मुंबई शहर व उपनगरांना जोडणारा महत्त्वाचा पूल सुरक्षित नसल्याचा अहवाल, वाहतुकीसाठी लवकरच बंद https://ift.tt/IqkbQR0

म. टा. खास प्रतिनिधी, मुंबई : मुंबई शहर ते पूर्व उपनगर यामधील महत्त्वाचा दुवा असणाऱ्या परळ टीटी उड्डाणपुलाच्या सक्षमीकरण आणि डागडुजीचे काम मुंबई महापालिकेच्या पूल विभागाकडून हाती घेण्यात येणार आहे. चालू महिन्यात सुरू होणाऱ्या कामामुळे हा उड्डाणपूल वाहनांसाठी बंद केला जाणार आहे. सहा महिन्यांत हे काम पूर्ण केले जाणार असून साधारण आठ दिवसांत यावर अंतिम निर्णय होईल, अशी माहिती एका वरिष्ठ अधिकाऱ्याने दिली.दक्षिण मुंबईतील सीएसएमटी परिसर, भायखळा, लालबागनंतर परळ टीटीमार्गे, दादर टीटी, माटुंगा, सायनपासून पुढे पूर्व उपनगरांत जाता येते. त्यादृष्टीने मुंबई शहर ते मुंबई पूर्व उपनगरासाठी महत्त्वाचा मानला जातो. साधारण ४२हून अधिक वर्षे या पुलाला झाली आहेत. पुलाच्या प्रसरण सांध्याचा भाग वाहतुकीसाठी योग्य नाही. त्यामुळे पुलाचे सक्षमीकरण होत नाही, तोवर दुचाकींसाठी हा उड्डाणपूल वाहतूकीच्या दृष्टीने सुरक्षित नसल्याचे स्पष्ट करण्यात आले होते. पावसाळी कामांसाठी तसेच उड्डाणपुलाच्या दोन्ही मार्गिकांवर जोडणीचे सांधे (एक्स्पान्शन जॉइंट) भरण्यासह रस्त्यावर असणारे खड्डे बुजविण्याच्या कामाला सुरुवात करून एक जूनपासून या उड्डाणपुलावर दुचाकी आणि अवजड वाहनांना बंदी घालण्यात आली होती.आता या उड्डाणपुलाच्या सक्षमीकरणाचे काम ऑक्टोबरपासून हाती घेण्याचा विचार पूल विभागाकडून सुरू आहे. पुलाच्या सक्षमीकरणाच्या कामासाठीचा कार्यादेश पूल विभागाकडून गेल्या मेमध्येच देण्यात आला आहे. तसेच वाहतूक पोलिसांनीही ऑक्टोबरपासून या पुलाच्या कामासाठी ना हरकत प्रमाणपत्र दिले आहे. या पुलासाठी एक भक्कम रॅम्प टाकून सध्याच्या उड्डाणपुलावर नव्या मार्गिकांचा पर्याय वाहनचालकांना मिळेल. या पुलाच्या सक्षमीकरणासाठी खालच्या बाजूच्या पोकळीच्या जागा भराव टाकून भरण्यात येणार आहेत. या पुलाचे गर्डर नवीन बसवण्याची गरज आहे की नाही, याचीही तपासणी होईल आणि त्यानंतर नवीन गर्डरबाबत निर्णय होणार आहे. साधारण सहा महिन्यांत हे काम पूर्ण केले जाणार आहे.खर्च व वेळेत बचत होणारसध्याच्या उड्डाणपुलाच्या पायाचा आधार घेऊनच नव्या उड्डाणपुलाचा सॉलिड रॅम्प स्थिर करण्यात येणार आहे. त्यामुळे नवा उड्डाणपूल बांधण्याचा खर्च आणि वेळ वाचविणे मुंबई महापालिकेच्या रस्ते विभागाला शक्य होणार आहे. सक्षमीकरणाच्या प्रकल्पानंतरच अवजड वाहनांना उड्डाणपुलावरून पुन्हा प्रवेश देण्यात येईल. या उड्डाणपुलाच्या कामासाठी १८ कोटी रुपयांचा अंदाजित खर्च येणार आहे.डिलाइल रोड पुलाचे काम अंतिम टप्प्यातमुंबई महापालिकेच्या डिलाइल रोड (लोअर परळ) उड्डाणपुलाचे काम अखेरच्या टप्प्यात आहे. त्यामुळे लोअर परळच्या उड्डाणपुलाचा पर्याय उपलब्ध झाल्यानंतर परळ टीटी उड्डाणपुलाचे काम येत्या ऑक्टोबरपासून हाती घेण्यात येणार असल्याचे पालिकेने चार महिन्यांपूर्वीच स्पष्ट केले होते. १ जून २०२३ पासून लोअर परळ पश्चिमेला सेनापती बापट मार्ग जंक्शन येथून येणाऱ्या गणपतराव कदम मार्गावर उर्मी इस्टेट आणि पेनिनसुला कॉर्पोरेट पार्क येथून रेल्वेपर्यंतचा मार्ग खुला करण्यात आला होता. याच पुलावर पुढे डावीकडे ना. म. जोशी मार्गावर वेस्टर्न रेल्वे वर्कशॉप आणि दादरच्या दिशेने जाणारा मार्गही वाहतुकीसाठी खुला केला. मात्र पूर्व ते पश्चिमकडे म्हणजेच लोअर परळहून करी रोडकडे जाणारा मार्ग सुरू झाला नव्हता. याच मार्गावरील तीन मार्गिका १७ सप्टेंबरपासून वाहतुकीसाठी सुरू करण्यात आल्या. यामुळे वाहनचालकांना दिलासा मिळाला. पश्चिमेकडून पूर्वेकडे जाणाऱ्या तीन मार्गिकांचे काम सुरूच असून यासह अन्य किरकोळ कामे नोव्हेंबरच्या मध्यापर्यत पूर्ण करण्याचा प्रयत्न आहे.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/6NjKGof