म. टा. विशेष प्रतिनिधी, मुंबई : ‘मुंबईत दरवर्षी पाऊसच इतका पडतो की, त्यामुळे डांबरी रस्त्यांवर खूप ताण येतो. इतर शहरांत अशाच प्रकारे डांबरी रस्ते उभारले, तरी मुंबईप्रमाणे रस्त्यांची अवस्था बिघडत नाही. मुंबईत वाहनांची वर्दळही प्रचंड प्रमाणात असते. प्रतिकिलोमीटर दोन हजार १८३ वाहने इतकी वाहनांची घनता असते. तर १ जानेवारीला मुंबईतील वाहतुकीत तब्बल ४४ लाख ७६ हजार वाहने असल्याचे सर्वेक्षणातून आढळले. रोजच्या वाहतुकीच्या अहवालाप्रमाणे दररोज सुमारे सहा लाख ११ हजार वाहने मुंबईत प्रवेश करतात आणि मुंबईतून बाहेर जातात. वाहनांच्या प्रचंड वर्दळीनेही रस्त्यांवर मोठा परिणाम होतो’, अशी अगतिकता मुंबई महापालिकेने खड्ड्यांच्या प्रश्नावरील आपल्या उत्तरात दाखल केलेल्या प्रतिज्ञापत्रात मांडली आहे.खराब रस्ते व खड्डे आणि उघड्या मॅनहोलच्या प्रश्नावर उच्च न्यायालयाने सन २०१८मध्येच स्पष्ट आदेश दिलेले असतानाही त्यांचे पालन झाले नसल्याने अॅड. रुजू ठक्कर यांनी अवमान याचिका केली आहे. या प्रश्नावरील सुनावणीसाठी न्यायालयाने अॅड. जमशेद मिस्त्री यांची ‘न्यायालय मित्र’ म्हणून नेमणूक केली आहे. न्यायालयीन निर्देशांचा भंग होत असल्याचे रुजू व मिस्त्री यांनी दाखवल्यानंतर मुख्य न्यायमूर्ती देवेंद्र उपाध्याय व न्या. आरिफ डॉक्टर यांच्या खंडपीठाने उत्तर मागितले होते. त्याप्रमाणे अतिरिक्त आयुक्त (प्रकल्प) पी. वेलारसु यांनी ज्येष्ठ वकील अनिल साखरे यांच्यामार्फत प्रतिज्ञापत्र दाखल करून महापालिकेची बाजू मांडली.‘एखाद्या ठिकाणी खराब रस्ता असू शकतो किंवा मॅनहोल उघडे असू शकते. परंतु, त्याद्वारे संपूर्ण शहराची स्थिती प्रतिबिंबित होत नाही. नागरिकांना वा वाहनांना सुरक्षित व सुस्थितीतील रस्ते उपलब्ध करण्याची पूर्ण खबरदारी महापालिका घेत आहे. एखाददुसरे प्रकार असतील, तर ते निदर्शनास आणल्यास पालिका तत्परतेने उपाय योजेल. परंतु, अशा एखाददुसऱ्या प्रकारांवरून आदेश पालन करत नाही आणि पालिकेने न्यायालयाचा अवमान केला असे म्हणता येणार नाही’, असा दावाही पालिकेतर्फे वेलारसु यांनी प्रतिज्ञापत्रात केला आहे. तसेच ‘न्यायालयाचा अवमान करण्याचा पालिकेचा कधीच इरादा नव्हता आणि तसे केलेही नाही. त्यामुळे अवमान कायद्यांतर्गत कारवाई करण्यात येऊ नये’, अशी विनंतीही पालिकेने केली आहे.रस्त्यांचे काँक्रिटीकरण सुरू‘मुंबईतील सर्व रस्त्यांचे काँक्रिटीकरण करण्याचा प्रकल्प सुरूच आहे. एकूण दोन हजार ५० कि.मी. लांबीच्या रस्त्यांपैकी एक हजार १४८ कि.मी. रस्त्यांचे काँक्रीटीकरण पूर्ण झाले असून, उर्वरित रस्त्यांबाबतची प्रक्रिया सुरू आहे. यंदाच्या पावसाळ्यात २७ ऑगस्टपर्यंत ५९ हजार ५३३ खड्डे; तर १० ऑक्टोबरपर्यंत ७४ हजार ९४ खड्डे बुजवण्यात आले. पावसाळ्यापूर्वी एकूण ११२ कि.मी. रस्त्याचे डांबरीकरण करण्यात आले होते. तसेच पावसाळ्यादरम्यान खड्डे त्वरित बुजवण्यासाठी नव्या प्रकारच्या तंत्रांचाही वापर करण्यात आला होता’, अशी माहितीही पालिकेने प्रतिज्ञापत्रात दिली आहे.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/0Y769nv
No comments:
Post a Comment