रणजी करंडक क्रिकेट : मुंबईचा संघ जवळपास अंतिम फेरीत, मिळवली त्रिशतकी आघाडी https://ift.tt/a4QeDkw

बेंगळुरू : मुंबईने आपल्या लौकिकास साजेशी कामगिरी करताना उत्तर प्रदेशविरुद्धच्या रणजी करंडक क्रिकेट स्पर्धेच्या उपांत्य लढतीत एकतर्फी वर्चस्व राखले आहे. मुंबईने गुरुवारी उत्तर प्रदेशचा पहिला डाव १८० धावांतच गुंडाळला आणि तिसऱ्या दिवसअखेर दुसऱ्या डावात १ बाद १३१ अशी भक्कम सुरुवात केली. तिसऱ्या दिवसअखेर मुंबईने ३४६ धावांची आघाडी घेतल्यामुळे त्यांचा अंतिम फेरीतील प्रवेश जवळपास निश्चित आहे. माधव कौशिक आणि करण शर्मा या उत्तर प्रदेशच्या तिसऱ्या जोडीने तिसऱ्या दिवशी पहिल्या तासात मुंबईला यशापासून वंचित ठेवले होते. त्यांनी दुसऱ्या विकेटसाठी ६० धावांची भागीदारी केली. मात्र ही जोडी फुटल्यावर उत्तर प्रदेशचा डाव घसरला. २ बाद ६४ या परिस्थितीत उत्तर प्रदेशने ४३ धावात पाच विकेट गमावल्या. शिवम मावीने ५५ चेंडूंत ४८ धावांची आक्रमक खेळी केल्यामुळेच उत्तर प्रदेशला पावणेदोनशे धावांचा टप्पा गाठता आला. तुषार देशपांडे, मोहित अवस्थी आणि तनिष कोटीयन यांनी प्रत्येकी तीन विकेट घेत मुंबईला पहिल्या डावात आघाडी मिळवून दिली. पहिल्या डावात भोपळा फोडण्यात अपयशी ठरलेल्या पृथ्वी सावने आक्रमक अर्धशतक केले. त्यावेळी त्याचा साथीदार यशस्वी जयस्वाल केवळ खेळपट्टीवर उभे राहण्याचे काम करीत होता. पृथ्वी परतल्यावर यशस्वी आणि अरमानने मुंबईची आघाडी अधिक भक्कम करण्याकडे लक्ष दिले. त्यांना तिसऱ्या दिवशी उत्तर प्रदेशला एकाच विकेटवर समाधान मानण्यास भाग पाडले. १०८ मिनिटानंतर पहिली धावमुंबईच्या यशस्वी जयस्वालने १०८ मिनिटे खेळपट्टीवर राहिल्यावर भोपळा फोडला. प्रथम श्रेणी क्रिकेटमधील ही दुसऱ्या क्रमांकाची कामगिरी. बडोद्याच्या शेखर जोशीने बंगालविरुद्ध (२००६) १२१ मिनिटे फलंदाजी केल्यावर पहिली धाव केली होती. दरम्यान, यशस्वीने ५४व्या चेंडूंवर पहिली धाव नोंदवली. त्याने अंकित राजपूतला स्क्वेअर लेगला चौकार मारून भोपळा फोडला होता. त्याने ५० चेंडू निर्धाव खेळल्यानंतर सहकाऱ्यांनी त्याचे कौतुक केले होते. त्याला एक बाजू भक्कमपणे लावून धरण्याची जबाबदारी होती. स्कोअरबोर्ड - मुंबई ३९३ आणि १ बाद १३३ (पृथ्वी साव ६४ - ७१ चेंडूंत १२ चौकार, यशस्वी जयस्वाल खेळत आहे ३५ - ११५ चेंडूंत ५ चौकार आणि १ षटकार, अरमान जाफर खेळत आहे ३२ - ६७ चेंडूंत ५ चौकार) वि. उत्तर प्रदेश ५४.३ षटकांत सर्व बाद १८० (माधव कौशिक ३८ - ९१ चेंडूंत ५ चौकार आणि १ षटकार, करण शर्मा २७ - ७६ चेंडूंत ४ चौकार आणि १ षटकार, प्रिन्स यादव २०, शिवम मावी ४८ - ५५ चेंडूंत ४ चौकार आणि २ षटकार, धवल कुलकर्णी १३-४-२५-१, तुषार देशपांडे १७-६-३४-३, शम्स मुलानी ७-१-३३-०, मोहित अवस्थी ११-१-३९-३, तनुष कोटियन ६.३-१-३५-३).

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/OY8g7zJ