नवी दिल्ली: आयपीएलमधील सार्वकालीन महान संघाचा कर्णधार म्हणून महेंद्रसिंह धोनीची निवड करण्यात आली आहे. २००८ मध्ये आयपीएलला सुरुवात झाली आणि अल्पावधीतच ही जगातील सर्वोत्तम टी-२० क्रिकेट लीग ठरली. आयपीएलचा हा १६ वा मोसम आहे. त्या पार्श्वभूमीवर ही संघ निवड करण्यात आली आहे. पंधरा सदस्यीय संघाची रविवारी घोषणा करण्यात आली. महेंद्रसिंह धोनीच्या नेतृत्वाखाली चेन्नई सुपर किंग्जने पाच वेळा आयपीएल करंडक उंचावला आहे आणि पाच वेळा उपविजेता राहिला आहे. धोनीने २५० सामन्यांत १३५.९१च्या स्ट्राइक रेटने ५०८२ धावाही केल्या आहेत. ऑस्ट्रेलियाचा आक्रमक फलंदाज डेव्हिड वॉर्नर (६३९७ धावा) आणि भारताचा विराट कोहली (७२६३ धावा) यांची सलामी जोडी म्हणून निवड करण्यात आली आहे. यात विंडीजच्या ख्रिस गेलला (४९६५ धावा, सहा शतके) तिसरा क्रमांक देण्यात आला आहे. मधल्या फळीत दक्षिण आफ्रिकेचा अब्राहम डिव्हिलियर्ससह (५१६२ धावा) भारताचे सूर्यकुमार यादव (३२४९), सुरेश रैना (५५२८), महेंद्रसिंह धोनी यांना स्थान आहे. अष्टपैलूंमध्ये हार्दिक पंड्या, रवींद्र जडेजा, कायरन पोलार्ड यांचा समावेश करण्यात आला आहे. फिरकी गोलंदाज म्हणून अफगाणिस्तानचा रशीद खान, विंडीजचा सुनील नारायण, भारताचा युझवेंद्र चहलचा समावेश आहे. वेगवान गोलंदाजांमध्ये श्रीलंकेचा लसिथ मलिंगा, भारताचा जसप्रीत बुमराह यांना स्थान देण्यात आले आहे. - आयपीएलमधील सार्वकालीन महान संघ निवडण्यासाठी एका समितीची स्थापना करण्यात आली होती.- यात माजी क्रिकेटपटू वसीम अक्रम, मॅथ्यू हेडन, टॉम मूडी आणि डेल स्टेनचा समावेश होता. - हा संघ निवडण्यासाठी जवळपास ७० पत्रकारांचाही सहभाग होता. - मुंबई इंडियन्सच्या रोहित शर्माला या संघात स्थान देण्यात आलेले नाही. - कोहलीने आयपीएलमध्ये सर्वाधिक ७२६३ धावा केल्या आहेत. यात सात शतकांचा समावेश आहे.- आयपीएलमध्ये सर्वाधिक विकेट युझवेंद्र चहलच्या नावावर आहेत. त्याने १८७ विकेट घेतल्या आहेत.महेंद्रसिंह धोनीला सर्वोत्तम कर्णधार म्हणून निवड करण्यामागील कारण म्हणजे त्याने सर्वोत्तम आणि सरासरी अशा दोन्ही संघांचे नेतृत्व करून जेतेपद मिळवले आहे. संघात वैविध्यता असूनही त्याने संघाची मोट उत्तम बांधली. रोहित हादेखील हुशार कर्णधार आहे. मात्र, मुंबई संघात नेहमीच सर्वोत्तम खेळाडूंचा भरणा होता, असं ऑस्ट्रेलियन प्रशिक्षक टॉम मूडी म्हणाले.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/WilaBEf
No comments:
Post a Comment