सिंधुदुर्ग: सिंधुदुर्गातल्या करुळ घाटात आयशर टेम्पोला भीषण अपघात झाला. केवळ दैव बलवत्तर म्हणूनच आयशर दरीत जाता जाता बचावला आहे.त्यामुळे कोणताही अनुचित प्रकार घडला नाही. हा अपघात सायंकाळी ७ वाजता झाला आहे. या अपघाताची नोंद वैभववाडी पोलिस ठाण्यात करण्यात आली नव्हती. त्यामुळे चालकाचे नाव समजू शकले नाही.वैभववाडीकडून कोल्हापूरकडे आयशर टेम्पो जात होता. दिवसभर पडणाऱ्या पावसामुळे चालकाचा ताबा सुटल्याने आयशर उजव्या बाजूच्या दिशेने दरीकडे झुकला. आयशरचे चालक साईडचे चाक दरीत लोंबकळत होते. आयशरची लाईट ही चालू होती. या अपघातात चालक आणि क्लीनर बचावले आहेत. जीवितहानी टळली आहे. या मार्गावरून ये-जा करणाऱ्या वाहन चालकांनी दुसऱ्या वाहनाला दोरीच्या साह्याने बांधून आयशर मागे ओढत रस्त्यावर घेतला. या अपघाताची नोंद उशिरापर्यंत वैभववाडी पोलिस ठाण्यात करण्यात आली नाही.सध्या कोकणात अधूनमधून पाऊस पडत आहे. घाटामध्ये पावसाळ्यात अपघात होण्याच्या घटना अधिक आहेत. पावसाळ्यात ओव्हरलोड गाड्यांचा ब्रेक देखील लागत नाही, त्यामुळे अनेक अपघात करूळ घाटात होत असतात.जिल्ह्यात आंबोली, फोंडाघाट, करूळ आणि भुईबावडा असे चार घाटमार्ग आहेत. यातील सर्वाधिक वर्दळ करूळ घाटमार्गावरच असते. साडेअकरा कि.मी. चा हा घाटमार्ग आहे. नाग मोडी वळणे, खोल दऱ्या, मोठमोठे डोंगर अशा भौगोलिक रचनेतून काढण्यात आलेला हा घाटमार्ग आहे. गेल्या पावसाळ्यात अनेकवेळा दरडी कोसळून आणि संरक्षक कठडे ढासळून हा घाटमार्ग ठप्प झाला होता. सिंधुदुर्गातून कोल्हापूरकडे किंवा कोल्हापूरहून सिंधुदुर्गकडे जाणारी येणारी सर्वाधिक वाहतूक याच घाटमार्गाने होते.त्याचबरोबर अनेक ठिकाणी रस्ता देखील खचला आहे, साईट पट्टी सुद्धा सुस्थितीत नाही आहे. त्यामुळे सध्याही वाहतूक कशीबशीच सुरू आहे. त्यामुळे हा घाट मार्ग नव्याने कधी बनणार आणि यातून वाहन चालकांची कशी सुटका होणार याकडे सर्व वाहन चालकांचे लक्ष लागून राहिले आहे.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/OGfBdHV
No comments:
Post a Comment