साहित्य संमेलनाच्या समारोपाचे सोपस्कार, सांगतेचा सोहळा निरुत्साहात; मंडपात विद्यार्थ्यांचीच उपस्थिती https://ift.tt/JSlsbdK

म. टा. विशेष प्रतिनिधी, साने गुरुजी साहित्यनगरी, अमळनेर: राजकीय नेत्यांच्या स्वागताचे मोठे फ्लेक्स, होर्डिंगमुळे ९७व्या अखिल भारतीय मराठी साहित्य संमेलनासाठी काही प्रमाणात वातावरणनिर्मिती झाली खरी; मात्र संमेलनाच्या समारोपाला मुख्यमंत्री एकनाथ शिंदे यांच्यासह केंद्रीय मंत्री नितीन गडकरी उपस्थित राहू शकले नाहीत. समारोपाच्या सत्रामध्ये झालेली भाषणेही संमेलनात रंग भरण्यात कमी पडली. त्यामुळे समारोपाचा सोपस्कार पार पाडून संमेलनाचे सूप वाजले.मुख्यमंत्री एकनाथ शिंदे डोळ्यांवरील शस्त्रक्रियेमुळे समारोपाच्या कार्यक्रमाला उपस्थित राहू शकले नाहीत. त्यांनी ऑनलाइन माध्यमातून संमेलनात उपस्थित रसिकांशी संवाद साधला. 'खान्देशात होणाऱ्या साहित्य संमेलनाच्या निमित्ताने त्यांनी केवळ प्रमाण भाषेचा विचार करून चालणार नाही, तर प्रमाण भाषा टिकण्यासाठी बोलीभाषा समृद्ध कराव्या लागतील,' असे मत त्यांनी व्यक्त केले. 'बोलीभाषेचा गोडवा इंग्रजीमुळे संपू नये. लेखक आपल्या साहित्यातून बोलीभाषा जपत असून, त्यांना साहित्य संमेलनासारखे व्यासपीठ मिळावे', अशी अपेक्षाही त्यांनी व्यक्त केली. समाजात साहित्यिकांचे स्थान आदराचेच आहे, असेही त्यांनी आश्वस्त केले.समारोपासाठी उपस्थित असलेल्या मराठी भाषामंत्री दीपक केसरकर यांनी प्रत्येक जिल्ह्यामध्ये वेगवेगळ्या विषयांवर लहान-लहान साहित्य संमेलने झाली पाहिजेत, अशी अपेक्षा व्यक्त केली. पण, ही संमेलने एकाच मंचावर येण्याची गरज आहे. अन्यथा, मराठी माणूस विखुरलेलाच राहील, याकडे त्यांनी लक्ष वेधले. या वेळी अमळनेकरांनी केलेल्या मागणीनुसार साने गुरुजी यांना मरणोत्तर भारतरत्न देण्यासाठी केंद्र सरकारकडे निवेदन देण्यात येणार असल्याचेही ते म्हणाले. समारोपाच्या दिवशी अभिरुप न्यायालयाच्या सत्रात सहभागी झालेल्या डॉ. नीलम गोऱ्हे यांनी अभिरुप न्यायालयात दिलेला निर्णय मराठी भाषामंत्र्यांपर्यंत पोहोचवला.समारोपाच्या कार्यक्रमात सत्कार आणि भाषणानंतर केसरकर निघून गेले. विधान परिषदेच्या उपसभापती डॉ. नीलम गोऱ्हे याही भाषणानंतर निघून गेल्या. लेखक आणि प्रकाशकांच्या सत्काराच्या कार्यक्रमासाठी ज्येष्ठ लेखिका डॉ. मीना प्रभू उपस्थित होत्या. मात्र, समारोपाच्या सुरुवातीच्या सत्काराच्या कार्यक्रमामध्ये डॉ. प्रभू यांचा सत्कार करण्याचे राहून गेले आणि केसरकर भाषणाला उभे राहिल्यानंतर त्यांच्या सत्काराबद्दल लक्षात आल्याने डॉ. प्रभू यांचा सत्कार करण्यात आला.उद्घाटनाला विद्यार्थ्यांमुळे काही प्रमाणात भरलेला मंडप समारोपाच्या कार्यक्रमातही विद्यार्थ्यांच्याच मदतीने भरण्याचा प्रयत्न झाला. मात्र, हा प्रयत्नही मुख्यमंत्र्यांचे ऑनलाइन भाषण संपल्यानंतर अपुरा पडला. काही विद्यार्थी आणि रसिक ऑनलाइन भाषणादरम्यान; तर काही भाषणानंतर उठून गेले आणि मग पुन्हा संमेलनाचा मुख्य मंडप समारोपाच्या कार्यक्रमातही ओस पडला.ग्रंथालयांसाठी विशेष अनुदानप्रत्येक तालुक्याच्या ठिकाणी ग्रंथ प्रदर्शनांच्या आयोजनासाठी राज्य सरकारतर्फे मदत करण्यात येणार असल्याचे मुख्यमंत्री शिंदे यांनी सांगितले. हस्तलिखित जतन, ग्रंथालयांसाठी विशेष अनुदान, लोकसाहित्याच्या संशोधन आणि ग्रंथलेखनासाठी विशेष अनुदान अशाही घोषणा शिंदे यांनी भाषणात केल्या. अमळनेरला असलेले शंभर वर्षे जुने तत्त्वज्ञान केंद्र आहे. त्याच्या पुनर्विकासाचा प्रस्ताव पाठवण्याचेही त्यांनी आवाहन केले.१००व्या संमेलनाचे वेध९७ व्या अखिल भारतीय मराठी साहित्य संमेलनामध्ये उंबरठ्यावर आलेल्या १०० व्या अखिल भारतीय मराठी साहित्य संमेलनाची आठवण झाली. मुख्यमंत्री एकनाथ शिंदे यांनीही आपल्या भाषणात या भाषणामध्ये आमचेच सरकार पुन्हा सत्तेवर येणार असल्याचा आत्मविश्वास व्यक्त करत १०० व्या साहित्य संमेलनासाठी सरकारचे सहाय्य राहील, असे आश्वासन दिले. हे संमेलन जागतिक स्तरावर नावाजले जाईल, असे आयोजित करण्याचे आवाहनही त्यांनी केले.'अभिजात'च्या निकषांमध्ये बदलअभिजात भाषेच्या दर्जाबद्दलच्या निकषांमध्ये बदल झालेले असून, हे निकष प्रसिद्ध झाल्यानंतर त्यानुसार पडताळणी करून मराठीला अभिजात दर्जा मिळण्यासाठी पुन्हा प्रयत्न करण्यात येतील, असे केसरकर यांनी सांगितले.पुस्तकांचे गावअमळनेर हे पुस्तकांचे गाव व्हावे, यासाठी मराठी भाषामंत्री दीपक केसरकर यांच्याकडे मागणी करण्यात आली होती. या मागणीनुसार अमळनेर हे पुस्तकांचे गाव होईल, असे आश्वासन त्यांनी समारोप सत्रात दिले.पुढील संमेलनाच्या स्थळासाठी अर्जपुढील वर्षी होणाऱ्या ९८व्या अखिल भारतीय मराठी साहित्य संमेलनासाठी इचलकरंजी येथून अर्ज आल्याचे समजते. इतर इच्छुक गावांना स्थानिक संस्थांच्या माध्यमातून ३१ मार्चपर्यंत अर्ज करण्यासाठी मुदत देण्यात आली आहे, असे अखिल भारतीय मराठी साहित्य महामंडळाच्या अध्यक्ष प्रा. उषा तांबे यांनी सांगितले.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/4qGFuMX