शुभम बोडके, नाशिकः लोकसभा मतदारसंघाची निवडणूक सुरू असताना अनेक राजकीय पक्षांमध्ये उलथापालथ दिसून येत आहे. नाशिकमध्ये देखील निवडणुकीच्या तोंडावर ठाकरे सेनेला जोरदार धक्का देण्याची हालचाल आता शिंदेसेने सुरू केली आहे. नाशिक लोकसभा मतदारसंघात महाविकास आघाडी ठाकरे सेनेकडून ठाकरेंचा आक्रमक चेहरा म्हणून ओळख असलेले विजय करंजकर हे लोकसभा निवडणुकीच्या रिंगणात उतरतील, अशी शक्यता होती. सलग दुसऱ्यांदा लोकसभा मतदारसंघातून उमेदवारी नाकारल्यामुळे यंदा उमेदवारी मिळेल, अशी दाट शक्यता होती. मात्र ऐनवेळी सिन्नर विधानसभा मतदारसंघाचे माजी आमदार राजाभाऊ वाजे यांना महाविकास आघाडी ठाकरे सेनेकडून उमेदवारी देण्यात आली. वर्षभरापासून लोकसभा निवडणुकीची तयारी चालू ठेवत यंदा खासदार व्हायचाच, असा पक्का निर्धार करणाऱ्या विजय करंजकर यांना सलग तिसऱ्यांदा ठाकरेंनी नाशिक लोकसभा मतदारसंघाची उमेदवारी नाकारली. मात्र विजय करंजकर यांना हा निर्णय जिव्हारी लागल्यामुळे त्यांनी थेट लढणार आणि पाडणार, अशी भूमिका घेत उघड नाराजी व्यक्त केली. नाराज विजय करंजकर हे अपक्ष लोकसभा निवडणूक लढणार, अशी चर्चा असताना त्यांनी आपला उमेदवारी अर्ज दाखल केला. मात्र आता नाशिक लोकसभेची निवडणूक ही गोडसे विरुद्ध वाजे अशी थेट असल्याचे चित्र समोर असताना शिंदे गटात जाण्याच्या चर्चेंवर विजयी करंजकर यांनी अखेर निर्णय घेतला. त्याची माहिती खात्रीशीर सूत्रांनी दिली आहे. विजय करंजकर हे आज रात्री उशिरा मुंबईत एकनाथ शिंदे यांच्या उपस्थितीमध्ये शिवसेनेत प्रवेश करतील, अशी माहिती समोर येत आहे. महायुतीकडून उमेदवारी जाहीर होत नसताना शिंदे यांच्या जिल्हाप्रमुखांकडून महायुतीचा उमेदवार जाहीर होऊ द्या. तुम्हाला ठाकरेंचे अनेक नेते हे आमच्या शिवसेनेत दिसतील, अशी घोषणा केली होती. मात्र महायुतीकडून शिंदेंच्या शिवसेनेचे विद्यमान खासदार हेमंत गोडसे यांना उमेदवारी जाहीर झाली आहे. तीन-चार दिवस उलटूनही शिंदे यांच्या शिवसेनेचे जिल्हाप्रमुख अजय बोरस्ते यांनी केलेल्या घोषणाची नेमके काय झाली, अशी चर्चा सुरू झाली. मात्र अखेर अजय बोरस्ते यांना शिंदेसेनेकडून बढती देत थेट उपनेते पदाची जबाबदारी देण्यात आली आहे. त्यामुळे जिल्हाप्रमुख पदावर आता नेमकी कुणाची वर्णी लागेल अशी चर्चा सुरू झाली आहे. विजय करंजकर हे देखील आज शिंदे यांच्या शिवसेनेत प्रवेश करतील आणि त्यांना जिल्हाप्रमुख पदाची जबाबदारी देण्यात येईल, अशी देखील शक्यता राजकीय वर्तुळातून वर्तवली जात आहे. त्यामुळे आता विजय करंजकर हे आज रात्री उशिरा मुंबईत शिवसेना शिंदे गटात प्रवेश करतील, अशी माहिती खात्रीशीर सूत्रांनी दिली आहे. लोकसभा निवडणुकीच्या तोंडावर एकनाथ शिंदे यांच्या शिवसेनेकडून उद्धव ठाकरेंच्या शिवसेनेला जोरदार धक्का दिला जाईल अशी चर्चा सुरू झाली आहे. विजय करंजकर यांच्यासोबत जवळपास ३० माजी नगरसेवक आणि जिल्हा परिषद, पंचायत समितीचे देखील सदस्य ठाकरेंना जय महाराष्ट्र करून एकनाथ शिंदे यांच्या शिवसेनेत प्रवेश करणार असल्याची माहिती मिळत आहे. त्यामुळे आता नाशिकमध्ये देखील राजकीय वर्तुळात मोठी उलथापालथ होण्याची शक्यता वर्तवली जात आहे. विजय करंजकर हे मागील तेरा वर्षांपासून नाशिक शिवसेनेचे जिल्हाप्रमुख पदावर काम करत होते. मात्र त्यांना सलग तिसऱ्यांदा उमेदवारी नाकारत उद्धव ठाकरे यांनी करंजकरांवर अन्याय केला असल्याचा थेट आरोप आता विजय करंजकर यांचे समर्थक करू लागले आहेत. त्यामुळे विजय करंजकर यांनी काल घेतलेल्या मेळाव्यातून राजकीय भूमिका लवकरच घेऊ, असे देखील संकेत दिले होते. मात्र आज विजय करंजकर हे उद्धव ठाकरेंना शेवटचा जय महाराष्ट्र करून एकनाथ शिंदे यांच्या शिवसेनेत प्रवेश करणार आहेत.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/a7OCw3p
No comments:
Post a Comment