फक्त एका जीन्स पँटवरून बुद्धिबळ महासंघाने नियमच बदलला, मॅग्नस कार्लसनचा अखेर विजय https://ift.tt/ijq061Y

संजय घारपुरे : फक्त एका जीन्स पँटवरुन आता जागतिक बुद्धिबळ महासंघाला आपला नियम बदलावा लागला आहे. या सर्व प्रकरणात माग्नस कार्लसनचा विजय झाल्याचे समोर आले आहे.

नेमकं प्रकरण आहे तरी काय...

जागतिक जलद बुद्धिबळ स्पर्धेदरम्यान जीन्स परिधान केल्यामुळे मॅग्नस कार्लसनला स्पर्धेतून एका दिवसाकरीता बाद करण्यात आले. कार्लसनने त्यानंतर स्पर्धाच सोडली होती. मात्र आता जागतिक बुद्धिबळ महासंघाने जीन्स परिधान करून खेळण्यास परवानगी दिली आहे. त्यासाठी आपल्या नियमातही बदल केला आहे.जागतिक जलद बुद्धिबळ स्पर्धेच्यावेळी जीन्स परिधान करून खेळता येणार नाही, असा नियम होता. त्यानुसार स्पर्धेचे मुख्य आर्बिट्रेटर अॅलेक्स होलोवॅकाझ यांनी नवव्या फेरीपूर्वी कार्लसनला जीन्स बदलण्यास सांगितले होते. त्यामुळे कार्लसन संतापला आणि त्याने थेट स्पर्धेतून माघार घेत असल्याचे कळवले. स्पर्धेतील निकालापेक्षा कार्लसनच्या माघाराची चर्चा जास्त झाली. त्यामुळे अखेर जागतिक बुद्धिबळ महासंघ झुकला आहे. त्यांनी धोरणात बदल केल्याचे जाहीर केले. ``जागतिक स्पर्धेच्यावेळी असलेल्या `ड्रेस कोड'मध्ये लवचिकता आणण्याचा निर्णय मी घेतला आहे. अजूनही पारंपारिक ड्रेस कोड अमलात येईल, मात्र त्यात माफक बदल मान्य असेल," असे जागतिक बुद्धिबळ महासंघ अर्थात फिडेचे अध्यक्ष अॅकार्दी द्वोर्कोविच यांनी सांगितले. त्यांनी जीन्स आणि सूट हा कार्लसनचा पोषाख नियमाच्या चौकटीत बसू शकतो याचीच कबुली दिली. जलद स्पर्धेच्या माघारीनंतर कार्लसनने अतीजलद स्पर्धाही न खेळण्याचा निर्णय घेतला होता. मात्र ड्रेस कोडमधील बदलानंतर त्याने जागतिक अतीजलद स्पर्धेत खेळण्याचे ठरवले आहे. ही स्पर्धा सोमवारी रात्री न्यूयॉर्कला सुरू होणार आहे. अर्थात याचे संकेत रविवारी मिळाले होते. त्याने रविवारी जलद स्पर्धेची सांगता झाल्यानंतर विश्वनाथन आनंदची भेट घेतली होती. कार्लसनने नियमाचे पालन न केल्यामुळे त्याला बाद करण्यावाचून पर्यायच राहिला नाही, असे आनंदने सांगितले होते. कार्लसनच्या सहभागाचा बुद्धिबळ जगतास नक्कीच मोठ्या प्रमाणावर फायदा होईल, असे जागतिक बुद्धिबळ महासंघाने सांगितले. कार्लसननेही स्पर्धा सहभाग मान्य केला आहे. कार्लसनने त्यापूर्वी स्पर्धेच्या मुख्य पुरस्कर्त्यांसह चर्चाही केली होती.

from Marathi News: मराठी बातम्या, Latest Marathi Breaking News & Headlines, Maharashtra Vidhan Sabha Elections Result News in Marathi | Maharashtra Times https://ift.tt/Z8tjhCH