिया बच्चू कडू यांनी दिलाये. या सर्व घडामोडींनतर यशोमती ठाकूर यांनी विधानभवनात येताच बच्चू कडूंवर टीका केली.काय म्हणाल्या यशोमती ठाकूर? "जिल्हा बँकेत तीन मतं फुटली, आणि ४० खोक्यांचा इफेक्ट अमरावती जिल्ह्यातही दिसला. ग्रामीण भागात शेतकऱ्यांच्या भावनांसोबत असा खेळ होणार असेल, तर शेतकरी यांना कधीच माफ करणार नाही. एक मतासाठी दीड-दोन कोटी दिले जातात, एवढी हिम्मत येते कुठून? आम्हीही राजकारण लहानपणापासून पाहत आलोय, पण अशा प्रकारचं राजकारण पाहिलेलं नाही.", असं यशोमती ठाकूर म्हणालेत. बच्चू कडू यांची जिल्हा बँकेच्या अध्यक्षपदावर निवड झाल्यानंतर जिल्ह्याच्या राजकारणातसुद्धा मोठे फेरबदल होण्याची ही नांदी मानली जातेय. बच्चू कडू यांची महत्त्वाकांक्षा मोठी आहे. त्यांना पक्षाचा विस्तार करायचा आहे. बच्चू कडूंच्या कामाविरोधात मतदारसंघातच नाराजी असल्याने आगामी काळात त्यांच्यासमोर मोठं आव्हान आहे. मंत्रीपद मिळवताना नाकीनऊ आलेल्या बच्चू कडूंना आता जिल्हा बँकच्या रुपाने मिळालेली सत्ता राखण्यात आता यश येईल का? हे पाहावं लागेल.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/CUcVyTY